PANANGLITAN usa nga bata nga babaye an nagsiring ha iya nanay: “Oo, mauli ako dayon katapos han klase.” Kondi nagpabilin hiya ha eskwelahan ngan nag-uyag upod han iya kasangkayan ngan ha urhi nagsiring ha iya nanay: “Ginhangyo ako han akon magturutdo nga magpabilin katapos han klase.” Husto ba an pagsiring hin sugad hito?—

O pananglitan usa nga bata nga lalaki an nagsiring ha iya tatay: “Diri ako an nagbanyak han bola ha balay.” Kondi ano man kon tinuod nga iya ginbuhat ito? Sayop ba an pagsiring nga waray niya ito buhata?—

Ipinakita ha aton han Bantogan nga Magturutdo an husto nga pagbuhaton. Hiya nagsiring: ‘An imo pulong nga Oo mangahulogan la hin Oo, ngan an imo Diri, Diri; kay an iba pa hini tikang ha usa nga maraot.’ (Mateo 5:37) Ano an karuyag ipasabot ni Jesus?— Karuyag niya ipasabot nga sadang buhaton naton an aton ginsisiring.

May-ada istorya ha Biblia nga nagpapakita kon mationan-o kaimportante an pagsumat han kamatuoran. Mahitungod ito han duha  nga tawo nga nagsiring nga mga disipulo hira ni Jesus. Kitaon naton kon ano an nahitabo.

Waray pa magduha ka bulan katapos mamatay hi Jesus, damu nga mga tawo tikang ha higrayo nga mga lugar an nagkaabot ha Jerusalem para ha importante nga piyesta han mga Judio nga tinatawag nga Pentekostes. Hi apostol Pedro naghatag hin maopay nga pahayag diin iya iginsumat ha mga tawo an mahitungod kan Jesus, nga ginbanhaw ni Jehova tikang ha mga minatay. Ini an siyahan nga panahon nga nahibaro mahitungod kan Jesus an damu hiton nga mga nagkaabot ha Jerusalem. Yana karuyag nira mahibaro hin dugang pa. Salit, ano an ira ginbuhat?

Nagpabilin hira hin mas maiha kay ha ira ginlaoman. Kondi, katapos hin pipira ka panahon, an iba ha ira naubosan na hin kwarta, ngan nagkinahanglan hira hin bulig basi makapalit hira hin pagkaon. Karuyag han mga disipulo ha Jerusalem nga buligan an mga bisita. Salit, damu ha ira an nagbaligya han ira mga panag-iya ngan gindara an kwarta ha mga apostol ni Jesus. Katapos, iginhatag han mga apostol an kwarta ha mga nanginginahanglan hito.

Hi Ananias ngan an iya asawa, hi Sapira, nga mga membro han Kristiano nga kongregasyon ha Jerusalem, nagbaligya han ira tuna. Waray nagsugo  ha ira nga ibaligya ito. Ira kalugaringon nga desisyon ito. Kondi ira ginbuhat ito diri tungod kay nahigugma hira ha bag-o nga mga disipulo ni Jesus. An totoo, karuyag ni Ananias ngan Sapira nga hunahunaon han mga tawo nga mas maopay hira kay ha kon ano gud hira. Salit nagdesisyon hira nga sisidngon nira nga ihahatag nira an ngatanan nga kwarta basi mabuligan an iba. An totoo, usa la nga bahin hito an ira ihahatag kondi sisidngon nira nga ira ihahatag ito ngatanan. Ano ito ha hunahuna mo?—

Nakigkita hi Ananias ha mga apostol. Iya iginhatag ha ira an kwarta. Siyempre, maaram an Dios nga waray niya ihatag ito ngatanan. Salit iginpahibaro han Dios kan apostol Pedro nga hi Ananias diri nagsusumat han kamatuoran mahitungod hito nga butang.

Salit hi Pedro siniring: ‘Ananias, kay ano nga gintugotan mo nga ipabuhat ini ni Satanas ha imo? Imo an tuna. Diri kinahanglan ibaligya mo ito. Ngan bisan katapos mo ibaligya an tuna, ikaw an magbubuot kon ano an bubuhaton mo ha kwarta. Kondi kay ano nga nagbubuwa ka nga ihahatag mo an ngatanan nga kwarta samtang bahin la hito an imo iginhahatag? Nagbubuwa ka, diri la ha amon, kondi ha Dios.’

Seryoso gud ito. Nagbubuwa hi Ananias! Diri niya ginbubuhat an iya ginsisiring. Nagbubuwa la hiya ha pagbuhat hito. An Biblia nagsusumat ha aton han sunod nga nahitabo. Ito nasiring: ‘Ha pakabati han mga pulong ni Pedro, hi Ananias natumba ngan namatay.’ Ginpahinabo han Dios nga  hi Ananias mamatay! Katapos, gindara an iya lawas ha gawas ngan iginlubong.

Paglabay hin mga tulo ka oras, inabot hi Sapira. Diri hiya maaram han nahitabo ha iya bana. Salit hi Pedro nagpakiana ha iya: ‘Iginbaligya ba niyo an tuna ha kantidad han kwarta nga iyo iginhatag ha amon?’

Hi Sapira binaton: ‘Oo, amon iginbaligya an tuna hiton gud nga kantidad.’ Kondi buwa ito! Ira igintago para ha ira kalugaringon an iba han kwarta nga bayad han tuna. Salit ginpahinabo han Dios nga hi Sapira mamatay liwat.​—Buhat 5:1-11.

Ano an sadang hibaroan naton tikang ha nahitabo kan Ananias ngan Sapira?— Nagtututdo ito ha aton nga nadiri an Dios ha mga buwaon. Karuyag niya nga magsumat kita pirme han kamatuoran. Kondi damu nga mga tawo an nasiring nga waray maraot ha pagbuwa. Ha hunahuna mo, husto ba iton nga mga tawo?— Maaram ka ba nga nahitatabo an ngatanan nga sakit, kaul-ol, ngan kamatayon ha tuna tungod han usa nga buwa?—

Hinumdumi, an Yawa nagbuwa ha siyahan nga babaye, hi Eva. Iya ginsumatan hiya nga diri hiya mamamatay kon diri niya sugton an Dios ngan kaunon an bunga nga ginsiring han Dios nga diri niya sadang kaunon. Tinoo hi Eva ha Yawa ngan kinaon han bunga. Nakombinse liwat niya hi Adan nga kumaon hito. Yana magpakasasala na hira, ngan an ngatanan nga ira mga anak matatawo nga magpakasasala. Ngan tungod kay hira magpakasasala, an ngatanan nga mga anak ni Adan nag-aantos ngan namamatay. Paonan-o nagtikang an ngatanan nga pag-antos?— Nagtikang ito tungod han usa nga buwa.

Salit hi Jesus nagsiring nga an Yawa ‘buwaon ngan amay han buwa’! Hiya an siyahan nga nagbuwa. Kon an usa nagbubuwa, iya ginbubuhat an siyahan nga  ginbuhat han Yawa. Sadang hunahunaon naton ini kon inaabat naton nga nasusulay kita ha pagbuwa.​—Juan 8:44.

San-o ka naabat nga nasusulay ka ha pagbuwa?— Diri ba kon nakagbuhat ka hin sayop?— Bisan kon diri mo tinuyo, bangin naguba mo an usa nga butang. Kon pakianhan ka mahitungod hito, masiring ka ba nga an imo bugto an nakaguba hito? O sadang ka ba magbuwa nga diri ka maaram kon paonan-o ito naguba?—

Ano man kon kinahanglan buhaton mo an imo trabaho ha balay kondi bahin la hito an imo ginbuhat? Masiring ka ba nga ginbuhat mo ito ngatanan, bisan kon waray mo buhata?— Sadang hinumdoman naton hi Ananias ngan Sapira. Waray hira magsumat han bug-os nga kamatuoran. Ngan ipinakita han Dios nga maraot gud ito pinaagi han pagpahinabo nga hira mamatay.

Salit anoman an aton buhaton, magigin mas maraot pirme an mga butang kon magbubuwa kita mahitungod hito, ngan diri ngani kita sadang magyakan hin katunga la han kamatuoran. An Biblia nasiring: ‘Pagyakan han kamatuoran.’ Nasiring liwat ito: ‘Diri kamo magbuwa ha usa kag usa.’ Hi Jehova nagsusumat pirme han kamatuoran, ngan naglalaom hiya nga bubuhaton liwat naton ito.​—Efeso 4:25; Kolosas 3:9.