Ha Galilea, nakigkita hi Jesus ha iya mga sumurunod. Iya gintagan hira hin importante gud nga sugo: ‘Kadto kamo ha mga tawo han ngatanan nga nasud ngan panhimo kamo hin mga disipulo. Itutdo ha ira an akon mga igintutdo ha iyo, ngan bawtismuhi hira.’ Tapos, nagsaad hiya: ‘Hinumdumi, pirme ako maupod ha iyo.’

Ha sulod hin 40 ka adlaw katapos banhawon hi Jesus, nagpakita hiya ha ginatos niya nga disipulo ha Galilea ngan Jerusalem. Nagtutdo hiya ha ira hin importante nga mga leksyon ngan naghimo hin damu nga milagro. Tapos, nakigkita hiya ha iya mga apostol ha Bukid han mga Olibo ha ultimo nga higayon. Hiya nagsiring: ‘Ayaw kamo pagbaya ha Jerusalem. Padayon nga maghulat kamo ha iginsaad han Amay.’

Waray masabti han mga apostol an iya karuyag sidngon. Nagpakiana hira: ‘Magigin Hadi ka na ba yana han Israel?’ Hi Jesus nagsiring: ‘Diri pa yana an panahon ni Jehova nga himoon ako nga Hadi. Diri mag-iiha, makakakarawat kamo hin gahum tikang ha baraan nga espiritu, ngan magigin mga saksi ko kamo. Pagsangyaw kamo ha Jerusalem, Judea, Samaria, ngan tubtob ha pinakahirayo nga lugar ha tuna.’

Katapos, nagtipaigbaw hi Jesus ngadto ha langit ngan natabonan hin dampog. An iya mga disipulo padayon nga nagkinita ha langit, pero nawara na hiya.

An mga disipulo bumaya ha Bukid han mga Olibo ngan kumadto ha Jerusalem. Regular hira nga nagkakatirok ha usa nga igbaw nga kwarto ngan nag-aampo. Naghuhulat hira para hin dugang nga instruksyon ni Jesus.