Gintutdoan ni Abraham an iya anak nga hi Isaac nga higugmaon hi Jehova ngan sumarig ha ngatanan nga saad ni Jehova. Pero han mga 25 anyos na hi Isaac, may iginpabuhat hi Jehova kan Abraham nga makuri gud himoon. Ano ito?

An Dios nagsiring kan Abraham: ‘Alayon dad-a an imo bugtong nga anak ngan ihalad hiya didto ha usa nga bukid ha Moria.’ Diri maaram hi Abraham kon kay ano nga iginsugo ito ha iya ni Jehova. Bisan pa hito, sumugot hiya.

Temprano pa han kinabuwasan, igin-upod ni Abraham hi Isaac ngan an iya duha nga surugoon pakadto ha Moria. Paglabay hin tulo ka adlaw, nakikita na nira an kabukiran tikang ha hirayo. Ginsidngan ni Abraham an iya mga surugoon nga hulaton hira kay masagka hira ni Isaac basi maghalad. Iya ginpadara hi Isaac hin sungo ngan nagdara hiya hin kutsilyo. Hi Isaac nagpakiana ha iya tatay: ‘Hain an hayop nga aton ighahalad?’ Hi Abraham binaton: ‘Anak, hi Jehova an magtatagana hito.’

Pag-abot ha bukid, naghimo hira hin halaran. Katapos, gin-gapos ni Abraham an mga kamot ngan mga tiil ni Isaac ngan iginbutang hiya ha halaran.

Ginkuha ni Abraham an kutsilyo. Hito nga takna, usa nga anghel ni Jehova an nagyakan tikang ha langit: ‘Abraham! Ayaw pataya an bata! Yana maaram na ako nga may pagtoo ka ha Dios kay andam ka nga ihalad an imo anak.’ Katapos, nakakita  hi Abraham hin lalakí nga karnero nga an mga sungay nasangot ha tanom. Ginbadbaran dayon niya hi Isaac, ngan iginhalad an karnero.

Tikang hito nga adlaw, gintawag ni Jehova hi Abraham nga iya sangkay. Maaram ka kon kay ano? Ginbuhat ni Abraham an bisan ano nga sugo ha iya ni Jehova, bisan han diri niya nasasabtan kon kay ano nga iginpapabuhat ito ha iya.

Gin-utro ni Jehova an iya saad kan Abraham: ‘Bibendisyonan ko ikaw, ngan papadamuon ko an imo mga anak, o tulin.’ Iginpapasabot hini nga bibendisyonan ni Jehova an ngatanan nga maopay nga tawo pinaagi han pamilya ni Abraham.