Usa ka adlaw han nag-uusahan hi Eva, may halas nga nakiistorya ha iya. Ito nagsiring: ‘Tinuod ba nga diri kamo ginpapakaon han Dios han bunga han ngatanan nga kahoy?’ Hi Eva binaton: ‘Puydi kami kumaon labot la han bunga han usa nga kahoy. Kon kumaon kami hito, mamamatay kami.’ An halas nagsiring: ‘Diri kamo mamamatay. Ngani, kon kumaon kamo hito, magigin pariho kamo ha Dios.’ Tinuod ba ito? Diri, buwa ito. Pero tumoo hito hi Eva. Samtang mas ginkikinita niya an bunga, mas naruyag hiya pagkaon hito. Kumaon hiya hito ngan gintagan hi Adan. Maaram hi Adan nga mamamatay hira kon diri nira sugton an Dios. Pero, kumaon la gihap hiya.

Pagtikatunod han adlaw, nakiistorya hi Jehova kanda Adan ngan Eva. Iya ginpakianhan hira kon kay ano nga waray nira hiya sugta. Ginbasol ni Eva an halas, ngan ginbasol ni Adan hi Eva. Tungod kay waray hira sumugot, ginpaiwas hira ni Jehova ha garden. Basi diri na hira makabalik, nagbutang hi Jehova hin mga anghel ngan hin naglalaga nga espada ha entrada hito.

Hi Jehova nagsiring nga sisirotan liwat niya an nagbuwa kan Eva. Ha tinuod, diri an halas an nakiistorya kan Eva. Waray maghimo hi Jehova hin halas nga nakakayakan. May maraot nga anghel nga nagpahinabo nga makayakan an halas. Iya ini ginbuhat basi limbongan hi Eva. Hiya hi Satanas nga Yawa. Ha tidaraon, bubungkagon hiya ni Jehova basi diri na niya malimbongan an mga tawo ha pagbuhat hin maraot.