Katapos ni Jesus magsangyaw hin mga usa ngan tunga ka tuig, kinahanglan niya maghimo hin importante nga desisyon. Hin-o an iya pipilion basi magin duok nga mga kabulig ha iya mga buruhaton? Hin-o an iya babansayon basi manguna ha Kristiano nga kongregasyon? Antes magdesisyon, karuyag ni Jesus mangaro hin giya kan Jehova. Salit kinadto hiya ha usa nga bukid basi mag-usahan, ngan nag-ampo hiya ha bug-os nga gab-i. Pagkaaga, gintawag niya an pipira nga disipulo ngan nagpili hin 12 nga apostol. Hin-o ha ira an imo nahinunumdoman? An ira mga ngaran​—Pedro, Andres, Santiago, Juan, Felipe, Bartolome, Tomas, Mateo, Santiago nga anak ni Alfeo, Tadeo, Simon, ngan Judas Iscariote.

An mga apostol magbibiyahe upod ni Jesus. Katapos hira bansayon ni Jesus, iya hira ginpasangyaw nga hira na la. Gintagan hira ni Jehova hin gahum ha pagpagawas hin mga demonyo ngan ha pagpanambal.

Gintawag ni Jesus nga kasangkayan an mga apostol, ngan natapod hiya ha ira. Naghunahuna an mga Pariseo nga ordinaryo la  hira ngan diri edukado. Pero ginbansay hira ni Jesus para ha ira buruhaton. Makakaupod hira ni Jesus ha pinakaimportante nga mga panahon ha iya kinabuhi, sugad han antes hiya mamatay ngan katapos han iya pagkabanhaw. Pariho kan Jesus, kadam-an ha ira tikang ha Galilea. Inasaw-an an iba ha ira.

An mga apostol diri perpekto salit nakakasayop hira. Danay nakakayakan hira hin waray anay nira hunahunaa ngan nakakahimo hin sayop nga mga desisyon. Usahay halipot la an ira pasensya. Nagdidiskusyon pa ngani hira kon hin-o ha ira an mas importante. Pero maopay hira nga mga tawo ngan hinigugma nira hi Jehova. Hira an magigin pundasyon han Kristiano nga kongregasyon pagbaya ni Jesus.