MALILIPAY ka ba kon mahihimo mo an bisan ano nga karuyag mo? May-ada ba mga panahon nga naghahandom ka nga waray gud unta bisan hin-o nga masiring ha imo kon ano an pagbubuhaton? Sumati ako han ginhuhunahuna mo.—

Kondi ano an mas maopay para ha imo? Maaramon gud ba an pagbuhat han bisan ano nga karuyag mo? O mas maopay ba an mga resulta kon nasugot ka ha imo amay ngan ha imo iroy?— An Dios nasiring nga sadang sugton mo an imo mga ginikanan, salit sigurado nga may-ada maopay nga hinungdan ha pagbuhat hito. Kitaon naton kon masasabtan naton ito.

Pira na an imo edad?— Maaram ka ba kon pira na an edad han imo tatay?— Pira an edad han imo nanay o han imo mga apoy?— Mas maiha na gud hira nga nabuhi kay ha imo. Ngan kon mas maiha na nga nabubuhi an usa ka tawo, mas damu an iya panahon ha paghibaro hin mga butang. Mas damu an iya nababatian ngan mas damu an iya nakikita ngan mas damu an iya nabubuhat kada tuig. Salit an mga batan-on mahibabaro tikang ha mga larolagas.

May kilala ka ba nga mas bata ha imo?— Mas maaram ka ba kay ha iya?— Kay ano nga mas maaram ka?— Tungod kay nabubuhi ka hin mas  maiha na. May-ada ka na mas damu nga panahon ha paghibaro hin mga butang kay ha usa nga mas bata ha imo.

Hin-o an nabuhi hin mas maiha na kay ha imo o ha akon o ha bisan hin-o nga iba nga tawo?— Hi Jehova nga Dios. Mas maaram hiya kay ha imo, ngan mas maaram hiya kay ha akon. Anoman an iya ipabuhat ha aton, makakasiguro kita nga husto an pagbuhat hito, bisan kon bangin makuri an pagbuhat hito. Maaram ka ba nga bisan an Bantogan nga Magturutdo nakurian hadto ha pagsugot?—

An Dios naghangyo hadto kan Jesus nga buhaton an makuri hinduro nga butang. Hi Jesus nag-ampo mahitungod hito, sugad han aton makikita dinhi ha retrato. Hiya nag-ampo: ‘Kon karuyag mo, kuhaa ini nga irinman tikang ha akon.’ Pinaagi hini nga pag-ampo, ipinakita ni Jesus nga diri pirme masayon an pagbuhat han kaburut-on han Dios. Kondi paonan-o gintapos ni Jesus an iya pag-ampo? Maaram ka ba?—

Gintapos ito ni Jesus pinaagi han pagsiring: ‘Matuman unta, diri an akon kaburut-on, kondi an imo.’ (Lukas 22:​41, 42) Oo, karuyag niya nga matuman an kaburut-on han Dios, diri an iya kalugaringon. Ngan nagpadayon hiya ngan ginbuhat an karuyag han Dios imbes nga an ginhunahuna niya nga gimaopayi.

Ano an mahibabaroan naton tikang hini?— Hinbaroan naton nga husto pirme an pagbuhat han ginsisiring han Dios, bisan kon bangin diri masayon an pagbuhat hito. Kondi may-ada pa kita hinbaroan. Maaram ka ba kon ano ito?— Hinbaroan naton nga an Dios ngan hi Jesus diri usa nga persona, sugad han ginsisiring han iba nga tawo. Hi Jehova nga Dios mas magurang ngan mas maaram kay ha iya Anak, hi Jesus.

Kon nasugot kita ha Dios, ipinapakita naton nga nahigugma kita ha iya. An Biblia nasiring: “Ini an gugma han Dios, nga pagtumanon ta an iya mga  sugo.” (1 Juan 5:3) Salit nasasabtan mo yana, nga kita ngatanan kinahanglan sumugot ha Dios. Karuyag mo sugton hiya, diri ba?—

Aton abrihan an aton Biblia ngan kitaon kon ano an iginpapabuhat han Dios ha kabataan.Basahon naton an ginsisiring han Biblia ha Efeso kapitulo 6, bersikulo 1, 2, ngan 3. Nasiring: “Mga anak, magtuman kamo ha iyo mga kag-anak ha Ginoo: kay ini amo an matadong. Tumahod ka ha imo amay ngan ha imo iroy nga amo an siyahan nga sugo nga may saad, basi nga may nimo kaopayan, ngan mag-ukoy ka hin hilawig nga kinabuhi dinhi ha tuna.”

Salit nasasabtan mo nga hi Jehova nga Dios mismo an nasiring ha imo nga magin masinugtanon ka ha imo amay ngan iroy. Ano an karuyag sidngon han ‘pagtahod’ ha ira? Nangangahulogan ito nga kinahanglan ipakita mo ha ira an espesyal nga pagtagad. Ngan an Dios nagsasaad nga kon masugot ka ha imo mga ginikanan, ito magigin ‘kaopayan mo.’

May-ada ako istorya ha imo mahitungod han pipira nga mga tawo nga naluwas an mga kinabuhi tungod kay masinugtanon hira. Ini nga mga tawo nag-ukoy ha daku nga siyudad han Jerusalem, maiha na nga panahon an naglabay. An kadam-an nga mga tawo hiton nga siyudad waray mamati ha Dios, salit hi Jesus nagpahamangno ha ira nga bubungkagon han Dios an ira siyudad. Ginsumatan liwat hira ni Jesus nga hira makakapalagiw kon higugmaon nira an husto. Hiya nagsiring: ‘Kon makita niyo an Jerusalem nga ginlilibotan han mga sundalo, hibabaroan niyo nga hirani na an kaguba hito. Ito na an panahon nga bumaya ha Jerusalem ngan pumalagiw ngadto ha kabukiran.’​—Lukas 21:20-22.

Oo, sugad la han ginsiring ni Jesus, inabot an mga sundalo basi atakehon an Jerusalem. An mga sundalo han Roma nagkampo ha palibot hito. Katapos, ha anoman nga hinungdan, binaya an mga sundalo. Naghunahuna an kadam-an han mga tawo nga waray na peligro. Salit nagpabilin hira ha siyudad. Kondi ano an ginsiring ni Jesus nga kinahanglan buhaton nira?— Ano unta an imo ginbuhat kon nag-uukoy ka hadto ha Jerusalem?— Adton tinoo gud kan Jesus binaya ha ira mga balay ngan pinalagiw ngadto ha kabukiran nga hirayo ha Jerusalem.

 Ha sulod hin usa ka tuig, waray nahitabo ha Jerusalem. Ha ikaduha ka tuig, waray nahitabo. Ngan ha ikatulo ka tuig, waray nahitabo. An iba nga mga tawo bangin naghunahuna nga mga lurong adton binaya ha siyudad. Kondi ha ikaupat ka tuig, binalik an Romano nga mga sundalo. Nagkampo na liwat hira ha palibot han Jerusalem. Yana urhi na gud an pagpalagiw. Hini nga panahon ginbungkag han mga sundalo an siyudad. Nagkamatay an kadam-an nga mga tawo ha sulod hito, ngan an iba gindara nga bihag.

Kondi ano an nahitabo hadton sinugot kan Jesus?— Talwas hira. Hirayo hira ha Jerusalem. Salit waray hira madaot. An pagsugot nagpanalipod ha ira.

Kon masinugtanon ka, magpapanalipod ba liwat ito ha imo?— An imo mga ginikanan bangin magsiring ha imo nga diri ka gud mag-uyag ha kalsada. Kay ano nga nasiring hira hito?— Tungod kay mahimo ka  maligis han awto. Kondi bangin usa ka adlaw maghunahuna ka: ‘Waray mga awto yana. Diri ako maliligis. An iba nga kabataan nag-uuyag ha kalsada, ngan waray pa gud ako makakita ha ira nga naligis.’

Iton gud an inabat han kadam-an nga mga tawo ha Jerusalem. Katapos bumaya an Romano nga mga sundalo, baga in talwas na ito. An iba nagpabilin ha siyudad. Salit nagpabilin liwat hira. Ginpahamangnoan na hira, kondi waray hira mamati. Sugad nga resulta, nagkamatay hira.

Pag-istoryahan naton an usa pa nga ehemplo. Nag-uyag ka na ba han puspuro?— Baga in makaruruyag an pagkita ha kalayo kon palagahon mo an puspuro. Kondi mahimo magin peligroso an pag-uyag han puspuro. Mahimo masunog an bug-os nga balay, ngan mahimo ka mamatay!

Hinumdumi, diri igo na an panalagsa la nga pagsugot. Kondi kon pirme ka nasugot, magpapanalipod gud ito ha imo. Ngan hin-o an nasiring ha imo nga, “Mga anak, magtuman kamo ha iyo mga kag-anak”?— An Dios. Ngan hinumdumi, nasiring hiya hito tungod kay nahigugma hiya ha imo.