MASAYON ba para ha imo an pag-alagad kan Jehova?— An Bantogan nga Magturutdo waray magsiring nga masayon ito buhaton. Ha gab-i antes patayon hi Jesus, nagsiring hiya ha iya mga apostol: ‘Kon an kalibotan nagdudumot ha iyo, maaram kamo nga ako an gindumtan hito una pa ha iyo.’​—Juan 15:18.

Hi Pedro naghambog nga diri gud niya babayaan hi Jesus, kondi hi Jesus nagsiring nga hi Pedro magninigar ha iya hin tulo ka beses hiton mismo nga gab-i. Ngan ini gud an ginbuhat ni Pedro! (Mateo 26:31-35, 69-75) Paonan-o ito nahitabo?— Nahitabo ito tungod kay nahadlok hi Pedro, ngan sugad man an iba nga mga apostol.

Maaram ka ba kon kay ano nga nahadlok an mga apostol?— Napakyas hira ha pagbuhat hin usa nga butang nga importante hinduro. An paghibaro mahitungod hini makakabulig ha aton nga mag-alagad kan Jehova, anoman an sidngon o buhaton han iba ha aton. Kondi, siyahan, aton repasuhon an nahitabo ha kataposan nga gab-i nga kaupod ni Jesus an iya mga apostol.

Siyahan, ira ginselebrar an Paskua. An Paskua usa ka espesyal nga panihapon nga ginsiselebrar kada tuig ha pagpahinumdom ha katawohan han Dios han ira katalwasan tikang ha pagkauripon ha Ehipto. Katapos, gintikangan ni Jesus an usa pa nga espesyal nga panihapon nga kaupod hira. Aton paghihisgotan ito ha urhi nga kapitulo ngan isasaysay kon paonan-o iton nga panihapon nabulig ha aton nga hinumdoman hi Jesus. Katapos hiton nga panihapon ngan katapos han iya pagdasig ha iya mga apostol, igin-upod hira ni Jesus ngadto ha hardin han Getsemani. Ini an ira paborito nga lugar nga agsob nira bisitahon.

 Hi Jesus naglakat hin hiruhirayo nga nag-uusahan ha hardin basi mag-ampo. Iya ginsidngan liwat hi Pedro, Jakobo, ngan Juan nga mag-ampo. Kondi nahingaturog hira. Tulo ka beses nga linakat hi Jesus nga nag-uusahan basi mag-ampo, ngan tulo ka beses nga binalik hiya nga nakita hi Pedro ngan an iba nga nangangaturog! (Mateo 26:36-47) Maaram ka ba kon kay ano nga sadang magpabilin hira nga nagmamata basi mag-ampo?— Aton pag-istoryahan an mahitungod hini.

Hi Judas Iskariote nakadto ha panihapon han Paskua upod hi Jesus ngan an iba nga mga apostol temprano pa hiton nga gab-i. Sugad han bangin nahinunumdoman mo, hi Judas nagin kawatan. Yana nagin traydor hiya. Maaram hiya han lugar ha hardin han Getsemani diin agsob nga nakikigkita hi Jesus ha iya mga apostol. Salit nagdara hi Judas didto hin mga sundalo basi dakpon hi Jesus. Han nagkaabot hira, hi Jesus nagpakiana ha ira: ‘Hin-o an iyo ginbibiling?’

An mga sundalo binaton: “Hi Jesus.” Hi Jesus diri nahahadlok, salit hiya binaton: ‘Ako hi Jesus.’ Nahipausa gud an mga sundalo ha kaisog ni Jesus salit inisol hira ngan nagkatutumba. Katapos, hi Jesus siniring: ‘Kon ako an iyo ginbibiling, palakta niyo an akon mga apostol.’​—Juan 18:1-9.

Han ginrabot han mga sundalo hi Jesus ngan gin-gapos an iya mga kamot, nahadlok an mga apostol ngan pinalagiw. Kondi karuyag ni Pedro ngan Juan nga mahibaroan kon ano an nahitatabo, salit sinunod hira ha hiruhirayo. Ha kataposan, gindara hi Jesus ha balay ni Kaipas, an hitaas nga saserdote. Tungod kay kilala hi Juan han hitaas nga saserdote, ginpasulod hiya ngan hi Pedro han parabantay han ganghaan ngadto ha bungsaran.

An mga saserdote nagkatirok na ha balay ni Kaipas para ha pagbista. Karuyag nira masiguro nga patayon hi Jesus. Salit nagdara hira hin mga testigo nga nagsusumat hin mga buwa mahitungod ha iya. Ginsuntok han mga tawo hi Jesus ngan gintampalo hiya. Samtang nahitatabo ini ngatanan, nakadto hi Pedro ha hirani.

An surugoon nga babaye, nga parabantay han ganghaan nga nagpasulod kan Pedro ngan Juan, nakatigaman kan Pedro. ‘Ikaw liwat, kaupod ni Jesus!’  siring niya. Kondi nagnigar hi Pedro nga kilala niya hi Jesus. Waray pag-iha, usa pa nga babaye an nakakilala kan Pedro ngan siniring ha mga natukdaw didto: ‘Ini nga tawo kaupod ni Jesus.’ Hi Pedro nagnigar na liwat nga kilala niya hi Jesus. Waray pag-iha, usa ka grupo han mga tawo an nakakita kan Pedro ngan nagsiring ha iya: “Matuod gud, usa ka man ha ira.” Ha ikatulo ka beses hi Pedro nagnigar, nasiring: “Diri ako nakilala hini nga tawo!” Nagsumpa pa ngani hi Pedro nga nagsusumat hiya han kamatuoran, ngan liningi hi Jesus ngan siniplat ha iya.​—Mateo 26:57-75; Lukas 22:54-62; Juan 18:15-27.

Maaram ka ba kon kay ano nga nagbuwa hi Pedro?— Oo, tungod kay nahadlok hiya. Kondi kay ano nga nahadlok hiya? Ano an waray niya buhata ha pagparig-on han iya kaisog? Hunahunaa ito. Ano an ginbuhat ni Jesus basi magin maisugon?— Nag-ampo hiya ha Dios, ngan binuligan hiya han Dios basi magin maisugon. Ngan hinumdumi, tulo ka beses nga nagsiring hi Jesus kan Pedro nga mag-ampo ngan magpabilin nga nagmamata ngan magpadayon nga nagbabantay. Kondi ano an nahitabo?—

Ha kada panahon, nahingaturog hi Pedro. Waray hiya mag-ampo, ngan waray hiya magpadayon ha pagbantay. Salit diri hiya andam han gindakop hi Jesus. Ha urhi ha pagbista, han ginsuntok han mga tawo hi Jesus ngan  nagplano ha pagpatay ha iya, nahadlok gud hi Pedro. Kondi, mga pipira la ka oras antes hito, ano an ginsiring ni Jesus ha iya mga apostol nga malalaoman?— Hi Jesus nagsiring ha ira nga sugad la nga an kalibotan nagdumot ha iya, magdudumot liwat ito ha ira.

Hunahunaon naton yana an mahimo mahitabo ha aton nga pariho han nahitabo kan Pedro. Pananglitan aada ka ha klase ha eskwelahan han an iba nagtitikang magpakaraot han mga tawo nga diri nasaludo ha bandera o diri nagsiselebrar han Pasko. Ano man kon may-ada inatubang ha imo nga nagpapakiana: “Totoo ba nga diri ka nasaludo ha bandera?” O an iba nasiring: “Nakabati kami nga diri ka nagsiselebrar han Pasko!” Mahahadlok ka ba ha pagsumat  han kamatuoran?— Masusulay ka ba ha pagbuwa, sugad han ginbuhat ni Pedro?—

Katapos, nagbasol gud hi Pedro nga nagnigar hiya nga kilala niya hi Jesus. Han nahunahuna niya an iya ginbuhat, ginawas hiya ngan nagtangis. Oo, binalik hiya kan Jesus. (Lukas 22:32) Yana hunahunaa ito. Ano an mabulig ha aton basi diri gud mahadlok nga tungod hito masisiring na naton an pariho han ginsiring ni Pedro?— Hinumdumi, hi Pedro waray mag-ampo ngan waray magpadayon ha pagbantay. Salit, ano an masisiring mo nga kinahanglan buhaton naton basi magin sumurunod han Bantogan nga Magturutdo?—

Kinahanglan gud nga mag-ampo kita kan Jehova para han bulig. Han nag-ampo hi Jesus, maaram ka ba kon ano an ginbuhat han Dios para ha iya?— Nagsugo Hiya hin anghel basi parig-unon hiya. (Lukas 22:43) Makakabulig ba ha aton an mga anghel han Dios?— An Biblia nasiring: “An anghel ni Jehova nakada hin paglibot hadton mga nahahadlok ha iya, ngan iya ginbabawi hira.” (Salmo 34:7) Kondi basi makarawat an bulig han Dios, kinahanglan may-ada kita buhaton gawas pa han pag-ampo para hito. Maaram ka ba kon ano pa an kinahanglan buhaton naton?— Ginsidngan ni Jesus an iya mga sumurunod nga magpabilin nga nagmamata ngan magpadayon nga nagbabantay. Ha hunahuna mo, ano an mabulig ha aton ha pagbuhat hito?—

Kinahanglan mamati kita hin maopay ha ginsisiring ha aton Kristiano nga mga katirok ngan maghatag hin atensyon ha aton ginbabasa ha Biblia. Kondi kinahanglan regular nga mag-ampo liwat kita kan Jehova ngan maghangyo ha iya nga buligan kita nga mag-alagad ha iya. Kon aton buhaton ito, kakarawaton naton an bulig basi madaog an aton kahadlok. Niyan magigin malipayon kita kon may-ada kita higayon ha pagsumat ha iba mahitungod han Bantogan nga Magturutdo ngan han iya Amay.