HAN daku na hi Jesus ngan nahibaro kon paonan-o ginpanalipdan hiya han gutiay pa hiya, ha hunahuna mo, nag-ampo ba hiya kan Jehova ngan nagpasalamat ha iya?— Ano ha hunahuna mo an bangin ha urhi ginsiring ni Jesus kan Maria ngan Jose han hinbaroan niya nga ira gintalwas an iya kinabuhi pinaagi han pagdad-a ha iya ngadto ha Ehipto?—

Siyempre, hi Jesus diri na bata yana. Diri na ngani hiya nag-uukoy ha tuna sugad hadto. Kondi naoobserbahan mo ba nga yana nga panahon an iba nga mga tawo baga in naghuhunahuna kan Jesus sugad nga usa la nga bata dida ha tubungan?— Totoo ini ha panahon han Pasko kay ha damu nga mga lugar nakikita an mga retrato ni Jesus sugad nga bata.

Bisan kon hi Jesus diri na nag-uukoy ha tuna, natoo ka ba nga buhi hiya?— Oo, ginbanhaw hiya tikang ha mga minatay, ngan gamhanan na hiya yana nga Hadi ha langit. Ha hunahuna mo, ano an mahihimo niya basi panalipdan adton nag-aalagad ha iya?— Tagda pananglitan, han nakanhi hi Jesus ha tuna, ipinakita niya kon paonan-o niya mapapanalipdan adton nahigugma ha iya. Aton kitaon kon paonan-o niya ginbuhat ito usa ka adlaw han nasakay hiya ha usa nga baluto upod an iya mga disipulo.

 Tikagab-i na hadto. Nagtinutdo hi Jesus ha bug-os nga adlaw ha ligid han Dagat han Galilea, usa ka haluag nga danaw nga mga 20 kilometro an kahilaba ngan 12 kilometro an kahaluag. Yana nagsiring hiya ha iya mga disipulo: ‘Kadto kita ha tabok han danaw.’ Salit sinakay hira ha baluto ngan nagtikang tumabok ha danaw. Nakapoy hinduro hi Jesus, salit kinadto hiya ha durho han baluto ngan hinigda ha ulonan. Nahingaturog dayon hiya.

An mga disipulo nagpabilin nga nagmamata basi magpadayon ha paglayag an baluto. Maopay anay an kahimtang han ngatanan, kondi nagkusog an hangin. Padayon nga nagtikakusog ito, ngan an mga balod nagtikadagku. An mga balod nagtikang sumablig ha sulod han baluto, ngan an baluto nagtikang mapuno hin tubig.

Nahadlok an mga disipulo nga malulunod hira. Kondi hi Jesus diri nahahadlok. Nakaturog pa gihapon hiya ha durho han baluto. Ha kataposan, ginpukaw hiya han mga disipulo, ngan nagsiring: ‘Magturutdo, Magturutdo, luwasa kami; mamamatay na kami hini nga bagyo.’ Dida hito, binuhat hi Jesus ngan nagyakan ha hangin ngan ha mga balod. ‘Murayaw! Maglinaw ka!’ siring niya.

 Inundang dayon an hangin, ngan naglinaw an danaw. Nahipausa an mga disipulo. Waray pa hira makakita hin sugad hito hadto. Nagtikang hira magsiring ha usa kag usa: “Hin-o ba ini, nga iya ginsugo bisan an hangin ngan an tubig, ngan hira nagtutuman ha iya?”​—Lukas 8:22-25; Markos 4:35-41.

Maaram ka ba kon hin-o hi Jesus?— Maaram ka ba kon diin niya nakuha an iya daku nga gahum?— An mga disipulo diri unta sadang mahadlok han kaupod nira didto hi Jesus, kay hi Jesus diri ordinaryo nga tawo. Mahihimo niya an urusahon nga mga butang nga diri mahihimo han iba nga tawo. Isusumat ko ha imo an mahitungod han usa pa nga ginbuhat niya hadto ha mabagyo nga dagat.

Tikakulop na, ha lain nga adlaw. Han gab-i na, ginsidngan ni Jesus an iya mga disipulo nga sumakay ha baluto ngan mag-una ha iya ngadto ha tabok han dagat. Katapos, sinagka hi Jesus ha bukid nga nag-uusahan. Mamingaw ito nga lugar diin makakag-ampo hiya ha iya Amay, hi Jehova nga Dios.

 Sinakay an mga disipulo ha baluto ngan nagtikang tumabok ha dagat. Kondi waray pag-iha nagtikang humangin. Nagtikakusog gud ito. Gab-i na. Igin-ubos han kalalakin-an an layag ngan nagtikang magbugsay. Kondi diri hira naursa ha hirayo tungod kay nasungsong ha ira an makusog nga hangin. An baluto nagbalik-balik ha dagku nga mga balod, ngan an tubig nasablig ngada hito. An kalalakin-an nangalimbasog gud nga makaabot ha baybayon, kondi diri nira mahihimo.

Nag-uusahan pa gihapon hi Jesus ha bukid. Maiha na hiya didto. Kondi yana nakikita niya an iya mga disipulo nga namimeligro ha dagku nga mga balod. Salit linusad hiya tikang ha bukid pakadto ha baybayon han dagat. Karuyag ni Jesus nga buligan an iya mga disipulo, salit nagtikang hiya maglakat pakadto ha ira ha bawbaw han mabagyo nga dagat!

Ano an mahitatabo kon sarihan mo maglakat ha bawbaw han tubig?— Malunód ka, ngan bangin malumos ka. Kondi naiiba hi Jesus. May-ada hiya espesyal nga gahum. Hirayo an ginlakat ni Jesus basi makaabot ha baluto. Salit kaagahon na han makita han mga disipulo nga tiarabot hi Jesus ngada ha ira ha bawbaw han tubig. Kondi diri hira makatoo ha ira nakikita. Nahadlok gud hira, ngan nagsinggit hira tungod ha ira kahadlok. Katapos, hi Jesus nagsiring ha ira: ‘Magin maisugon kamo, ako ini, ayaw kamo kahadlok.’

Ha pagsakay gud ni Jesus ha baluto, inundang an bagyo. Nahipausa utro an mga disipulo. Yinukbo hira ha atubangan ni Jesus ngan nagsiring: “Ikaw an Anak han Dios.”​—Mateo 14:22-33; Juan 6:16-21.

Diri ba makaruruyag an mabuhi hadto nga panahon ngan makita hi Jesus nga nagbubuhat han mga butang sugad hito?— Maaram ka ba kon kay ano nga ginbuhat ni Jesus iton milagroso nga mga butang?— Iya ginbuhat ito nga mga butang tungod kay nahigugma hiya ha iya mga disipulo ngan karuyag niya nga buligan hira. Kondi iya ginbuhat liwat ito nga mga milagro basi ipakita an iya daku nga gahum ngan gagamiton niya ha tidaraon sugad nga Magmarando ha Ginhadian han Dios.

 Bisan yana nga panahon agsob nga ginagamit ni Jesus an iya gahum ha pagpanalipod ha iya mga sumurunod tikang ha mga pangalimbasog ni Satanas ha pagpaundang ha ira ha pagsumat ha iba mahitungod han Ginhadian han Dios. Kondi diri ginagamit ni Jesus an iya gahum ha pagpanalipod ha iya mga disipulo tikang ha sakit o pagtambal ha ira kon hira masakit. Bisan an ngatanan nga apostol ni Jesus ha kataposan nagkamatay. An bugto ni Juan nga hi Jakobo ginpatay, ngan hi Juan mismo ginpriso.​—Buhat 12:2; Pahayag 1:9.

Pariho man yana nga panahon. Nag-aalagad man an mga tawo kan Jehova o diri, hira ngatanan nagkakasakit ngan namamatay. Kondi diri na mag-iiha, durante han pagmando ni Jesus sugad nga Hadi han gobyerno han Dios, magigin iba na an mga kahimtang. Hiton nga panahon waray na mahahadlok, tungod kay gagamiton ni Jesus an iya gahum ha pagbendisyon ha ngatanan nga nasugot ha iya.​—Isaias 9:​6, 7.