LEKSYON 01
Paonan-o Ka Mabubuligan han Biblia?
Haros kita ngatanan may mga pakiana mahitungod ha kinabuhi, pag-antos, kamatayon, ngan ha aton kabubuwason. May-ada liwat kita nababarak-an ha adlaw-adlaw, sugad han kon paonan-o magpapakabuhi o magkakaada malipayon nga pamilya. Nakita han damu nga an Biblia diri la kay nakakabulig ha ira nga mabaton an importante nga mga pakiana kondi naghahatag liwat ito hin praktikal nga sagdon para ha adlaw-adlaw nga pagkinabuhi. Pagkita mo, makakabulig ba an Biblia ha kada tagsa ha aton?
1. Ano an pipira nga pakiana nga ginbabaton han Biblia?
Ginbabaton han Biblia ini nga importante nga mga pakiana: Paonan-o nagtikang an kinabuhi? Ano an katuyoan han kinabuhi? Kay ano nga nag-aantos an inosente nga mga tawo? Ano an nahitatabo kon namamatay an tawo? Kon an ngatanan naruruyag hin kamurayawan, kay ano nga damu man an girra? Ano an mahitatabo ha tuna ha tiarabot? Diri sayop an pagpakiana hin sugad hito, ngan minilyon an nakaagi hin makakombinse nga baton ha Biblia.
2. Paonan-o makakabulig ha aton an Biblia nga magin malipayon ha kada adlaw?
An Biblia naghahatag ha aton hin mag-opay nga sagdon. Pananglitan, gintututdoan hito an mga pamilya kon paonan-o magigin tinuod nga malipayon. Nagsasagdon ito kon ano an bubuhaton kon naiistres ngan kon paonan-o malilipay ha aton trabaho. Mahibabaroan mo kon ano an igintututdo han Biblia mahitungod hini nga mga topiko ngan han iba pa samtang gin-aadman naton ini nga publikasyon. Kon padayon mo nga bubuhaton ini, makukombinse ka nga “an ngatanan nga Kasuratan [an ngatanan nga aada ha Biblia] . . . mapulsanon.”—2 Timoteo 3:16.
Ini nga publikasyon diri kasaliwan han Biblia. Lugod, gin-aaghat ka hini nga usisahon mo mismo an Biblia. Salit alayon basaha an mga teksto ha Biblia nga makikita ha kada leksyon ngan ikompara ito ha imo nahibabaroan.
DUGANG NGA USISAHA
Hibaroi kon paonan-o an Biblia nakakabulig ha mga tawo, kon paonan-o mo ma-i-enjoy an pagbasa hito, ngan kon kay ano nga maopay nga magpabulig para masabtan ito.
3. An Biblia makakaggiya ha aton
An Biblia pariho hin malamrag nga ispat. Makakabulig ito nga makahimo kita hin mag-opay nga desisyon ngan mahibaroan an mahitatabo ha tiarabot.
Basaha an Salmo 119:105, katapos, hisguti niyo ini nga mga pakiana:
-
Ano an panhunahuna han nagsurat hini nga salmo mahitungod ha Biblia?
-
Ano an imo panhunahuna ha Biblia?
4. An Biblia makakabaton han aton mga pakiana
Nasabtan han usa nga babaye nga ginbabaton han Biblia an mga pakiana nga damu ka tuig na niya nga ginhinunahuna. I-play an VIDEO, katapos, hisguti niyo an masunod nga mga pakiana.
-
Ha video, ano nga klase hin mga pakiana an iginpakiana hini nga babaye?
-
Paonan-o nakabulig ha iya an pag-aram ha Biblia?
Gin-aaghat kita han Biblia nga magpakiana. Basaha an Mateo 7:7, katapos, hisguti niyo an masunod:
-
Ano nga imo mga pakiana an puydi mabaton han Biblia?
5. Puydi mo ma-enjoy an pagbasa ha Biblia
Damu nga tawo an nag-i-enjoy ha pagbasa ha Biblia ngan nagpapahimulos hira hito. I-play an VIDEO, katapos, hisguti niyo an masunod nga mga pakiana.
-
Ha video, ano an gin-abat han mga batan-on mahitungod ha pagbasa?
-
Kay ano nga naruyagan na nira an pagbasa ha Biblia?
An Biblia nasiring nga may-ada ito instruksyon nga makakahatag ha aton hin pagliaw ngan paglaom. Basaha an Roma 15:4, katapos, hisguti niyo ini nga pakiana:
-
Interesado ka ba hini nga saad han Biblia nga pagliaw ngan paglaom?
6. Mabubuligan kita han iba nga masabtan an Biblia
Labot la han personal nga pagbasa ha Biblia, nakita han damu nga makakabulig liwat an pagpatutdo ha iba. Basaha an Buhat 8:26-31, katapos, hisguti niyo ini nga pakiana:
-
Paonan-o naton masasabtan an Biblia?—Kitaa an bersikulo 30 ngan 31.
An lalaki nga taga-Etiopia nagkinahanglan hin bulig para masabtan an Kasuratan. Nakita han damu yana nga makakabulig liwat an pagpatutdo ha iba mahitungod ha Biblia
AN IBA NASIRING: “Pagkarag la hin panahon an pag-aram ha Biblia.”
-
Ano an imo opinyon? Kay ano?
SUMARYO
An Biblia may sagdon para ha adlaw-adlaw nga pagkinabuhi, may mga baton ha importante nga mga pakiana, ngan naghahatag hin pagliaw ngan paglaom ha mga tawo.
Repaso
-
Ano nga klase hin sagdon an aada ha Biblia?
-
Ano an pipira nga pakiana nga ginbabaton han Biblia?
-
Ano an karuyag mo mahibaroan ha Biblia?
DUGANG NGA IMPORMASYON
Hibaroi kon kay ano nga an mga sagdon han Biblia praktikal pa yana.
“Katutdoan han Biblia—Diri Nadadaan nga Kinaadman” (An Barantayan Num. 1 2018)
Kitaa kon paonan-o nakabulig an Biblia ha lalaki nga may negatibo nga panhunahuna tikang pa ha kabata.
Kon Paonan-o Nagtikang an Akon Bag-o Ngan Malipayon nga Kinabuhi (2:53)
Usisaha an praktikal nga mga sagdon han Biblia para ha pamilya.
“12 nga Sekreto han Malipayon nga Pamilya” (Pagpamata! Num. 2 2018)
Hibaroi kon paonan-o gintatadong han Biblia an sayop nga ideya parte ha kon hin-o gud an nagmamando ha kalibotan.
Kay Ano nga Kinahanglan Pag-adman an Biblia?—Bug-os nga Video (3:13)
Bangin Maruyagan Mo Liwat
KOMON NGA MGA PAKIANA
Ano an Pag-aram ha Biblia nga Igintatanyag han mga Saksi ni Jehova?
Ha libre nga interactive nga programa nga igintatanyag han mga Saksi ni Jehova, puydi mo gamiton an bisan ano nga bersyon han Biblia. Ayaw pag-alang nga paupdon an imo bug-os nga pamilya o an imo kasangkayan.
