Mga duha ka bulan katapos bumaya ha Ehipto an mga Israelita, inabot hira ha Bukid Sinai ngan nagkampo didto. Hi Moises sinagka ha bukid, ngan didto gintawag hiya ni Jehova ngan ginsidngan: ‘Gintalwas ko an mga Israelita. Kon susugton nira ako ngan susundon an akon mga balaud, magigin espesyal nga katawohan ko hira.’ Katapos, lumusad hi Moises ngan iginsumat ha mga Israelita an ginyakan ni Jehova. Ano an ira baton? Hira nagsiring: ‘Bubuhaton namon an ngatanan nga sugo ni Jehova ha amon.’

Sinagka utro hi Moises ha bukid. Didto, hi Jehova nagsiring: ‘Ha ikatulo ka adlaw, makikiistorya ako ha imo. Pahamangnoi an katawohan nga diri sumaka ha Bukid Sinai.’ Lumusad hi Moises ngan ginsidngan an mga Israelita nga mangandam para mamati han isisiring ni Jehova.

Han ikatulo ka adlaw, nakita han mga Israelita nga nagkikinidlat ha bukid ngan may masirom nga dampog. Nakabati liwat hira hin makusog nga mga dalugdog ngan tunog hin trumpeta nga hinimo ha sungay. Katapos, lumusad hi Jehova ha bukid pinaagi hin kalayo. An mga Israelita nangurog ha sobra nga kahadlok. An bug-os nga bukid nabay-og hin makusog ngan naputos hin aso. Ngan an tunog han trumpeta mas nagtikakusog. Katapos, an Dios nagsiring: ‘Ako hi Jehova. Diri kamo magsingba ha iba nga dios.’

Hi Moises bumalik ha bukid. Didto, iginhatag ha iya ni Jehova an mga balaud para ha mga Israelita mahitungod ha kon ano an husto nga paagi ha pagsingba ha Dios ngan kon ano an kinahanglan nira magin panggawi. Iginsurat ni Moises an mga balaud, katapos ginbasa niya ito ha mga Israelita. Hira nagsaad: ‘Bubuhaton namon an ngatanan nga sugo ni Jehova ha amon.’ Oo, nagsaad hira ha Dios. Pero tutumanon daw la nira ito?