LEKSYON 38
Magin Mapasalamaton han Regalo nga Kinabuhi
Damu nga makalilipay nga butang an aton nahihimo tungod kay buhi kita. Bisan kon may mga problema kita, na-i-enjoy la gihapon naton an iba nga bahin han aton kinabuhi. Paonan-o naton maipapakita nga mapasalamaton kita han regalo nga kinabuhi? Ngan ano an pinakaimportante nga rason nga mapasalamaton kita hito?
1. Kay ano nga kinahanglan magin mapasalamaton kita han kinabuhi?
Kinahanglan magin mapasalamaton kita han kinabuhi tungod kay regalo ito tikang ha aton mahigugmaon nga Amay, hi Jehova. Hiya an “gintitikangan han kinabuhi”—hiya an naglarang han ngatanan nga kinabuhi. (Salmo 36:9) “Hiya mismo an naghahatag ha ngatanan nga tawo hin kinabuhi ngan gininhawa ngan han ngatanan nga butang.” (Buhat 17:25, 28) Ginhahatag ni Jehova an aton mga ginkikinahanglan basi padayon kita nga mabuhi. Ngan diri la hiya nagtatagana, kondi ginsisiguro liwat niya nga ma-i-enjoy naton an aton kinabuhi.—Basaha an Buhat 14:17.
2. Paonan-o naton maipapakita kan Jehova nga mapasalamaton kita han regalo nga kinabuhi?
Tikang han iginburod ka han imo nanay, hi Jehova nahigugma na ha imo. Ha usa nga pag-ampo nga igin-upod ni Jehova ha iya Pulong, usa han iya mga surugoon, hi David, nagsiring ha iya: “An imo mga mata nakakita ha akon han nakadto pa ako ha tagoangkan.” (Salmo 139:16) Presyoso kan Jehova an imo kinabuhi. (Basaha an Mateo 10:29-31.) Masasakitan gud hi Jehova kon tinuyo nga tatapuson han usa an kinabuhi han iba, o bisan an iya mismo kinabuhi. a (Exodo 20:13) Nakakapasubo liwat kan Jehova kon ginbubutang naton ha peligro an aton kinabuhi o diri kita naghihirot basi proteksyonan an kinabuhi han iba. Kon ginhihirotan naton an aton kinabuhi ngan ginrirespeto an kinabuhi han iba, iginpapakita naton nga mapasalamaton kita han makaruruyag nga regalo nga kinabuhi.
DUGANG NGA USISAHA
Usisaha an pipira nga paagi nga maipapakita mo nga mapasalamaton ka han regalo nga kinabuhi.
3. Atamana an imo kahimsog
Gin-gagamit han dedikado nga mga Kristiano an ngatanan nga bahin han ira kinabuhi ha pag-alagad kan Jehova. Sugad ito hin ginpipresentar nira an ira lawas sugad nga halad ha Dios. Basaha an Roma 12:1, 2, katapos, hisguti niyo ini nga mga pakiana:
-
Ano an angay nga makaaghat ha imo nga atamanon an imo kahimsog?
-
Ano an pipira nga paagi nga mabubuhat mo ito?
4. Paghirot basi diri makadaot o makamatay
An Biblia nagdadasig ha aton nga likyan an delikado nga mga buruhaton. I-play an VIDEO basi mahibaro han pipira nga butang nga puydi mo buhaton basi magin talwas.
Basaha an Proberbios 22:3, katapos, hisguti niyo kon paonan-o ka ngan an iba magigin talwas . . .
-
ha iyo balay.
-
ha imo gintatrabahoan.
-
kon nag-uuyag.
-
kon nagdadrayb o nasakay hin sarakyan.
5. Respetoha an kinabuhi han iginbuburod nga bata
Iginsaysay ni David nga hi Jehova interesado han ngatanan nga nahitatabo samtang an bata nagtutubo ha tiyan han iya nanay. Basaha an Salmo 139:13-17, katapos, hisguti niyo ini nga pakiana:
-
Ha pagkita ni Jehova, san-o nagtitikang an kinabuhi han usa nga tawo, han igin-anak hiya o han nagburod an iya nanay ha iya?
An mga balaud ni Jehova ha kadaan nga Israel nagpuprotektar ha mga nanay ngan ha ira iginbuburod nga anak. Basaha an Exodo 21:22, 23, katapos, hisguti niyo ini nga mga pakiana:
-
Ano an panhunahuna ni Jehova ha tawo nga diri tinuyo nga nakapunit ha iginbuburod nga bata?
-
Ano an aabaton ni Jehova kon an usa tinuyo nga magpapapunit? b
-
Ano an imo inaabat mahitungod hito nga panhunahuna han Dios?
Bisan an usa nga babaye nga nagpapabili ha kinabuhi mahimo umabat nga waray na hiya iba nga opsyon kondi an magpapunit. Basaha an Isaias 41:10, katapos, hisguti niyo ini nga mga pakiana:
-
Kon an usa nga babaye ginpipresyur nga magpapunit, kan kanay hiya angay umaro hin bulig? Kay ano?
AN IBA NASIRING: “An usa nga babaye an may katungod ha pagdesisyon kon magpapapunit hiya o diri—kay iya man ito lawas.”
-
Ano an nakakombinse ha imo nga ginpapabilhan ni Jehova an kinabuhi han nanay ngan han iya iginbuburod nga bata?
SUMARYO
An Biblia nagtututdo ha aton nga higugmaon, respetuhon, ngan hirotan an regalo ni Jehova nga kinabuhi. Nag-uupod ini han aton kinabuhi ngan han kinabuhi han iba.
Repaso
-
Kay ano nga presyoso kan Jehova an kinabuhi han tawo?
-
Ano an aabaton ni Jehova kon tinuyo nga tatapuson han usa an kinabuhi han usa nga tawo?
-
Kay ano nga mapasalamaton ka han regalo nga kinabuhi?
DUGANG NGA IMPORMASYON
Paonan-o mo mapapasalamatan hi Jehova han regalo nga kinabuhi?
Hibaroi an baton han pakiana nga, Papasayloon ba han Dios an usa nga babaye nga nagpapunit hadto?
“Ano an Ginsisiring han Biblia Mahitungod ha Aborsyon?” (Web article)
Hibaroi kon paonan-o an panhunahuna han Dios ha kinabuhi makakabulig ha aton ha pagpili hin kaliawan.
“‘Delikado Hinduro nga mga Isport’—Kinahanglan Mo ba Ito Testingan?” (Pagpamata!, Oktubre 8, 2000)
Ano man kon an usa nga tawo naghuhunahuna nga magpakamatay? Usisaha kon paonan-o makakabulig an Biblia.
a Hinigugma gud ni Jehova an mga ruba an kasingkasing. (Salmo 34:18) Nasasabtan niya an kasakit nga ira gin-aabat nga tungod hito nahuhunahuna nira nga magpakamatay, ngan karuyag ni Jehova nga buligan hira. Basi mahibaroan kon paonan-o an iya bulig makakahatag hin kusog ha usa nga atohan ito, basaha an artikulo nga “Karuyag Ko Na Mamatay—Makakabulig ba ha Akon an Biblia Kon Nahuhunahuna Ko nga Magpakamatay?” nga aada ha Dugang nga Impormasyon nga seksyon hini nga leksyon.
b An mga nagpapunit hadto diri angay makonsensya hin sobra kay puydi hira pasayloon ni Jehova. Para ha dugang nga impormasyon, kitaa an artikulo nga “Ano an Ginsisiring han Biblia Mahitungod ha Aborsyon?” nga aada ha Dugang nga Impormasyon nga seksyon hini nga leksyon.
Bangin Maruyagan Mo Liwat
KOMON NGA MGA PAKIANA
Ano an Pag-aram ha Biblia nga Igintatanyag han mga Saksi ni Jehova?
Ha libre nga interactive nga programa nga igintatanyag han mga Saksi ni Jehova, puydi mo gamiton an bisan ano nga bersyon han Biblia. Ayaw pag-alang nga paupdon an imo bug-os nga pamilya o an imo kasangkayan.
