Han nakadto hi Jesus ngan an iya mga apostol ha igbaw nga kwarto, iya ginsidngan hira: ‘Babayaan ako niyo ngatanan yana nga gab-i.’ Hi Pedro nagsiring: ‘Ako diri! Bisan kon bayaan ka han ngatanan, diri ko gud ikaw babayaan.’ Pero hi Jesus nagsiring kan Pedro: ‘Antes tumugaok an manok, tulo ka beses nga masiring ka nga diri ka nakilala ha akon.’

Han gindara hi Jesus han mga sundalo ngadto ha balay ni Caifas, pumalagiw an kadam-an nga apostol. Pero may duha nga apostol nga sumunod ha mga tawo nga nagdara kan Jesus. Usa ha ira amo hi Pedro. Sumulod hiya ha bungsaran han balay ni Caifas ngan nagpapaso hirani ha kalayo. Tungod kay malamrag, nakita han usa nga surugoon nga babaye an nawong ni Pedro ngan nagsiring: ‘Kilala ko ikaw! Kaupod ka ni Jesus!’

Hi Pedro nagsiring: ‘Diri niya ako kaupod! Diri ako maaram han imo ginyiyinakan.’ Kumadto hiya ha may ganghaan. Pero may nakakita na liwat ha iya nga surugoon nga babaye ngan ginsidngan an damu nga tawo: ‘Ini nga lalaki kaupod ni Jesus!’ Hi Pedro nagsiring: ‘Diri ko ngani kilala hi Jesus!’ May lalaki nga nagsiring: ‘Upod ka nira! Kay an imo pagyakan pariho han mga taga-Galilea, pariho kan Jesus.’ Pero hi Pedro nanumpa: ‘Diri ko hiya kilala!’

Hito nga takna, tumugaok an manok. Nakita ni Pedro nga lumingi ha iya hi Jesus ngan ginkita hiya. Nahinumdoman niya an ginsiring ni Jesus. Tapos, gumawas hiya ngan nagtinangis tungod han duro nga kasubo.

Samtang nahitatabo ito, nagmiting an Sanhedrin basi bistahon hi Jesus ha balay ni Caifas. Nagdesisyon na hira nga patayon hi Jesus, ngan yana namimiling hira hin rason basi mabuhat ito. Pero waray hira mabilngan nga bisan ano nga sayop kan Jesus. Ha urhi, ginpakianhan ni Caifas hi Jesus: ‘Ikaw ba an Anak han Dios?’ Hi Jesus nagsiring: ‘Oo, ako.’ Hi Caifas nagsiring: ‘Diri na naton kinahanglan hin dugang nga ebidensya. Pasipara ini!’ Umuyon an korte: ‘Ini nga tawo kinahanglan mamatay.’ Gintampalo  nira hi Jesus, gintuprahan, gintahoban an nawong, ginsuntok, ngan ginsidngan: ‘Kon propeta ka, sumati kami kon hin-o an nagsuntok ha imo!’

Pagkaaga, gindara nira hi Jesus ha Sanhedrin ngan ginpakianhan utro: ‘Ikaw ba an Anak han Dios?’ Hi Jesus binaton: ‘Ikaw mismo an nagsiring.’ Tapos, nagdesisyon hira nga nakasala hiya hin pagpasipara ngan gindara hiya ha palasyo ni Ponsio Pilato, an gobernador han Roma. Ano an sunod nga nahitabo? Kitaon naton.