LEKSYON 88
Gin-aresto hi Jesus
Hi Jesus ngan an mga apostol inagi ha Walog han Kidron han tipakadto hira ha Bukid han mga Olibo. Pasado alas-12 na adto han gab-i, ngan kadayaw. Pag-abot nira ha garden han Getsemani, hi Jesus nagsiring: “Dinhi la kamo ngan magpadayon kamo ha pagbantay.” Katapos, kumadto hiya ha unhan ngan linuhod. Tungod han duro nga kasakit, nag-ampo hiya kan Jehova: “Matuman unta an imo kaburut-on.” Kahuman, nagsugo hi Jehova hin anghel basi parig-unon hi Jesus. Pagbalik ni Jesus, naabtan niya nga nangangaturog an tulo nga apostol. Nagsiring hiya: ‘Pagkamata na kamo! Diri yana panahon nga mangaturog! Inabot na an oras para ihatag ako ha akon mga kaaway.’
Waray pag-iha, inabot hi Judas upod an damu nga tawo nga may mga espada ngan ibaralbag. Maaram hiya kon diin mabibilngan hi Jesus kay agsob hira kumadto hito nga garden. Ginsidngan ni Judas an mga sundalo nga itututdo niya kon hin-o hi Jesus. Dinaop hiya kan Jesus ngan nagsiring: ‘Maopay nga gab-i, Magturutdo,’ tapos ginharokan niya hi Jesus. Hi Jesus nagsiring: ‘Judas, gintatraydor mo ba ako pinaagi hin harok?’
Gintapo ni Jesus an mga tawo ngan nagpakiana: “Hin-o an iyo ginbibiling?” Hira binaton: “Hi Jesus nga Nazareno.” Hiya nagsiring: “Ako an iyo ginbibiling.” Inatras an mga tawo ngan nagkatutumba. Nagpakiana utro hi Jesus: “Hin-o an iyo ginbibiling?” Binaton utro hira: “Hi Jesus nga Nazareno.” Hiya nagsiring: ‘Ginsidngan ko na kamo nga ako an iyo ginbibiling. Palakta ini nga kalalakin-an.’
Han nasabtan ni Pedro an nahitatabo, ginhulbot niya an iya espada ngan gintigbas an talinga ni Malco nga surugoon han hitaas nga saserdote. Pero ginkaptan ni Jesus an talinga ni Malco ngan gintambal hiya. Katapos nagsiring hi Jesus kan Pedro: ‘Itakob an imo espada. Kon makikig-away ka gamit hin espada, mamamatay ka pinaagi hin espada.’ Gin-aresto hi Jesus han mga sundalo ngan gin-gapos, ngan namalagiw an iya mga apostol. Katapos, gindara hiya han armado nga mga tawo ngadto kan Anas, an punoan nga saserdote. Gin-imbestigar ni Anas hi Jesus ngan gindara ha balay han hitaas nga saserdote nga hi Caifas. Pero ano an nahitabo ha mga apostol?
“Ha kalibotan may kasakitan kamo, pero magmaisugon kamo! Gindaog ko an kalibotan.”—Juan 16:33
Bangin Maruyagan Mo Liwat
HI JESUS—AN DALAN, AN KAMATUORAN, AN KINABUHI
Nag-inampo han Inabat hin Duro nga Kasakit
Kay ano nga nag-ampo hi Jesus: “Alayon kuhaa ha akon ini nga kopa”? Naatras na ba hiya ha pagin paralukat pinaagi han iya kamatayon?
HI JESUS—AN DALAN, AN KAMATUORAN, AN KINABUHI
An Kristo Gintraydor Ngan Gin-aresto
Nabilngan ni Judas hi Jesus bisan kon lahos na ha katutnga han gab-i.
HI JESUS—AN DALAN, AN KAMATUORAN, AN KINABUHI
Hi Jesus Gindara kan Anas, Katapos kan Caifas
Waray hustisya an pagbista kan Jesus.
