Mga tulo ka adlaw na tikang han nagin usa han siyahan nga mga disipulo ni Jesus hi Natanael. Hi Jesus ngan an pipira han iya siyahan nga mga disipulo tipakadto ha ira lugar ha norte nga distrito han Galilea. An ira destinasyon amo an bungto han Cana, an natawohan nga lugar ni Natanael. Nahimumutang ito ha kabungtoran ha norte han Nazaret diin nagtubo hi Jesus. Didto, gin-imbitar hira ha usa nga kasal.

An nanay ni Jesus nakadto liwat hito nga kasal. Sugad nga sangkay han pamilya han ginkakasal, posible nga binulig hi Maria ha pag-asikaso ha damu nga bisita. Salit nakita dayon niya kon ano an kulang ngan ginsumatan niya hi Jesus: “Waray na hira bino.”—Juan 2:3.

Baga hin nagsusuhestyon hi Maria kan Jesus nga maghimo hin paagi kay kulang an bino. Gamit an usa nga ekspresyon, iginpahayag ni Jesus an iya pagdumiri, ha pagsiring: “Ano an labot naton hito?” (Juan 2:4) Sugad nga Hadi nga ginpili han Dios, an iya mga buruhaton kinahanglan nga sugo han iya langitnon nga Amay, diri han iya pamilya o kasangkayan. Maaramon hi Maria kay igintapod niya an sitwasyon ha iya anak, ngan nagsiring hiya ha mga nagsiserbi: “Buhata niyo an ngatanan, nga iya igsiring.”—Juan 2:5.

Hito nga kasal, may-ada unom nga tadyaw nga bato nga an tagsa nasusudlan hin sobra napulo ka galon. Ginsugo ni Jesus an mga nagsiserbi: “Pun-a niyo hin tubig an mga tadyaw.” Katapos sumiring hiya: “Kuha kamo yana hin gutiay ngan dad-a ngadto ha direktor han kasal.”—Juan 2:7, 8.

Naruyagan gud han direktor han kasal an maopay nga klase han bino pero diri hiya maaram nga ginhimo ito pinaagi hin milagro. Gintawag niya an kinasal nga lalaki, ngan nagsiring: “An maopay nga bino amo an una nga iginsiserbi han bisan hin-o, ngan kon hubog na an mga bisita, an diri maopay nga klase na an iginsiserbi. Pero ikaw, yana mo la lugod igsiserbi an maopay nga bino.”—Juan 2:10.

Ini an siyahan nga milagro ni Jesus. Han makita ini han iya bag-o nga mga disipulo, naparig-on an ira pagtoo ha iya. Katapos, hi Jesus, an iya nanay, ngan an iya kabugtoan ha nanay nagbiyahe ngadto ha syudad han Capernaum ha norte-weste nga baybayon han Dagat han Galilea.