AN IBA nga mga tawo nasiring nga natoo la hira ha ira nakikita. Kondi kalurongan ito. Damu an totoo nga mga butang nga waray pa gud makita han aton mga mata. Maaram ka ba hin usa?—

Kumusta man an hangin nga aton giniginhawa? Inaabat ba naton ito?— Alsaha an imo kamot, ngan huypi ito. May-ada ka ba inabat?— Oo, kondi diri mo nakikita an hangin, diri ba?—

Gin-istoryahan na naton an mahitungod han mga espiritu nga persona, nga diri naton nakikita. Hinbaroan naton nga an pipira mag-opay kondi magraot an iba. Pag-unabi hin pipira nga mag-opay nga mga espiritu nga persona nga diri naton nakikita.— Oo, hi Jehova nga Dios, hi Jesus, ngan an mag-opay nga mga anghel. May-ada ba liwat magraot nga mga anghel?— An Biblia nasiring nga may-ada. Sumati ako han imo hinbaroan na mahitungod ha ira.—

Maaram kita nga an mag-opay ngan magraot nga mga anghel mas makusog kay ha aton. Damu an hinbabaroan han Bantogan nga Magturutdo mahitungod han mga anghel. Tungod ito kay usa hiya nga anghel hadto antes hiya natawo sugad nga bata dinhi ha tuna. Naukoy hiya upod han iba nga mga anghel ha langit. Kilala niya an minilyon ha ira. May-ada ba mga ngaran ini ngatanan nga mga anghel?—

Aw, hinbaroan naton nga ginngaranan han Dios an mga bitoon. Salit sigurado kita nga an ngatanan nga mga anghel may-ada liwat mga ngaran. Ngan maaram kita nga mahimo hira mag-istorya ha usa kag usa tungod kay an Biblia nag-uunabi mahitungod han ‘yinaknan han mga anghel.’ (1 Korinto 13:1) Ha hunahuna mo, ano an gin-iiristoryahan han mga anghel? Nag-iiristorya ba hira mahitungod ha aton nga aanhi ha tuna?—

 Maaram kita nga an mga anghel ni Satanas, an mga demonyo, nangangalimbasog ha pag-impluwensya ha aton nga magtalapas kan Jehova. Salit sigurado nga nag-iiristorya hira kon paonan-o nira bubuhaton ini. Karuyag nira nga magin pariho kita ha ira basi diri liwat maruyag ha aton hi Jehova. Kondi kumusta man an matinumanon nga mga anghel han Dios? Ha hunahuna mo, nag-iiristorya ba liwat hira mahitungod ha aton?— Oo. Karuyag nira nga buligan kita. Isusumat ko ha imo kon paonan-o an iba han mga anghel han Dios binulig ha mga tawo nga nahigugma kan Jehova ngan nag-alagad ha iya.

Pananglitan, may-ada usa ka lalaki hadto nga an ngaran hi Daniel nga nag-ukoy ha Babilonya. Damu nga mga tawo didto an diri nahigugma kan Jehova. Naghimo pa ngani an mga tawo hin balaud nga sisirotan an bisan hin-o nga mag-ampo kan Jehova nga Dios. Kondi hi Daniel waray umundang ha pag-ampo kan Jehova. Maaram ka ba kon ano an ginbuhat nira kan Daniel?—

Oo, iginlabog hi Daniel han magraot nga mga tawo ngadto ha lungib  han mga leon. Nag-usahan didto hi Daniel upod an gutom nga mga leon. Maaram ka ba kon ano an nahitabo hiton nga takna?— “An Dios nagpadara han iya anghel, ngan nagguom han mga baba han mga leon,” siring ni Daniel. Waray gud hiya madaot! An mga anghel makakahimo hin urusahon nga mga butang para hadton nag-aalagad kan Jehova.​—Daniel 6:18-22.

Katapos, may panahon hadto nga napriso hi Pedro. Mahinunumdoman mo nga sangkay hi Pedro han Bantogan nga Magturutdo, hi Jesu-Kristo. An iba nga mga tawo waray malipay han ginsumatan hira ni Pedro nga hi Jesus an Anak han Dios. Salit ginpriso nira hi Pedro. Ginbantayan hi Pedro han mga sundalo ha pagsiguro nga diri hiya makapalagiw. May-ada ba usa nga makakabulig ha iya?—

 Nakaturog hi Pedro ha butnga han duha nga guwardya, ngan nakakadena an iya mga kamot. Kondi an Biblia nasiring: ‘Kitaa! Inabot an anghel ni Jehova, ngan an kalamrag nagtikang sumanag ha prisohan. Ginkablit hi Pedro ha iya kagiliran, ginpukaw hiya han anghel, nga nasiring: “Buhat, dagmit!”’

Dida hito, an mga kadena ni Pedro natangtang ha iya mga kamot! Ngan an anghel nagsiring ha iya: ‘Pagbado, isul-ot an imo mga sandalyas, ngan sunod ha akon.’ An mga guwardya waray makapugong ha ira tungod kay ginbuligan han anghel hi Pedro. Yana inabot hira ha ganghaan nga puthaw, ngan may-ada nahitabo nga urusahon. An ganghaan tigda nga naabrihan! Ginpagawas hi Pedro hiton nga anghel basi makagpadayon hiya ha pagsangyaw.​—Buhat 12:3-11.

Mabubuligan ba liwat kita han mga anghel han Dios?— Oo. Nangangahulogan ba ini nga diri gud nira tutugotan nga madaot kita?— Diri, an mga anghel diri nagpupugong ha aton tikang ha kadaot kon magbuhat kita hin kalurongan. Kondi bisan kon diri kita magbuhat hin kalurongan, mahimo pa gihapon kita madaot. An mga anghel waray sugoa nga pugngan ini nga mahitabo. Lugod, an Dios naghahatag ha ira hin espesyal nga buruhaton.

An Biblia nag-uunabi mahitungod han usa nga anghel nga nagsusumat ha mga tawo ha bisan diin nga singbahon an Dios. (Pahayag 14:​6, 7) Paonan-o iginsusumat ito han anghel ha ira? Nagsisinggit ba hiya tikang ha langit basi makabati ha iya an ngatanan?— Diri, lugod, an mga sumurunod ni Jesus dinhi ha tuna nagsusumat ha iba mahitungod ha Dios, ngan an mga anghel naggigiya ha ira hini nga buruhaton. Ginsisiguro han mga anghel nga adton naruruyag gud mahibaro mahitungod ha Dios magkaada higayon nga makabati. Mahimo kita makigbahin hiton nga pagsangyaw nga buruhaton, ngan an mga anghel mabulig ha aton.

Kondi ano man kon samukon kita han mga tawo nga diri nahigugma ha Dios? Ano man kon prisuhon kita nira? Pagagawson ba kita han mga anghel?— Mahihimo nira. Kondi diri ginbubuhat nira ito pirme.

Priso hadto an sumurunod ni Jesus nga hi Pablo. Sakay hiya ha usa nga sakayan ha panahon han makusog nga bagyo. Kondi an mga anghel waray  magtalwas dayon ha iya. Tungod ini kay may-ada iba pa nga mga tawo nga kinahanglan makabati mahitungod ha Dios. Usa nga anghel an nagsiring: ‘Ayaw kahadlok, Pablo. Kinahanglan umatubang ka kan Cesar.’ Oo, dadad-on hi Pablo ngadto ha magmarando han kalibotan nga hi Cesar basi makagsangyaw hi Pablo ha iya. An mga anghel maaram pirme kon hain hi Pablo, ngan ira ginbuligan hiya. Bubuligan liwat kita nira kon totoo nga nag-aalagad kita ha Dios.​—Buhat 27:23-25.

May-ada pa importante nga pagbubuhaton an mga anghel, ngan bubuhaton nira ito ha diri na maiha. Hirani na hinduro an panahon han Dios ha pagbungkag ha magraot nga mga tawo. Bubungkagon an ngatanan nga diri nagsisingba ha matuod nga Dios. Adton nasiring nga diri hira natoo ha mga anghel tungod kay diri nira nakikita hira, mahibabaro nga nagsayop gud hira.​—2 Tesalonika 1:6-8.

Ano an magigin kahulogan hito para ha aton?— Kon nadapig kita ha mga anghel han Dios, bubuligan kita nira. Kondi nadapig ba kita ha ira?— Oo, kon nag-aalagad kita kan Jehova. Ngan kon nag-aalagad kita kan Jehova, susumatan naton an iba nga mga tawo nga mag-alagad liwat ha iya.