Ha Cesarea, may importante nga Romano nga opisyal han mga sundalo nga Cornelio an ngaran. Bisan kon diri hiya Judio, ginrirespeto hiya han mga Judio. Mabinuligon hiya ha mga pobre ngan mga nanginginahanglan. Natoo hiya kan Jehova ngan pirme nag-aampo ha iya. Usa ka adlaw, may anghel nga nagpakita kan Cornelio ngan nagsiring: ‘Ginpamatian han Dios an imo mga pag-ampo. Yana, pagsugo hin mga lalaki ngadto ha syudad han Jope, diin aadto hi Pedro, ngan pakanhia hiya.’ Nagsugo dayon hi Cornelio hin tulo nga lalaki ngadto ha Jope, nga mga 30 ka milya tipa-sur.

Ha Jope, nagkaada bisyon hi Pedro. Nakakita hiya hin mga hayop nga diri puydi kaunon han mga Judio ngan may tingog nga nagsiring nga kaunon niya ito. Nagdumiri hi Pedro: ‘Pero waray pa gud ako kumaon hin mahugaw nga hayop ha bug-os ko nga kinabuhi.’ An tingog nagsiring: ‘Ayaw pagtawaga nga mahugaw ini nga mga hayop. Ginlimpyohan na ini han Dios.’ Ginsidngan liwat hi Pedro: ‘May tulo nga lalaki ha imo purtahan. Upod ha ira.’ Gin-abrihan ni Pedro an purtahan ngan ginpakianhan an mga lalaki kon ano an ira tuyo. Binaton hira: ‘Ginsugo kami ni Cornelio nga Romano nga opisyal han mga sundalo. Ginpapakadto ka niya ha iya balay  ha Cesarea.’ Ginsidngan ni Pedro an mga lalaki nga kumaturog ha iya balay hito nga gab-i sugad nga iya bisita. Kinabuwasan, inupod hiya pakadto ha Cesarea pati an pipira nga kabugtoan ha Jope.

Han nakita ni Cornelio hi Pedro, linuhod hiya. Pero nagsiring hi Pedro: ‘Buhat! Tawo la ako pariho ha imo. Ginpakanhi ako han Dios ha imo balay, bisan kon an mga Judio diri nasulod ha balay han mga Hentil. Yana, alayon sumati ako kon kay ano nga ginpakanhi mo ako.’

Hi Cornelio nagsiring kan Pedro: ‘Upat ka adlaw na an naglabay, han nag-aampo ako ha Dios, may anghel nga nagsiring ha akon nga magsugo ako hin kalalakin-an basi pakanhion ka. Alayon tutdui kami han mga pulong ni Jehova.’ Hi Pedro nagsiring: ‘Nasasabtan ko na yana nga an Dios waray pinaurog. Ginkakarawat niya an bisan hin-o nga karuyag magsingba ha iya.’ Damu an igintutdo ni Pedro ha ira mahitungod kan Jesus. Katapos, hi Cornelio ngan an iya mga kaupod nakakarawat hin baraan nga espiritu, ngan hira ngatanan nabawtismohan.