Naobserbaran mo ba ha mga retrato dinhi an desente nga pamado han mga Saksi ni Jehova kon natambong hira ha ira mga katirok? Kay ano nga importante ha amon an desente nga pamado ngan pag-ayos?

Basi ipakita an amon pagtahod ha amon Dios. Oo, diri importante ha Dios kon ano an aton hitsura. (1 Samuel 16:7) Pero kon nagkakatirok kami ha pagsingba ha iya, karuyag namon ipakita an kinasingkasing nga pagtahod ha iya ngan ha amon kabugtoan. Kon maiimbitaran kita hin hadi o presidente ha iya balay, diri ba desente nga mamamado kita sugad nga pagrespeto han iya katungdanan? Ha pariho nga paagi, an amon pamado ha amon katirok nagpapakita han amon daku nga pagtahod ha “Hadi han mga nasud,” hi Jehova nga Dios, ngan ha lugar han amon pagsingba.—Jeremias 10:7.

Basi ipakita an amon hitaas nga prinsipyo. An Biblia nag-aaghat ha mga Kristiano nga mamado “nga may dignidad ngan maopay nga panhunahuna.” (1 Timoteo 2:9, 10, NW) An “may dignidad” nga pamado nangangahulogan hin paglikay ha pamado nga nakakakuha hin atensyon tungod kay magarbo ito, nakakadani, o malaw-ay. Dugang pa, an “maopay nga panhunahuna” nabulig ha aton nga magin diri amog ha aton pamado. Bisan pa kon susundon ini, damu la gihap an estilo nga mapipilian. An amon desente ngan mahinhin nga pag-ayos ‘nagrarayandayan han pagturon-an han Dios’ ngan ‘naghihimaya ha Dios’ diri la ha amon ginyayakan kondi pati ha amon hitsura. (Tito 2:10; 1 Pedro 2:12) Pinaagi han desente nga pamado, naipapakita namon kon paonan-o namon ginsisingba hi Jehova.

Ayaw pag-alang pagtambong ha Kingdom Hall tungod la kay waray ka pormal nga bado; diri man liwat kinahanglan magin marahalon an imo bado. An importante, angayan, limpyo, ngan presentable ito.

• Kay ano nga importante nga tagdon an aton pamado kon nagsisingba ha Dios?

• Ano nga mga prinsipyo an mabulig ha aton ha pagdesisyon kon paonan-o kita mamamado ngan mag-aayos?