LEKSYON 22
Paonan-o Mo Maisasangyaw an Maopay nga Sumat?
Samtang nahibabaro ka han mga kamatuoran ha Biblia, bangin maghunahuna ka, ‘Kinahanglan mahibaro hini an ngatanan!’ Oo, kinahanglan hibaroan ini han ngatanan! Pero bangin kulbaon ka pagsumat ha iba han imo nahibabaroan. Hisgotan naton kon paonan-o mo malalamposan an imo kulba ngan kon paonan-o mo maisasangyaw hin malipayon an maopay nga sumat ha Biblia.
1. Paonan-o mo maisusumat an imo nahibabaroan ha imo mga kakilala?
An mga disipulo ni Jesus nagsiring: “Diri namon mahihimo nga umundang ha pagyakan mahitungod han mga butang nga amon nakita ngan nabatian.” (Buhat 4:20) Naruyagan gud nira an kamatuoran salit karuyag nira nga isumat ito ha pinakadamu nga tawo tubtob ha ira mahihimo. Ito ba liwat an imo inaabat? Kon oo, pamiling hin mga higayon nga matinalahuron nga maisusumat mo ha imo kapamilya ngan kasangkayan an imo nahibabaroan.—Basaha an Colosas 4:6.
Pipira nga paagi para makagtikang
-
Kon nakikiistorya ha imo kapamilya, tikangi an usa nga topiko ha Biblia pinaagi ha pagsiring: “May makapainteres ako nga nahibaroan yana nga semana.”
-
Pagsumat hin makaparig-on nga teksto ha imo sangkay nga may sakit o nababaraka.
-
Kon may mga katrabaho ka nga mangumusta ha imo, isumat ha ira kon ano an imo nahibaroan ha imo pag-Bible study o ha katirok ha kongregasyon.
-
Ipakita ha imo kasangkayan an jw.org nga website.
-
Imbitara an iba nga umapi ha imo pag-Bible study o ipakita ha ira kon paonan-o magri-request hin Bible study ha jw.org.
2. Kay ano nga an pagsangyaw kaupod han kongregasyon mapulsanon nga tumong?
An mga disipulo ni Jesus nagsangyaw han maopay nga sumat diri la ha ira mga kakilala. Ginsugo hira ni Jesus nga “tagduha-duha basi mag-una ha iya ngadto ha tagsa nga syudad” para magsangyaw. (Lucas 10:1) Ito nga organisado nga paagi han pagsangyaw naghatag ha mas damu pa nga tawo hin higayon nga mabatian an maopay nga sumat. An pagsangyaw nga may kaupod naghatag liwat hin daku nga kalipay ha mga disipulo. (Lucas 10:17) Puydi mo ba liwat himoon nga tumong nga magsangyaw kaupod han kongregasyon?
DUGANG NGA USISAHA
Usisaha kon paonan-o mo malalamposan an kulba ngan aabaton an kalipay tungod han pagsangyaw han maopay nga sumat.
3. Hi Jehova maupod ha imo
An iba nga karuyag magsangyaw bangin kulbaon kon ano an sisidngon o magigin reaksyon han ira ginsasangyawan.
-
Ginkukulba ka ba ha pagsumat han imo nahibabaroan? Kay ano?
I-play an VIDEO, katapos, hisguti niyo an masunod nga pakiana.
-
Paonan-o nalamposan hini nga batan-on nga mga Saksi an ira kahadlok?
Basaha an Isaias 41:10, katapos, hisguti niyo ini nga pakiana:
-
Kon nahahadlok ka pagsangyaw, kay ano nga angay ka mag-ampo?
Maaram ka ba?
Damu nga Saksi ni Jehova an naghunahuna hadto nga diri gud nira kaya igsangyaw ha iba an maopay nga sumat. Pananglitan, hi Sergey naabat nga waray hiya pulos ngan nakukurian hiya ha pakiistorya ha iba. Pero nag-aram hiya han Biblia. Hiya nagsiring: “Bisan kon nahadlok ako, nagtikang ako pag-istorya ha iba han akon nahibabaroan. Nahipausa gud ako kay an pagsumat ha iba mahitungod ha Biblia nakabulig lugod ha akon nga magkaada kompyansa ha kalugaringon. Ngan tungod hito naparig-on liwat an akon pagtoo.”
4. Magin matinalahuron
Kon nagsasangyaw han maopay nga sumat, hunahunaa diri la kon ano an imo isisiring, kondi kon paonan-o mo liwat ito isisiring. Basaha an 2 Timoteo 2:24 ngan 1 Pedro 3:15, katapos, hisguti niyo ini nga mga pakiana:
-
Paonan-o mo iaaplikar ini nga mga teksto kon nakikiistorya ha iba mahitungod ha Biblia?
-
An imo iba nga kapamilya o kasangkayan bangin diri umuyon ha imo. Ano an puydi mo buhaton? Ano an diri mo angay buhaton?
-
Kay ano nga bangin mas maopay nga magpakiana ha mataktika nga paagi imbes nga ipirit ha ira an ginsisiring han Biblia?
5. An pagsangyaw han maopay nga sumat naghahatag hin kalipay
Hi Jehova an nagsugo kan Jesus nga isangyaw an maopay nga sumat. Ano an panhunahuna ni Jesus hito nga buruhaton? Basaha an Juan 4:34, katapos, hisguti niyo ini nga mga pakiana:
-
An pagkaon hin masustansya nga pagkaon nakakabulig ha aton nga magin mahimsog ngan malipayon. Kay ano nga iginpariho ni Jesus an pagbuhat han kaburut-on han Dios—upod na an pagsangyaw han maopay nga sumat—ha pagkaon?
-
Ha imo hunahuna, ano nga kalipay an maihahatag han pagsangyaw han maopay nga sumat?
Mga tip
-
Ha midweek nga katirok, pamiling hin mga paagi para makagtikang hin pakiistorya.
-
Pakianhi an nagdudumara ha imo hin pag-aram kon paonan-o ka magigin estudyante ha midweek nga katirok. An pagkaada bahin sugad nga estudyante makakabulig ha imo nga magin mas andam pagsumat ha iba han imo nahibabaroan.
-
Gamita an mga seksyon hini nga publikasyon nga “An Iba Nasiring” o “Bangin May Magpakiana” para magpraktis kon paonan-o mo babatunon an komon nga mga pakiana ngan pagriwa.
BANGIN MAY MAGPAKIANA: “Kumusta ka na?”
-
Paonan-o mo magagamit ini nga higayon basi isumat ha imo kaistorya an imo nahibabaroan ha imo pag-Bible study?
SUMARYO
An pagsangyaw han maopay nga sumat ha iba naghahatag hin kalipay, ngan bangin diri ito sugad kakuri han imo ginhuhunahuna.
Repaso
-
Kay ano nga kinahanglan isangyaw ha iba an maopay nga sumat?
-
Paonan-o mo ito bubuhaton ha matinalahuron nga paagi?
-
Paonan-o mo malalamposan an kakulba nga bangin inaabat mo ha pagsangyaw?
DUGANG NGA IMPORMASYON
Usisaha an upat nga simple nga paagi kon paonan-o ka magsasangyaw gamit an jw.org contact card.
Hibaroi an upat nga kalidad nga makakabulig ha imo ha pagsangyaw han maopay nga sumat.
“Andam Ka ba Magin Parapangisda hin mga Tawo?” (An Barantayan, Septyembre 2020)
Kitaa kon paonan-o an usa nga ehemplo ha Biblia makakabulig nga magin maisugon kita ha pagsangyaw han maopay nga sumat bisan kon bata pa.
Hibaroi kon paonan-o mo ig-iistorya an mahitungod ha Biblia ha mga kapamilya nga diri nakilala kan Jehova.
Bangin Maruyagan Mo Liwat
KOMON NGA MGA PAKIANA
Ano an Pag-aram ha Biblia nga Igintatanyag han mga Saksi ni Jehova?
Ha libre nga interactive nga programa nga igintatanyag han mga Saksi ni Jehova, puydi mo gamiton an bisan ano nga bersyon han Biblia. Ayaw pag-alang nga paupdon an imo bug-os nga pamilya o an imo kasangkayan.
