Bisan kon hinigugma mo gud hi Jehova ngan naniningkamot ka nga likyan an pagbuhat hin bisan ano nga makakapasubo ha iya, ha panapanahon makakahimo ka hin sayop. Pero an pipira nga sayop mas seryoso kay ha iba. (1 Corinto 6:​9, 10) Kon makabuhat ka hin seryoso nga sala, hinumdumi nga hinigugma ka la gihapon ni Jehova; andam hiya nga pasayloon ngan buligan ka.

1. Ano an kinahanglan naton buhaton basi pasayloon kita ni Jehova?

An mga nahigugma kan Jehova nasusubo gud kon nasasantop nira nga nakabuhat hira hin seryoso nga sala. Pero naliliaw hira hini nga saad ni Jehova ha iya katawohan: “Bisan kon an iyo mga sala sugad kapula han dugo, magigin sugad ito kabusag han niebe.” (Isaias 1:18) Kon sinsero kita nga magbabasol, bug-os nga papasayloon kita ni Jehova. Paonan-o kita magbabasol? An duro nga pagbasol magpapagios ha aton nga iundang an pagbuhat hin maraot ngan makimalooy kan Jehova nga pasayloon kita. Katapos, maniningkamot kita nga bag-uhon an sayop nga panhunahuna o buhat nga nagigin hinungdan nga makasala kita, ngan magtatalinguha kita nga magkinabuhi uyon ha limpyo nga mga suruklan ni Jehova.​—Basaha an Isaias 55:​6, 7.

2. Paonan-o ginagamit ni Jehova an mga tigurang basi buligan kita kon nakakasala kita?

Kon makabuhat kita hin seryoso nga sala, ginsisidngan kita ni Jehova nga “tawagon [naton] an mga tigurang han kongregasyon.” (Basaha an Santiago 5:​14, 15.) Inin pinili nga kalalakin-an nahigugma kan Jehova ngan ha iya mga karnero. Kwalipikado hira ha pagbulig ha aton basi maibalik an aton maopay nga relasyon kan Jehova.​—Galacia 6:1.

Paonan-o kita bubuligan han mga tigurang kon makabuhat kita hin seryoso nga sala? Gagamiton han duha o tulo nga tigurang an mga teksto ha Biblia basi ipakita ha aton kon kay ano nga sayop an aton ginbuhat. Maghahatag liwat hira ha aton hin praktikal nga mga suhestyon ngan sagdon basi buligan kita nga malikyan nga makasala utro. Bangin magdesisyon hira nga diri naton puydi buhaton an iba nga mga butang ha kongregasyon ha sulod hin pipira ka panahon tubtob nga magin himsog na liwat kita ha espirituwal. Kon an usa nga nakabuhat hin seryoso nga sala diri nagbabasol, an mga tigurang magpapaiwas ha iya ha kongregasyon basi diri hiya makaimpluwensya ha iba.

 DUGANG NGA USISAHA

3. Kon ginsusumat naton an aton sala, nakakabulig ito nga maibalik an aton pakigsangkay kan Jehova

An bisan ano nga sala nga aton nabubuhat nakakapasubo kan Jehova, salit angayan la nga magsumat kita ha iya. Basaha an Salmo 32:​1-5, katapos, hisguti niyo ini nga pakiana:

• Kay ano nga maopay nga isumat naton kan Jehova an aton mga sala imbes nga tagoon ito?

 4. Kon ano an naibubulig han pagpaiwas ha kongregasyon

Kon an usa nga nakabuhat hin seryoso nga sala nadiri pagsunod han mga suruklan ni Jehova, diri na hiya puydi magin bahin han kongregasyon. Ginpapaiwas hiya ha kongregasyon, ngan diri kita nakikig-upod ha iya o nakikiistorya ha iya. Basaha an 1 Corinto 5:​6, 11 ngan 2 Juan 9-11, katapos, hisguti niyo ini nga pakiana:

• Sugad la nga an ipaturubo nakakapatubo han minasa, paonan-o an pakig-upod ha diri nagbabasol nga nakasala makakaapekto ha kongregasyon?

 SUMARYO

Kon nakabuhat kita hin seryoso nga sala pero sinsero kita nga nagbabasol ngan determinado nga iundang an pagbuhat hin maraot, papasayloon kita ni Jehova.

Repaso

• Kay ano nga maopay nga isumat naton kan Jehova an aton mga sala?

• Ano an kinahanglan naton buhaton basi mapasaylo an aton mga sala?

• Kon nakabuhat kita hin seryoso nga sala, kay ano nga kinahanglan magpabulig kita ha mga tigurang?