Hi Jehova organisado nga Dios. (1 Corinto 14:33) Salit makakalaom kita nga an iya katawohan organisado liwat. Paonan-o gin-oorganisar an Kristiano nga kongregasyon? Ano an aton maibubulig basi maglampos ito?

1. Hin-o an ulo han kongregasyon?

“An Kristo amo an ulo han kongregasyon.” (Efeso 5:23) Tikang ha langit, iya ginpapangunahan an mga buruhaton han katawohan ni Jehova ha bug-os nga kalibotan. Ginpili ni Jesus “an matinumanon ngan maaramon nga uripon”—usa nga gutiay nga grupo han hamtong nga mga tigurang nga gintatawag liwat nga Nagmamando nga Lawas. (Basaha an Mateo 24:45-47.) Pariho han siyahan-siglo nga mga apostol ngan mga tigurang ha Jerusalem, an Nagmamando nga Lawas naggigiya ha mga kongregasyon ha bug-os nga kalibotan. (Buhat 15:2) Pero ini nga kalalakin-an diri mga lider han amon organisasyon. Nagpapagiya hira kan Jehova ngan ha iya Pulong, ngan nagpapasakop ha pagkaulo ni Jesus.

2. Ano an papel han mga tigurang?

An mga tigurang mga hamtong nga Kristiano nga kalalakin-an nga nagtututdo tikang ha Kasuratan ngan nag-aataman ha katawohan ni Jehova pinaagi ha pagbulig ngan pagparig-on ha ira. Waray hira sweldo. Ira “kinaburut-on nga ginbubuhat ito ha atubangan han Dios; diri tungod ha kahakog nga makabentaha ha diri tangkod nga paagi, lugod tungod han hingyap nga magserbi.” (1 Pedro 5:1, 2) An mga tigurang ginbubuligan han ministeryal nga mga surugoon, nga ha urhi puydi liwat magin kwalipikado sugad nga mga tigurang.

Gintutokahan han Nagmamando nga Lawas an pipira nga tigurang basi magin mga paramangno han sirkito. Nabisita hira ha iba-iba nga kongregasyon basi giyahan ngan parig-unon an kabugtoan. Nagtutoka hira hin mga tigurang ngan ministeryal nga mga surugoon nga nakakaabot han kwalipikasyon ha Kasuratan.—1 Timoteo 3:1-10, 12; Tito 1:5-9.

3. Ano an papel han tagsa nga Saksi?

An ngatanan ha kongregasyon ‘nagdadayaw han ngaran ni Jehova’ pinaagi ha pakigbahin ha mga katirok ha kongregasyon ngan ha ministeryo uyon ha ira kahimtang.—Basaha an Salmo 148:12, 13.

 DUGANG NGA USISAHA

4. Hi Jesus usa nga nakakarepresko nga lider

Hi Jesus may makaruruyag nga imbitasyon ha aton. Basaha an Mateo 11:28-30, katapos, hisguti niyo ini nga pakiana:

• Ano nga klase hin lider hi Jesus, ngan ano an iya karuyag nga abaton naton?

5. An mga tigurang nagtututdo pinaagi han ira ehemplo

1. Padayon nga ginpaparig-on han mga tigurang an ira espirituwalidad ngan an espirituwalidad han ira pamilya

2. Ginpapanginano han mga tigurang an ngatanan ha kongregasyon

3.   An mga tigurang regular nga nagsasangyaw

4. An mga tigurang mga magturutdo. Nabulig liwat hira ha paglimpyo ngan ha iba nga mga buruhaton

6. Puydi kita makigkooperar ha mga tigurang

An Biblia naghahatag ha aton hin importante nga rason ha pakigkooperar ha mga tigurang. Basaha an Hebreo 13:17, katapos, hisguti niyo ini nga mga pakiana:

• Makatadunganon ba an igin-aaghat ha aton han Biblia nga magin masinugtanon ngan magin mapinasakupon ha mga nangunguna? Kay ano?

Basaha an Lucas 16:10, katapos, hisguti niyo ini nga pakiana:

• Kay ano nga importante nga makigkooperar ha mga tigurang bisan ha baga hin gudtiay la nga mga butang?

 SUMARYO

Hi Jesus an ulo han kongregasyon. Nalilipay kita makigkooperar ha mga tigurang nga nagpapasakop ha iya tungod kay nakakarepresko hira ngan nagtututdo pinaagi han ira ehemplo.

Repaso

• Hin-o an ulo han kongregasyon?

• Paonan-o an mga tigurang nabulig ha kongregasyon?

• Ano an papel han tagsa nga nagsisingba kan Jehova?