An kamatayon nagriresulta hin duro nga kasakit ngan kasubo. Tungod hito, an kamatayon gintatawag han Biblia nga kaaway. (1 Corinto 15:26) Ha Leksyon 27, hinbaroan mo nga pipirdihon ni Jehova ito nga kaaway. Pero ano an mahitatabo ha mga tawo nga nagkamatay na? Hini nga leksyon, mahibabaroan mo hin dugang an usa pa nga maopay nga saad ni Jehova—bubuhion niya utro an binilyon nga tawo basi mabuhi hin malipayon ha waray kataposan. Babanhawon niya hira! Mahitatabo gud ba ito? Babanhawon ba hira basi mabuhi ha langit o dinhi ha tuna?

1. Ano an karuyag buhaton ni Jehova ha aton mga hinigugma nga nagkamatay na?

Karuyag gud ni Jehova nga buhion utro an mga tawo nga nagkamatay. Usa nga tawo nga may marig-on nga pagtoo, nga an ngaran hi Job, nasarig nga diri hiya kakalimtan han Dios kon mamatay hiya. Nagsiring hiya ha Dios: “Matawag ka, ngan mabaton ako ha imo [tikang ha Lubnganan].”—Basaha an Job 14:13-15.

2. Paonan-o kita nahibaro nga an mga patay babanhawon?

Han nakanhi hi Jesus ha tuna, gintagan hiya han Dios hin gahum ha pagbanhaw hin mga patay. Nagbanhaw hi Jesus hin 12 anyos nga daragita ngan hin anak han balo nga babaye. (Marcos 5:41, 42; Lucas 7:12-15) Ha urhi, namatay an sangkay ni Jesus nga hi Lazaro. Bisan kon upat ka adlaw na an naglabay tikang han namatay hi Lazaro ngan iginlubong, ginbanhaw hiya ni Jesus. Hi Jesus nag-ampo ha Dios ngan nagsiring: “Lazaro, gawas!” Ngan “an tawo nga namatay ginawas”—nabuhi hiya! (Juan 11:43, 44) Imadyina la an daku nga kalipay han kapamilya ngan kasangkayan ni Lazaro!

3. Ano an paglaom han imo mga hinigugma nga nagkamatay na?

An Biblia nagsasaad: “Magkakaada pagkabanhaw.” (Buhat 24:15) An mga ginbanhaw ni Jesus hadto waray mahingadto ha langit. (Juan 3:13) Nalipay hira nga nabanhaw dinhi mismo ha tuna. Ha pariho nga paagi, hirani na banhawon ni Jesus an binilyon nga tawo basi mabuhi hin malipayon ha waray kataposan ha paraiso nga tuna. Nagsiring hiya nga babanhawon “an ngatanan nga aadto ha handumanan nga mga lubnganan”—bisan an mga tawo nga baga hin ginkalimtan na pero nahinunumdoman la gihapon han Dios.—Juan 5:28, 29.

 DUGANG NGA USISAHA

4. Ginpamatud-an ni Jesus nga kaya niya magbanhaw hin mga patay

Mahibaro hin dugang mahitungod ha ginhimo ni Jesus ha iya sangkay nga hi Lazaro. Basaha an Juan 11:14, 38-44, katapos, hisguti niyo ini nga mga pakiana:

• Paonan-o kita nahibaro nga tinuod nga namatay hi Lazaro?—Kitaa an bersikulo 39.

• Kon hi Lazaro nahingadto ha langit, pagkita mo papalusaron pa ba hiya ni Jesus basi mabuhi utro dinhi ha tuna?

I-play an VIDEO.

5. Damu an babanhawon!

Basaha an Salmo 37:29, katapos, hisguti niyo ini nga pakiana:

• Diin maukoy an binilyon nga tawo nga babanhawon?

Labot la han mga nagsisingba kan Jehova, damu nga iba pa an babanhawon ni Jesus. Basaha an Buhat 24:15, katapos, hisguti niyo ini nga pakiana:

• Hin-o an karuyag mo makita nga mabanhaw?

• Paonan-o an paglaom nga pagkabanhaw nagliaw ngan nagparig-on ha mga kag-anak ni Phelicity?

 SUMARYO

An Biblia nagsasaad nga babanhawon an binilyon nga nagkamatay. Karuyag ni Jehova nga mabuhi hira utro, ngan gintagan niya hi Jesus hin gahum ha pagbanhaw ha ira.

Repaso

• Paonan-o kita nahibaro nga karuyag ni Jehova ngan ni Jesus nga banhawon an mga patay?

• Diin maukoy an binilyon nga babanhawon—ha langit o ha tuna? Kay ano nga ito an imo baton?

• Ano an nakakombinse ha imo nga mabubuhi utro an imo namatay nga mga hinigugma?