1-3. (a) Ano an makaharadlok nga eksperyensya han mga disipulo ha Dagat han Galilea, ngan ano an ginbuhat ni Jesus? (b) Kay ano nga husto nga makakasiring hi apostol Pablo nga “an Kristo amo an gahum han Dios”?

 NAHADLOK an mga disipulo. Naglalayag hira pagtabok ha Dagat han Galilea han tigda nga inabot ha ira an usa nga subasko. Sigurado nga nakakita na hira hadto hin mga subasko dinhi hini nga dagat—aw, an iba han kalalakin-an eksperyensyado na nga mga parapangisda. a (Mateo 4:18, 19) Kondi ini “makusog gud nga subasko,” ngan nagin mabalud hinduro dayon an dagat. An kalalakin-an natataranta nga nangalimbasog ha pag-ulin han sakayan, kondi makusog hinduro an subasko. An dagku nga mga balud “padayon nga napusak ha sakayan,” nga nagtikang mapuno hin tubig. Bisan pa han kalisang, maopay an katurog ni Jesus ha may ulin, nakapoy katapos hin usa ka adlaw nga pagtutdo ha damu nga mga tawo. Tungod kay nahadlok para han ira kinabuhi, ginpukaw hiya han mga disipulo, nakikimalooy: “Ginoo, talwasa kami, kay magkakamatay na kami!”—Marcos 4:35-38; Mateo 8:23-25.

² Waray mahadlok hi Jesus. Bug-os an pagsarig, iya ginsaway an hangin ngan an dagat: “Husto na! Maglinaw ka!” Ha kadagmitan, sinugot an hangin ngan an dagat—inukoy  an bagyo, naglinaw an dagat, ngan “nagkalma gud ito.” Yana nagkaada naiiba nga kahadlok an mga disipulo. “Hin-o gud ba ini?” naghuring-huring hira ha usa kag usa. Tinuod, ano nga klase hin tawo an makakasaway han hangin ngan han dagat nga baga in nagsasaway ha sutil nga bata?—Marcos 4:39-41; Mateo 8:26, 27.

³ Kondi hi Jesus diri ordinaryo nga tawo. Ipinakita an gahum ni Jehova ngada ha iya ngan pinaagi ha iya ha urusahon nga mga paagi. An inspirado nga hi apostol Pablo husto nga nasiring: “An Kristo amo an gahum han Dios.” (1 Corinto 1:24) Ha ano nga mga paagi nakikita kan Jesus an gahum han Dios? Ngan ano an epekto ha aton kinabuhi han paggamit ni Jesus han gahum?

4, 5. (a) Ano nga gahum ngan awtoridad an iginhatag ni Jehova ha iya bugtong nga Anak? (b) Paonan-o nasangkapan ini nga Anak ha pagbuhat han mga katuyoan han iya Amay ha paglarang?

⁴ Tagda an gahum ni Jesus durante han iya pag-eksister antes magin tawo. Ipinakita ni Jehova an iya mismo “waray kataposan nga gahum” han ginlarang niya an iya bugtong nga Anak, nga nakilala sugad nga hi Jesu-Kristo. (Roma 1:20; Colosas 1:15) Katapos hito, iginhatag ni Jehova an daku nga gahum ngan awtoridad ngada hini nga Anak, igintoka ha iya an pagbuhat han Iya mga katuyoan ha paglarang. Mahitungod han Anak, an Biblia nasiring: “An ngatanan nga butang ineksister pinaagi ha iya, ngan kon diri pinaagi ha iya waray bisan usa nga butang nga ineksister.”—Juan 1:3.

⁵ Gutiay la an masasabtan naton ha kadaku hiton nga toka. Hunahunaa an gahum nga ginkinahanglan ha paghimo han minilyon gamhanan nga mga anghel, han pisikal nga uniberso upod an binilyon nga mga galaksi hito, ngan han tuna upod an damu magkalainlain nga kinabuhi dida  hito. Basi mahimo ito nga mga buruhaton, an bugtong nga Anak may-ada han pinakagamhanan nga puwersa ha uniberso—an baraan nga espiritu han Dios. Ini nga Anak nalipay gud ha pagin Eksperto nga Magburuhat, nga ginamit ni Jehova ha paglarang han ngatanan iba nga mga butang.—Proberbios 8:22-31.

6. Katapos han iya kamatay dinhi ha tuna ngan han iya pagkabanhaw, tinagan hi Jesus hin ano nga gahum ngan awtoridad?

⁶ Makakarawat ba han bugtong nga Anak an dugang pa nga gahum ngan awtoridad? Katapos han kamatay ni Jesus ha tuna ngan han iya pagkabanhaw, hiya nagsiring: “An ngatanan nga awtoridad ha langit ngan ha tuna iginhatag na ha akon.” (Mateo 28:18) Oo, hi Jesus tinagan han abilidad ngan han katungod ha paggamit han gahum ha bisan ano. Sugad nga “Hadi han mga hadi ngan Ginoo han mga ginoo,” tinagan hiya hin awtoridad basi wad-on an “ngatanan nga gobyerno ngan an ngatanan nga awtoridad ngan gahum”—nakikita ngan diri-nakikita—nga nakontra ha iya Amay. (Pahayag 19:16; 1 Corinto 15:24-26) “Waray iginsalin an Dios nga bisan ano nga waray igpasakop” kan Jesus—gawas la kan Jehova mismo.—Hebreo 2:8; 1 Corinto 15:27.

7. Kay ano nga makakasiguro kita nga diri gud gagamiton ni Jesus ha sayop nga paagi an gahum nga iginbutang ni Jehova ha iya mga kamot?

⁷ Sadang ba kita mabaraka nga bangin gamiton ni Jesus ha sayop nga paagi an iya gahum? Diri gud! Hinigugma gud ni Jesus an iya Amay ngan diri gud hiya magbubuhat hin bisan ano nga makakapasubo ha iya. (Juan 8:29; 14:31) Maaram hi Jesus nga diri gud ginagamit ni Jehova ha sayop nga paagi an iya makagarahum-ha-ngatanan nga gahum. Direkta nga nakikita ni Jesus nga namimiling hi Jehova hin mga higayon “basi ipakita an iya kusog para hadton bug-os an kasingkasing ngadto ha iya.” (2 Cronicas 16:9) Tinuod, hi Jesus may-ada liwat han gugma han iya Amay para ha katawohan, salit makakasarig kita nga gagamiton pirme ni Jesus  an iya gahum para ha mapulsanon nga katuyoan. (Juan 13:1) Hi Jesus may-ada maopay gud nga rekord hini nga bahin. Aton paghisgotan an iya gahum han nakanhi hiya ha tuna ngan kon paonan-o hiya napagios nga gamiton ito.

8. Katapos han pagdihugi ha iya, tinagan hi Jesus hin gahum ha pagbuhat han ano, ngan paonan-o niya ginamit an iya gahum?

⁸ Matin-aw, hi Jesus waray magbuhat hin nga milagro han bata pa hiya nga nagtutubo ha Nazaret. Kondi nabag-o ito han mabawtismohan hiya han 29 C.E., han mga 30 anyos an edad. (Lucas 3:21-23) An Biblia nagsusumat ha aton: “Hiya gindihogan han Dios pinaagi han baraan nga espiritu ngan han gahum, ngan ginlibot niya an tuna nga ginbubuhat an maopay ngan gintatambal an ngatanan nga ginpapasakitan han Yawa.” (Buhat 10:38) “Ginbubuhat an maopay”—diri ba nagpapasabot ito nga ginamit ni Jesus an iya gahum ha husto nga paagi? Katapos han pagdihog ha iya, hiya nagin “usa nga propeta nga gamhanan ha buhat ngan pulong.”—Lucas 24:19.

9-11. (a) Diin ginbuhat ni Jesus an kadak-an han iya pagtutdo, ngan ano nga ayat an iya inatubang? (b) Kay ano nga nanhipausa an damu nga mga tawo ha paagi han pagtutdo ni Jesus?

⁹ Paonan-o hi Jesus gamhanan ha pulong? Agsob nga nagtutdo hiya ha gawas—ha mga baybayon ngan ha mga ligid han mga bungtod sugad man ha mga kalsada ngan ha mga merkado. (Marcos 6:53-56; Lucas 5:1-3; 13:26) An iya mga mamarati basta nga mabaya na la unta kon an iya ginsisiring diri makapainteres ha ira. Ha panahon antes han inimprinta nga mga libro, an maapresyaron nga mga mamarati kinahanglan magtipig han iya mga pulong ha ira hunahuna ngan kasingkasing. Salit an pagtutdo ni Jesus kinahanglan makapainteres, masayon masabtan, ngan masayon mahinumdoman. Kondi ini nga ayat diri problema para kan Jesus. Tagda, pananglitan, an iya Sermon ha Bukid.

 ¹⁰ Usa ka aga temprano han 31 C.E., an damu nga mga tawo nagkatirok ha ligid han bungtod hirani han Dagat han Galilea. An iba nagtikang pa ha Judea ngan Jerusalem, mga 100 tubtob 110 kilometro an kahirayo. An iba nagtikang pa ha baybayon han Tiro ngan Sidon, ngadto ha norte. Damu nga magsakit nga mga tawo an dinaop kan Jesus ha pagkapot ha iya, ngan iya gintambal hira ngatanan. Han waray na nahibilin bisan usa ha ira nga grabe an sakit, nagtikang hiya ha pagtutdo. (Lucas 6:17-19) Han natapos hiya magyakan paglabay hin pipira ka oras, nahipausa hira ha ira hinbatian. Kay ano?

¹¹ Paglabay hin mga tuig, an usa nga nakabati hiton nga sermon nagsurat: “Nahipausa gud an mga tawo ha iya paagi han pagtutdo, kay nagtututdo hiya ha ira pariho hin tawo nga may awtoridad.” (Mateo 7:28, 29) Hi Jesus nagyakan nga may-ada gahum nga ira inaabat. Nagyakan hiya para han Dios ngan pinamatud-an an iya igintututdo pinaagi han awtoridad han Pulong han Dios. (Juan 7:16) Matin-aw an mga pulong ni Jesus, nakakadani an iya mga sagdon, ngan diri manigaran an iya mga pangatadongan. An iya mga pulong nakabantad han importante nga mga isyu sugad man han mga kasingkasing han iya mga mamarati. Iya gintutdoan hira kon paonan-o makakabiling hin kalipayan, kon paonan-o mag-aampo, kon paonan-o pamimilngon an Ginhadian han Dios, ngan kon paonan-o magkakaada hin sigurado nga tidaraon. (Mateo 5:3–7:27) An iya mga pulong nagpagios han mga kasingkasing hadton nagugutom han kamatuoran ngan han katadongan. An sugad nga mga tawo disidido nga “isalikway” an ira kalugaringon ngan bayaan an ngatanan nga butang basi sumunod ha iya. (Mateo 16:24; Lucas 5:10, 11) Maopay gud nga pamatuod ito han gahum han mga pulong ni Jesus!

12, 13. Ha ano nga paagi “gamhanan ha buhat” hi Jesus, ngan ano nga mga klase an iya mga milagro?

¹² Hi Jesus “gamhanan ha buhat” liwat. (Lucas 24:19) An mga Ebanghelyo nagsusumat mahitungod han sobra 30 ka espisipiko nga mga milagro nga ginbuhat niya—an ngatanan ha “gahum ni Jehova.” b (Lucas 5:17) An mga milagro ni Jesus nakaapekto han mga kinabuhi han yinukot nga mga tawo. Pansina an duha la nga milagro—an pagpakaon ha 5,000 nga kalalakin-an ngan ha urhi 4,000 nga kalalakin-an. Upod an kababayin-an ngan kabataan, an kadamu posible nga mas damu pa gud hin mga yinukot!—Mateo 14:13-21; 15:32-38.

¹³ Magkalainlain gud an mga milagro ni Jesus. May-ada hiya awtoridad ha mga demonyo, masayon pagawson hira. (Lucas 9:37-43) May-ada hiya gahum ha pisikal nga mga elemento, ginhimo an tubig nga bino. (Juan 2:1-11) Imadyina an kahipausa han iya mga disipulo han “nakita nira hi Jesus nga naglalakat ha bawbaw han dagat.” (Juan 6:18, 19) May-ada hiya gahum ha sakit, gintambal an mga bahin nga may depekto, an maiha na nga sakit, ngan an makamaratay nga sakit. (Marcos 3:1-5; Juan 4:46-54) Ginbuhat niya an sugad nga mga pagtambal ha magkalainlain nga mga paagi. An iba gintambal tikang ha hirayo, samtang an iba ginkaptan mismo ni Jesus. (Mateo 8:2, 3, 5-13) An iba natambal dayon, an iba hinayhinay.—Marcos 8:22-25; Lucas 8:43, 44.

14. Ilarom han ano nga mga kahimtang ipinakita ni Jesus nga may-ada hiya gahum ha pagbungkag han kamatayon?

¹⁴ Makatirigamnan gud, hi Jesus may-ada gahum ha pagbungkag  han kamatayon. Ha tulo nga iginrekord nga okasyon, iya ginbanhaw an patay, iginbalik an 12-anyos nga bata nga babaye ha iya mga kag-anak, ginbanhaw an amo la nga anak han usa nga balo nga babaye, ngan ginbanhaw an hinigugma nga bugto nga lalaki ha iya mga bugto nga babaye. (Lucas 7:11-15; 8:49-56; Juan 11:38-44) Waray kahimtang nga makuri gud. Iya ginbanhaw an 12-anyos nga bata nga babaye tikang ha iya higdaan katapos gud niya mamatay. Iya ginbanhaw an anak nga lalaki han balo nga babaye tikang ha tiheras, sigurado ha adlaw han iya kamatay. Ngan iya ginbanhaw hi Lazaro tikang ha lubnganan katapos niya mamatay hin upat na ka adlaw.

15, 16. Ano an ebidensya nga diri-hakog hi Jesus ha paggamit han iya gahum?

¹⁵ Mahuhunahuna mo ba an posible nga pag-abuso kon an gahum ni Jesus iginbutang ha mga kamot han diri-hingpit nga magmarando? Kondi hi Jesus waray sala. (1 Pedro 2:22) Nagdumiri hiya nga mahugawan han kahakog, ambisyon, ngan kahalot nga nagpapagios han diri-hingpit nga kalalakin-an nga gamiton an ira gahum ha pagdaot ha iba.

¹⁶ Diri-hakog hi Jesus ha paggamit han iya gahum, diri gud ginagamit ito para ha personal nga ganansya. Han nagutom hiya, nagdumiri hiya nga himoon an mga bato nga tinapay para ha iya kalugaringon. (Mateo 4:1-4) An iya gutiay nga mga panag-iya nagpamatuod nga waray hiya makaganansya ha materyal tikang ha paggamit han iya gahum. (Mateo 8:20) May-ada dugang nga proyba nga an iya gamhanan nga mga buhat nagtikang ha diri-hakugnon nga mga motibo. Han nagbuhat hiya hin mga milagro, ginbuhat niya ito sugad nga sakripisyo ha iya kalugaringon. Han gintambal niya an masakit, an gahum ginawas tikang  ha iya. Maaram hiya hini nga paggawas han gahum, bisan ha usa la nga pagtambal. (Marcos 5:25-34) Kondi, iya gintugotan an damu nga mga tawo nga makaptan hiya, ngan natambal hira. (Lucas 6:19) Diri-hakugnon gud ito nga espiritu!

17. Paonan-o ipinakita ni Jesus nga responsable hiya ha paggamit han iya gahum?

¹⁷ Responsable hi Jesus ha paggamit han iya gahum. Waray gud hiya magbuhat hin gamhanan nga mga buhat basi magparayaw la o ha waray-katuyoan nga pagpakita. (Mateo 4:5-7) Diri niya karuyag magbuhat hin mga tigaman ha pagtagbaw la han sayop nga pagkamausisa ni Herodes. (Lucas 23:8, 9) Imbes nga ipasamwak an iya gahum, agsob nga gintugon ni Jesus adton iya gintambal nga diri sumatan an bisan hin-o. (Marcos 5:43; 7:36) Diri niya karuyag nga maghunahuna an mga tawo mahitungod ha iya tungod han sobra nga mga sumat.—Mateo 12:15-19.

18-20. (a) Ano an nakaimpluwensya ha paagi han paggamit ni Jesus han iya gahum? (b) Ano an inaabat mo ha paagi han pagtambal ni Jesus ha usa nga bungol nga lalaki?

¹⁸ Inin gamhanan nga lalaki, hi Jesus, naiiba gud hadton tawhanon nga mga magmarando nga nagamit han gahum nga waray pagtagad ha mga panginahanglan ngan pag-antos han iba. Hi Jesus nagtagad ha mga tawo. Nalooy gud hiya han makita niya an nagsasakit salit napagios hiya nga kuhaon an ira pag-antos. (Mateo 14:14) Makonsiderasyon hiya ha ira mga pagbati ngan mga panginahanglan, ngan inin mahumok nga pagtagad nakaapekto ha paagi han iya paggamit han iya gahum. Makapabantad gud nga ehemplo an mababasa ha Marcos 7:31-37.

¹⁹ Hini nga okasyon, nabilngan han kadam-an nga mga tawo hi Jesus ngan gindara ha iya an damu nga magsakit, ngan iya gintambal hira ngatanan. (Mateo 15:29, 30) Kondi ginpili ni Jesus an usa nga lalaki ngan gintagan hiya hin espesyal nga pagtagad. Bungol an lalaki ngan makuri makayakan.  Bangin inabat ni Jesus an duro nga kulba ngan kaawod hini nga lalaki. Sugad nga pagtagad, iginpahirayo hiya ni Jesus ha mga tawo—ngadto ha pribado nga lugar. Katapos, nagsinyas hi Jesus ha pagpasabot ha lalaki mahitungod han iya pagbubuhaton. “Iginsulod niya an iya mga tudlo ha mga talinga hito nga tawo, ngan katapos tumupra, iya ginkaptan an dila hito nga tawo.” c (Marcos 7:33) Sunod, hi Jesus hinangad ha langit ngan nag-ampo. Ini nga mga buhat nagpasabot ha lalaki nga, ‘An bubuhaton ko para ha imo amo an tungod han gahum tikang ha Dios.’ Ha kataposan, hi Jesus nagsiring: “Maabrihan ka.” (Marcos 7:34) Dida hito, nakabati na an lalaki, ngan normal nga nakayakan na hiya.

²⁰ Nakakaliaw gud an paghunahuna nga bisan han ginagamit an iya hatag-han-Dios nga gahum ha pagtambal ha may sakit, ipinakita ni Jesus an mapinairon nga pagtagad ha ira mga pagbati! Diri ba nagpapasarig an paghibaro nga igintapod ni Jehova an Mesianiko nga Ginhadian ha mga kamot han sugad mapinairon, makonsiderasyon nga Magmarando?

21, 22. (a) Ano an ginpapadagawan han mga milagro ni Jesus? (b) Tungod kay hi Jesus may-ada gahum ha natural nga mga puwersa, ano an malalaoman naton ilarom han pagmando han iya Ginhadian?

²¹ An gamhanan nga mga buhat nga ginbuhat ni Jesus ha tuna gutiay la nga pagpakita han darodaku pa nga mga  bendisyon nga maabot ilarom han iya hadianon nga pagmando. Ha bag-o nga kalibotan han Dios, hi Jesus magbubuhat utro hin mga milagro—kondi ha bug-os nga tuna! Tagda an pipira han makalilipay nga mga butang nga mahitatabo ha tidaraon.

²² Ibabalik ni Jesus an hingpit nga pagkatimbang han palibot han tuna. Hinumdumi nga iya ipinakita an iya gahum ha natural nga mga puwersa pinaagi han pagpakalma han makusog nga hangin. Sigurado, kon sugad, ilarom han pagmando han Ginhadian han Kristo, an katawohan diri na mahahadlok nga madadaot hira han mga bagyo, mga linog, mga pagbuto han mga bulkan, o iba nga natural nga mga kalamidad. Tungod kay hi Jesus amo an Eksperto nga Magburuhat, nga ginamit ni Jehova ha paglarang han tuna ngan han ngatanan nga may kinabuhi dida hito, bug-os nga hinsasabtan niya an pagkahimo han tuna. Maaram hiya kon paonan-o an husto nga paggamit han mga bahandi hito. Ilarom han iya pagmando, inin bug-os nga tuna magigin Paraiso.—Lucas 23:43.

23. Sugad nga Hadi, paonan-o tatagbawon ni Jesus an mga panginahanglan han katawohan?

²³ Kumusta man an mga panginahanglan han katawohan? An abilidad ni Jesus ha pagpakaon hin hura ha yinukot nga mga tawo, ginagamit an pipira la nga mga tagana, nagpapasarig ha aton nga an iya pagmando magdadara hin kagawasan tikang ha kagutom. Tinuod, an hura nga pagkaon, nga husto an pagbahinbahin, magtatapos han kagutom ha kadayonan. (Salmo 72:16) An iya gahum ha sakit ngan balatian nagsusumat ha aton nga an masakit, buta, bungol, baldado, ngan piay nga mga tawo matatambal—hin bug-os ngan permanente. (Isaias 33:24; 35:5, 6) An iya abilidad ha pagbanhaw ha mga patay nagsisiguro nga an iya pagkagamhanan sugad nga langitnon nga Hadi nag-uupod han gahum ha pagbanhaw ha damu ka milyon nga mga nagkamatay  nga nalilipayan han iya Amay nga mahinumdoman.—Juan 5:28, 29.

24. Samtang ginhuhunahuna naton an gahum ni Jesus, ano an sadang hinumdoman naton pirme, ngan kay ano?

²⁴ Samtang ginhuhunahuna naton an gahum ni Jesus, hinumdoman naton pirme nga ini nga Anak hingpit nga nagsusubad ha iya Amay. (Juan 14:9) Salit an paggamit ni Jesus han gahum naghahatag ha aton hin matin-aw nga paghulagway kon paonan-o ginagamit ni Jehova an gahum. Pananglitan, hunahunaa an mapinairon nga pagtambal ni Jesus ha usa nga may liprosi. Tungod kay nalooy, ginkaptan ni Jesus an lalaki ngan nagsiring: “Karuyag ko!” (Marcos 1:40-42) Pinaagi han sugad hini nga mga asoy, hi Jehova baga hin nasiring, ‘Sugad hito ginagamit ko an akon gahum!’ Diri ka ba napapagios nga dayawon an aton makagarahum-ha-ngatanan nga Dios ngan magpasalamat nga ginagamit niya an iya gahum ha sugad mahigugmaon nga paagi?