USA ka adlaw may-ada inabot nga lalaki basi makigkita kan Jesus. Maaram hiya nga maaramon gud hi Jesus, salit nagsiring hiya ha iya: ‘Magturutdo, sidnga an akon bugto nga lalaki nga bahinan ako hin pipira han mga butang nga gintatag-iya niya.’ Naghunahuna an lalaki nga sadang hiya magkaada hin pipira hiton nga mga butang.

Kon ikaw hi Jesus, ano an sisidngon mo?— Nasabtan ni Jesus nga an lalaki may-ada problema. Kondi an problema diri kay nagkikinahanglan hiya han gintatag-iya han iya bugto. An problema han lalaki amo nga diri hiya maaram kon ano gud an importante ha kinabuhi.

Aton hunahunaon ini. Ano an sadang magin pinakaimportante ha aton? Pagkaada ba hin mag-opay nga mga uyagan, bag-o nga mga bado, o mga butang nga pariho hito?— Diri, may-ada usa ka butang nga mas importante gud. Ngan ini an leksyon nga karuyag igtutdo ni Jesus. Salit iginsumat niya an istorya mahitungod han lalaki nga nahingalimot ha Dios. Karuyag mo ba mabatian ito?—

Riko gud ini nga lalaki. May-ada hiya tuna ngan mga kamalig. Tinubo gud hin maopay an iya igintanom. Waray na lugar ha iya mga kamalig nga bubutangan han ngatanan nga ani. Salit, ano an iya bubuhaton? Aw, hiya nagsiring ha iya kalugaringon: ‘Akon gugubaon an akon mga kamalig ngan magtutukod hin mas dagku. Katapos, akon ibubutang an ngatanan ko nga ani ngan an ngatanan ko nga mag-opay nga manggad dida hinin bag-o nga mga kamalig.’

Naghunahuna an riko nga lalaki nga ini an maaramon nga buhaton.  Naghunahuna hiya nga maaramon gud hiya ha pagtirok hin damu nga mga butang. Hiya nagsiring ha iya kalugaringon: ‘Damu na an akon tinirok nga mag-opay nga manggad. Igo na ito ha akon mga panginahanglan ha damu nga mga tuig. Salit yana mahimo na ako pumahuway. Makaon ako, mainom, ngan maglilipay.’ Kondi may-ada sayop ha panhunahuna han riko nga lalaki. Maaram ka ba kon ano ito?— Ginhunahuna la niya an iya kalugaringon ngan an iya kalipay. Iya hinngalimtan an Dios.

Salit an Dios nagyakan ha riko nga lalaki. Hiya nagsiring: ‘Ikaw nga lurong. Mamamatay ka yana nga gab-i. Niyan hin-o an magtatag-iya han mga butang nga imo gintirok?’ Magagamit ba hiton nga riko nga lalaki iton nga mga butang kon patay na hiya?— Diri, kukuhaon ito han iba. Hi Jesus nagsiring: “Amo ini an nagtitirok hin manggad ha ira kalugaringon kondi diri manggaranon ha Dios.”​—Lukas 12:13-21.

Diri mo karuyag magin pariho hiton nga riko nga lalaki, diri ba?— An iya siyahan nga katuyoan ha kinabuhi amo an pagkaada hin materyal nga mga  butang. Sayop ito. Karuyag niya pirme an dugang pa. Kondi diri hiya “manggaranon ha Dios.”

Damu nga mga tawo an karuyag magin pariho hiton nga riko nga lalaki. Karuyag nira pirme an dugang pa. Kondi mahimo ini magresulta hin dagku nga mga problema. Pananglitan, diri ba may-ada ka mga uyagan?— Ano an pipira han imo mga uyagan? Sumati ako.— Ano man kon an usa han imo mga sangkay may-ada bola o monyika o iba nga mga uyagan nga waray ka? Husto ba nga piriton mo an imo mga ginikanan nga pumalit hito para ha imo?—

Bangin may panahon nga baga in importante gud an usa nga uyagan. Kondi ano an nahitatabo hito katapos hin madaliay nga panahon?— Nadadaan ito. Bangin maguba ito, ngan katapos, nadiri ka na ngani hito. Oo, may-ada ka gintatag-iya nga mas presyoso gud kay ha mga uyagan. Maaram ka ba kon ano ito?—

An imo kinabuhi. Importante gud an imo kinabuhi tungod kay kon waray ito, diri mo mahihimo an bisan ano. Kondi an imo kinabuhi nadepende ha pagbuhat han nakakalipay ha Dios, diri ba?— Salit diri kita magin pariho hiton lurong nga riko nga lalaki nga nahingalimot ha Dios.

 Diri la kabataan an bangin magbuhat hin kalurongan pariho hiton nga riko nga lalaki. Damu nga mga adulto an nagbubuhat liwat hito. An iba ha ira karuyag magkaada pirme hin dugang pa ha ira gintatag-iya. Bangin may-ada hira pagkaon para han yana nga adlaw, bado nga isusul-ot, ngan urukyan. Kondi karuyag nira an dugang pa. Karuyag nira an damu nga bado. Ngan karuyag nira an mas dagku nga mga balay. Ini nga mga butang binabayaran hin kwarta. Salit nagtatrabaho gud hira basi magkaada damu nga kwarta. Ngan kon mas damu an nakukuha nira nga kwarta, karuyag nira magkaada hin dugang pa.

An iba nga mga adulto okupado hinduro ha pangalimbasog nga magkaada hin kwarta salit waray na hira panahon ha ira pamilya. Ngan waray na hira panahon para ha Dios. Makakabulig ba an ira kwarta basi magpabilin hira nga buhi?— Diri. Magagamit ba nira an ira kwarta kon patay na hira?— Diri. Tungod kay an patay diri na makakahimo hin bisan ano.​—Eklesiastes 9:​5, 10.

Nangangahulogan ba ini nga sayop an pagkaada hin kwarta?— Diri. Makakapalit kita hin pagkaon ngan bado pinaagi han kwarta. An Biblia nasiring nga usa ka panalipod ito. (Eklesiastes 7:12) Kondi kon nahigugma kita han kwarta, magkakaada kita hin seryoso nga mga problema. Magigin pariho kita han lurong nga riko nga lalaki nga nagtirok hin mga manggad para ha iya kalugaringon ngan diri manggaranon ha Dios.

Ano an kahulogan han pagin manggaranon ha Dios?— Nangangahulogan ito nga unahon an Dios ha aton kinabuhi. An iba nga mga tawo nasiring nga natoo hira ha Dios. Naghuhunahuna hira nga igo na an tumoo. Kondi manggaranon gud ba hira ha Dios?— Diri, pariho hira han riko nga lalaki nga nahingalimot ha Dios.

Hi Jesus waray gud mahingalimot ha iya Amay ha langit. Waray hiya mangalimbasog nga magkaada hin damu nga kwarta. Ngan waray hiya damu nga materyal nga mga butang. Maaram hi Jesus kon ano gud an importante ha kinabuhi. Maaram ka ba kon ano ito?— An pagin manggaranon ha Dios.

Sumati ako, paonan-o kita magigin manggaranon ha Dios?— Magigin manggaranon kita ha Dios pinaagi han pagbuhat han nakakalipay ha iya. Hi Jesus nagsiring: ‘Akon ginbubuhat pirme an nakakalipay ha iya.’ (Juan 8:29)  Nalilipay an Dios kon ginbubuhat naton an mga butang nga karuyag niya ipabuhat ha aton. Yana sumati ako, ano nga mga butang an imo mahihimo basi mapalipay an Dios?— Oo, mahimo mo basahon an Biblia, tumambong ha Kristiano nga mga katirok, mag-ampo ha Dios, ngan buligan an iba nga mahibaro mahitungod ha iya. Ito an pinakaimportante gud nga mga butang ha kinabuhi.

Tungod kay hi Jesus manggaranon ha Dios, ginmangnoan hiya ni Jehova. Iya ginbalosan hi Jesus hin kinabuhi nga waray kataposan. Kon pariho kita kan Jesus, hihigugmaon kita ngan mamangnoan liwat ni Jehova. Salit hinaot magin pariho kita kan Jesus ngan diri gud magin pariho hiton nga riko nga lalaki nga nahingalimot ha Dios.