Balik kita hin pipira ka tuig. Hi Nehemia nga surugoon ni Hadi Artaherhes usa nga Israelita nga naukoy ha Persia ha syudad han Susan. An iya bugto nga tikang ha Juda may dara nga maraot nga sumat: ‘Diri talwas an katawohan nga binalik ha Jerusalem. An mga pader ngan mga ganghaan nga ginbungkag han mga taga-Babilonya waray pa matukod utro.’ Nasubo gud hi Nehemia. Karuyag niya kumadto ha Jerusalem basi bumulig, salit nag-ampo hiya nga tugotan hiya han hadi.

Ha urhi, nakita han hadi nga masurub-on hi Nehemia. An hadi nagsiring: ‘Waray ko pa ikaw makita nga sugad hini. Ano an problema?’ Hiya binaton: ‘Kay ano nga diri ako masusubo nga an akon syudad, an Jerusalem, ruba pa?’ An hadi nagpakiana: ‘Ano an karuyag mo nga buhaton ko?’ Hi Nehemia nag-ampo dayon hin hilom. Katapos, hiya nagsiring: ‘Alayon, tuguti ako nga kumadto ha Jerusalem basi tukuron utro an mga pader hito.’ Tumugot hi Hadi Artaherhes ngan ginsiguro nga magin talwas hi Nehemia ha iya hirayo nga biyahe. Ginhimo liwat niya hi Nehemia nga gobernador han Juda ngan gintagan hin mga kahoy para ha mga ganghaan han syudad.

Pag-abot ni Nehemia ha Jerusalem, gin-inspeksyon niya an mga pader hito. Tapos, iya gintirok an mga saserdote ngan mga opisyal ngan ginsidngan: ‘Maraot gud an aton kahimtang. Kinahanglan gumios kita.’ Inuyon an katawohan, ngan ira gintikangan an pagtukod utro han mga pader.

Pero gintamay hira han pipira nga kaaway han Israel ngan ginsidngan: ‘Bisan ihalas nga ayam kaya rumpagon an iyo gintutukod nga pader.’ Ginbalewaray han mga Judio an mga insulto ngan padayon nga nagtrabaho. An pader nagtikahitaas ngan nagtikarig-on.

Nagplano an mga kaaway nga tigda nira nga susulungon an Jerusalem tikang ha iba-iba nga direksyon. Han hinbaroan ito han mga Judio, nahadlok hira. Pero hi Nehemia nagsiring: ‘Ayaw kamo kahadlok. Kaupod naton hi Jehova.’ Nagbutang hi Nehemia hin mga gwardya nga magpapanalipod ha mga trabahador, salit waray idayon han mga kaaway an pagsulong.

 Ha sulod la hin 52 ka adlaw, natapos an pagtukod han mga pader ngan mga ganghaan. Ginpakadto ni Nehemia ha Jerusalem an tanan nga Levita para ha inagurasyon. Gin-organisar niya hira ha duha ka grupo hin mga parakanta. Sinaka hira ha pader pinaagi han hagdan han Ganghaan han Burabod. Tapos, inin duha nga grupo nagmartsa ha magkaiba nga direksyon palibot han syudad. Nagtokar hira hin mga trumpeta, simbal, ngan arpa ngan nagkanta kan Jehova. Hi Esra inupod ha usa nga grupo, ngan hi Nehemia ha usa nga grupo, tubtob han nagtapo hira ha templo. Tanan nga katawohan​—kalalakin-an, kababayin-an, ngan kabataan—​naghalad kan Jehova ngan nagkalipay. An ira pagrayhak hinbatian tubtob ha higrayo nga lugar.