Paglabay han panahon, bumaya na liwat an mga Israelita kan Jehova ngan nagsingba ha buwa nga mga dios. Ha sulod hin pito ka tuig, ginkinawat han mga Midianitanhon an ira mga hayop ngan gindaot an ira mga tanom. Basi makapalagiw hira ha mga Midianitanhon, nagtago hira ha mga lungib ngan kabukiran. Nakimalooy hira kan Jehova nga talwason hira. Salit nagsugo hi Jehova hin anghel ngadto ha batan-on nga hi Gideon. An anghel nagsiring: ‘Ginpili ka ni Jehova basi magin makusog nga girriro.’ Hi Gideon nagpakiana: ‘Paonan-o ko matatalwas an Israel? Ordinaryo la ako nga tawo.’

Paonan-o masisiguro ni Gideon nga ginpili hiya ni Jehova? Nagbutang hiya ha tuna hin barahibo hin karnero ngan nagsiring kan Jehova: ‘Ha aga, kon an barahibo mahulos han tun-og pero mamara an tuna, karuyag sidngon, karuyag mo nga talwason ko an Israel.’ Kinabuwasan, mahulos gud an barahibo pero mamara an tuna! Kondi naghangyo hi Gideon nga pagkabuwas han aga, magin mamara an barahibo pero mahulos an tuna. Han nahitabo ito, nakombinse hiya nga ginpili hiya ni Jehova. Gintirok niya an iya kasundalohan basi makig-away ha mga Midianitanhon.

 Hi Jehova nagsiring kan Gideon: ‘Padadaugon ko an mga Israelita. Pero tungod kay damu gud an imo kasundalohan, bangin maghunahuna kamo nga nagdaog kamo tungod ha iyo pangalimbasog. Sidnga an mga nahahadlok nga umuli hira.’ Salit 22,000 nga sundalo an inuli, ngan 10,000 an nagpabilin. Hi Jehova nagsiring: ‘Damu la gihap an kasundalohan. Dad-a hira ha salog ngan painoma hin tubig didto. Pilia la adton mga mabinantayon ha mga kaaway samtang nainom.’ Tresyentos la an nagpabilin nga alerto samtang nainom. Hi Jehova nagsaad nga mapipirde hinin gutiay la nga kasundalohan an 135,000 nga Midianitanhon nga kasundalohan.

Pagkagab-i, hi Jehova nagsiring kan Gideon: ‘Sulonga na niyo an mga Midianitanhon!’ Gintagan ni Gideon an iya kasundalohan hin mga trumpeta nga sungay ngan dagku nga tibod nga may sulod nga sulo. Hiya nagsiring: ‘Kitaa niyo ako, ngan subara an akon bubuhaton.’ Ginpatunog ni Gideon an iya trumpeta, ginbuong an tibod, gin-abyog an sulo, ngan gumuliat: ‘An espada ni Jehova ngan ni Gideon!’ Ginhimo liwat ito han iya 300 nga kasundalohan. Nahadlok an mga Midianitanhon ngan nagdadlagan ha iba-iba nga direksyon. Tungod ha kasamok, gin-atake nira an usa kag usa. Ginbuligan utro ni Jehova an mga Israelita nga mapirde an ira mga kaaway.