Katapos han Baha, an mga anak ni Noe ngan an ira asawa nagkaada damu nga anak. Nagdaku an ira mga pamilya, ngan umukoy hira ha iba-iba nga dapit han tuna, sugad han iginsugo ha ira ni Jehova.

Pero may mga pamilya nga waray sumugot kan Jehova. Hira nagsiring: ‘Pagtukod kita hin syudad ngan dinhi kita pag-ukoy. Maghihimo kita hin hitaas gud nga torre nga maabot ha langit. Ngan magigin kilala kita.’

 Waray malipay hi Jehova ha ira ginbuhat, salit nagdesisyon hiya nga paundangon hira. Maaram ka ba kon ano an iya ginbuhat? Iya ginpahinabo nga magin iba-iba an ira yinaknan. Tungod kay diri na nira nasasabtan an kada usa, ira gin-undang an pagtukod. An syudad nga ira gintikangan pagtukod nagin kilala ha tawag nga Babel, nga nangangahulogan hin “Kasamok.” An mga tawo nagtikang bumalhin ngan nag-ukoy ha iba-iba nga bahin han tuna. Pero padayon hira nga nagbuhat hin maraot ha ira ginbalhinan nga mga lugar. May-ada pa ba nahigugma kan Jehova? Kitaon naton ha sunod nga leksyon.