LEKSYON 18
Kon Paonan-o Makikilala an Tinuod nga mga Kristiano
Binilyon nga tawo an nasiring nga mga Kristiano hira. Pero iba-iba an ira gintotoohan ngan iba-iba nga mga prinsipyo an ira ginsusunod. Salit paonan-o naton makikilala an tinuod nga mga Kristiano?
1. Ano an Kristiano?
An mga Kristiano mga disipulo, o sumurunod ni Jesu-Kristo. (Basaha an Buhat 11:26.) Paonan-o nira ginpapamatud-an nga mga disipulo hira ni Jesus? Nagsiring hiya: “Kon magpabilin kamo ha akon pulong, mga disipulo ko gud kamo.” (Juan 8:31) Karuyag sidngon, an tinuod nga mga Kristiano kinahanglan nasunod ha katutdoan ni Jesus. Pirme igintututdo ni Jesus kon ano an ginsisiring han Biblia. Iginbabase liwat ha Biblia han tinuod nga mga Kristiano an ira gintotoohan.—Basaha an Lucas 24:27.
2. Paonan-o an tinuod nga mga Kristiano nagpapakita hin gugma?
Hi Jesus nagsiring ha iya mga sumurunod: ‘Higugmaa niyo an usa kag usa sugad la han paghigugma ko ha iyo.’ (Juan 15:12) Paonan-o iginpakita ni Jesus nga hinigugma niya an iya mga disipulo? Naggahin hiya hin panahon para makaupod hira, ginparig-on hira, ngan ginbuligan hira. Iginhatag pa ngani niya an iya kinabuhi para ha ira. (1 Juan 3:16) Ha pariho nga paagi, an tinuod nga mga Kristiano diri la nag-iistorya mahitungod ha gugma. Iginpapakita nira ha ira mga pulong ngan buhat nga hinigugma nira an usa kag usa.
3. Ha ano nga buruhaton okupado an tinuod nga mga Kristiano?
May iginhatag hi Jesus nga buruhaton ha iya mga disipulo. “Ginsugo niya hira nga magsangyaw han Ginhadian han Dios.” (Lucas 9:2) An siyahan nga mga Kristiano nagsangyaw, diri la ha mga lugar diin hira nagsisingba, kondi pati liwat ha iba pa nga panpubliko nga mga lugar ngan ha mga balay. (Basaha an Buhat 5:42; 17:17.) Yana, an tinuod nga mga Kristiano nagsasangyaw liwat han mga kamatuoran ha Biblia ha bisan diin nga may mga tawo. Hinigugma nira an ira igkasi-tawo, salit nalilipay hira nga gamiton an ira panahon ngan kusog basi isumat an mensahe han Biblia nga paglaom ngan pagliaw.—Marcos 12:31.
DUGANG NGA USISAHA
Usisaha kon ano an kaibahan han tinuod nga mga Kristiano ha mga tawo nga diri nasunod ha katutdoan ngan ehemplo ni Jesus.
4. Ginbibiling nira an mga kamatuoran ha Biblia
An siyahan nga mga Kristiano nagpabili ha Pulong han Dios
Diri ngatanan nga tawo nga nasiring nga mga Kristiano hira nagpapabili han mga kamatuoran ha Biblia. I-play an VIDEO, katapos, hisguti niyo an masunod nga pakiana.
-
Ano an ginhimo han pipira nga singbahan nga nasiring nga mga Kristiano hira basi pugngan an mga tawo nga mahibaroan an mga igintutdo ni Jesus?
Igintutdo ni Jesus an kamatuoran tikang ha Pulong han Dios. Basaha an Juan 18:37, katapos, hisguti niyo ini nga pakiana:
-
Sumala kan Jesus, paonan-o naton makikilala an mga Kristiano nga “nadapig ha kamatuoran”?
5. Ginsasangyaw nira an mga kamatuoran ha Biblia
An siyahan nga mga Kristiano nagsangyaw ha iba
Antes hi Jesus sumaka ha langit, may iginsugo hiya nga buruhaton ha iya mga sumurunod nga nagpapadayon tubtob yana. Basaha an Mateo 28:19, 20 ngan Buhat 1:8, katapos, hisguti niyo ini nga pakiana:
-
Tubtob san-o magpapadayon an ira pagsangyaw ngan tubtob diin ito makakaabot?
6. Ginbubuhat nira kon ano an ira iginsasangyaw
Ano an nakakombinse ha lalaki nga hi Tom nga nabilngan na niya an tinuod nga Kristianidad? I-play an VIDEO, katapos, hisguti niyo an masunod nga mga pakiana.
-
Ha video, kay ano nga nawad-an hi Tom hin pagsarig ha relihiyon?
-
Kay ano nga kombinsido hiya nga nabilngan na niya an kamatuoran?
An aton ginbubuhat mas importante kay han aton ginyayakan. Basaha an Mateo 7:21, katapos, hisguti niyo ini nga pakiana:
-
Ano an mas importante kan Jesus—an aton ginsisiring nga aton gintotoohan o an aton ginpapamatud-an pinaagi han aton mga buhat?
7. Hinigugma nira an usa kag usa
An siyahan nga mga Kristiano nahigugma ha usa kag usa
Iginbubutang gud ba han mga Kristiano ha peligro an ira kinabuhi para ha ira mga igkasi-Kristiano? I-play an VIDEO, katapos, hisguti niyo an masunod nga mga pakiana.
-
Ha video, ano an nagpagios kan Lloyd nga ibutang ha peligro an iya kinabuhi para kan Bugto Johansson?
-
Ha imo hunahuna, gumios ba hiya sugad nga tinuod nga Kristiano?
Basaha an Juan 13:34, 35, katapos, hisguti niyo ini nga mga pakiana:
-
Ano an angay nga magin pagtratar han mga disipulo ni Jesus (tinuod nga mga Kristiano) ha mga tawo nga tikang ha iba nga lahi o nasud?
-
Paonan-o nira ito ginbubuhat ha panahon nga may girra?
AN IBA NASIRING: “An mga Kristiano nagbubuhat hin magraot nga butang, salit paonan-o hira nagin tinuod nga relihiyon?”
-
Ano nga teksto an puydi mo basahon nga nagpapakita kon paonan-o naton makikilala an tinuod nga mga Kristiano?
SUMARYO
An tinuod nga mga Kristiano nasunod han mga katutdoan ha Biblia, nagpapakita hin gugma nga andam magsakripisyo, ngan nagsasangyaw han mga kamatuoran ha Biblia.
Repaso
-
Diin iginbabase han tinuod nga mga Kristiano an ira mga gintotoohan?
-
Ano nga kalidad an pangirilal-an han tinuod nga mga Kristiano?
-
Ano an buruhaton han tinuod nga mga Kristiano?
DUGANG NGA IMPORMASYON
Mahibaro hin dugang mahitungod ha usa nga grupo nga nangangalimbasog nga sundon an ehemplo ngan katutdoan ni Jesu-Kristo.
Hibaroi kon paonan-o an usa nga madre hadto nakabiling hin “kabugtoan ha pagtoo.”
“Ira Gin-gamit an Biblia ha Pagbaton han Ngatanan Ko nga Pakiana!” (An Barantayan, Hulyo 1, 2014)
Kitaa kon paonan-o an tinuod nga mga Kristiano nagpakita hin gugma ha ira mga igkasi-tumuroo nga nanginginahanglan hin bulig.
Pagbulig ha Aton Kabugtoan ha Panahon han Kalamidad—Excerpt (3:57)
Usisaha kon paonan-o an siyahan nga mga Kristiano ngan an tinuod nga mga Kristiano yana nagpakita han ginsiring ni Jesus nga pangirilal-an han iya mga sumurunod.
“Ano an Pangirilal-an han Tinuod nga mga Kristiano?” (An Barantayan, Marso 1, 2012)
Bangin Maruyagan Mo Liwat
KOMON NGA MGA PAKIANA
Ano an Pag-aram ha Biblia nga Igintatanyag han mga Saksi ni Jehova?
Ha libre nga interactive nga programa nga igintatanyag han mga Saksi ni Jehova, puydi mo gamiton an bisan ano nga bersyon han Biblia. Ayaw pag-alang nga paupdon an imo bug-os nga pamilya o an imo kasangkayan.
