An bag-o nga mga mag-asawa naglalaom nga an kalipay nga ira gin-abat han ginkasal hira magpapadayon ha waray kataposan. Ngan puydi ito mahitabo. An mga Kristiano nga maiha na nga mag-asawa ngan naniningkamot ha pag-aplikar han sagdon han Biblia maaram nga posible ito mahitabo.

1. Ano an sagdon han Biblia ha mga bana?

Ginpili ni Jehova an bana sugad nga ulo han pamilya. (Basaha an Efeso 5:23.) Naglalaom hi Jehova nga an bana an maghihimo han mga desisyon nga magigin mapulsanon ha pamilya. An Biblia nagsasagdon ha mga bana: “Padayon nga higugmaa an iyo asawa.” (Efeso 5:25) Ano an karuyag sidngon hito? An mahigugmaon nga bana buotan ha iya asawa, ada man ha ira balay o ha publiko. Ginpuproteksyonan niya an iya asawa ngan ginhihimo niya an iya gimaopayi basi itagana an pisikal ngan emosyonal nga panginahanglan han iya asawa. (1 Timoteo 5:8) Labaw ha ngatanan, nangunguna hiya ha pag-ataman han espirituwal nga panginahanglan han iya asawa. (Mateo 4:4) Pananglitan, puydi hiya mag-ampo ngan magbasa han Biblia kaupod an iya asawa. Kon mahigugmaon nga gin-aataman han bana an iya asawa, natitipigan niya an iya pakigsangkay kan Jehova.​—Basaha an 1 Pedro 3:7.

2. Ano an sagdon han Biblia ha mga asawa?

An Pulong han Dios nasiring nga an asawa “sadang magkaada daku nga respeto ha iya bana.” (Efeso 5:33) Paonan-o niya ito hihimoon? Puydi niya hunahunaon an mag-opay nga kalidad ngan an mga pangalimbasog nga ginhihimo han iya bana basi atamanon hiya ngan an ira mga anak. Maipapakita liwat niya an pagrespeto pinaagi ha pagsuporta ha mga desisyon nga ginhihimo han iya bana ngan pinaagi ha pagin buotan ha pakiistorya ha iya ngan nagyayakan hin maopay mahitungod ha iya, bisan kon an iya bana diri nagsisingba kan Jehova.

3. Paonan-o mapaparig-on han mag-asawa an ira pag-asawa?

Mahitungod ha mga mag-asawa, an Biblia nasiring: “An duha magigin usa nga unod.” (Mateo 19:5) Karuyag sidngon hini nga kinahanglan nira atohan an bisan ano nga mahimo magin hinungdan nga magtikahirayo hira ha usa kag usa. Ginbubuhat nira ito pinaagi han regular nga paggahin hin panahon nga magkaupod ngan pinaagi han pagin tangkod ngan mahigugmaon ha pagsumat han ira ginhuhunahuna ngan inaabat ha usa kag usa. Diri nira gintutugotan an bisan ano o an bisan hin-o​—labot la kan Jehova​—nga magin mas importante kay han ira padis. Naghihirot gud hira nga diri magin sobra kaduok ha bisan hin-o.

 DUGANG NGA USISAHA

4. Mga bana​—higugmaa ngan atamana hin maopay an iyo asawa

5. Mga asawa​—higugmaa ngan irespeto an iyo bana

An Biblia nag-aaghat ha asawa nga irespeto an iya bana, nag-aalagad man kan Jehova an iya bana o diri. Basaha an 1 Pedro 3:​1, 2, katapos, hisguti niyo ini nga mga pakiana:

• Kon an imo bana diri tumuroo, sigurado nga karuyag mo nga magsingba liwat hiya kan Jehova. Ha imo hunahuna, ano an mas epektibo​—pagsinangyawan hiya pirme o magpakita hin maopay nga panggawi ngan irespeto hiya? Kay ano?

An mga bana ngan mga asawa makakahimo hin mag-opay nga desisyon nga magkaupod. Pero may mga panahon nga an asawa bangin diri umuyon ha iya bana. Kon sugad an kahimtang, puydi niya ipahayag an iya panhunahuna  ha kalmado ngan matinalahuron nga paagi pero kinahanglan kilalahon niya nga an bana an gintagan ni Jehova han responsabilidad nga magdesisyon kon ano an pinakamaopay para ha pamilya. Kinahanglan buhaton niya an iya gimaopayi basi suportaran an desisyon han iya bana. Kon bubuhaton ito han asawa, makakabulig hiya nga magin malipayon an bug-os nga pamilya. Basaha an 1 Pedro 3:​3-5, katapos, hisguti niyo ini nga pakiana:

• Ano an inaabat ni Jehova kon ginrirespeto han asawa an iya bana?

6. Puydi mo malamposan an mga problema ha iyo pag-asawa

 SUMARYO

An bana ngan asawa puydi magin malipayon kon hinigugma nira an usa kag usa, ginrirespeto nira an usa kag usa, ngan gin-aaplikar nira an mga prinsipyo ha Biblia.

Repaso

• Paonan-o makakabulig an bana nga magin malipayon an pag-asawa?

• Paonan-o makakabulig an asawa nga magin malipayon an pag-asawa?

• Kon inasaw-an ka, ano nga prinsipyo ha Biblia an makakabulig nga magin marig-on an iyo pag-asawa?