An Bethel usa nga Hebreo nga pulong nga nangangahulogan, “Balay han Dios.” (Genesis 28:17, 19) Angayan ito nga ngaran para ha pasilidad nga ginagamit han mga Saksi ni Jehova ha bug-os nga kalibotan diin gin-oorganisar an pagsangyaw nga buruhaton. An Nagmamando nga Lawas aadto ha world headquarters ha New York State, E.U.A. Didto, ira gin-oorganisar an buruhaton han mga sanga nga opisina ha damu nga nasud. Sugad nga grupo, an mga boluntaryo hini nga mga pasilidad gintatawag nga pamilya han Bethel. Sugad hin pamilya, hira naukoy, nagtatrabaho, nakaon, ngan nag-aaram han Biblia nga may pagkaurosa.—Salmo 133:1.

Usa nga espesyal nga lugar diin boluntaryo an mga membro ngan nagtatagad han ira kalugaringon sugad nga pamilya. Ha tagsa nga Bethel, may mga Kristiano nga kalalakin-an ngan kababayin-an nga bug-os-panahon nga nagbubuhat han kaburut-on han Dios ngan nag-aalagad para han intereses han Ginhadian. (Mateo 6:33) Waray hira sweldo, kondi may-ada hira han ira mga panginahanglan—urukyan, pagkaon, ngan allowance para ha personal nga kagarastohan. An kada tagsa ha ira may-ada toka, ha opisina man, kusina, dining room, imprintahan, bindery, housekeeping, laundry, maintenance, o iba pa.

Usa nga lugar diin sagipo an mga tawo ha buruhaton nga nasuporta ha pagsangyaw. An nangunguna nga tumong han kada Bethel amo an pagpahibaro han kamatuoran han Biblia ha damu nga tawo. Ini nga brosyur usa nga ebidensya hito. Iginsurat ini ha pagdumara han Nagmamando nga Lawas, iginpadara pinaagi ha kompyuter ngadto ha ginatos nga translation team ha bug-os nga kalibotan, gin-imprinta ha mga high-speed press ha mga imprintahan ha pipira nga Bethel, ngan iginpadara ha sobra 110,000 nga kongregasyon. Ha tagsa hito nga proseso, igintatagana han pamilya han Bethel an importante nga bulig ha pinakaapurado nga buruhaton—an pagsangyaw han maopay nga sumat.—Markos 13:10.

• Hin-o an mga nag-aalagad ha Bethel ngan ano nga mga tagana an ira nakakarawat?

• Ano nga apurado nga buruhaton an ginsusuportahan han tagsa nga Bethel?