SIGURADO ako nga mauyon ka nga mas hitaas an iba, o mas bantogan ngan mas makusog, kay ha imo ngan ha akon. Hin-o an masisiring mo nga mas hitaas kay ha aton?— Hi Jehova nga Dios. Kumusta man an iya Anak, an Bantogan nga Magturutdo? Mas hitaas ba hiya kay ha aton?— Siyempre.

Hi Jesus nabuhi upod han Dios ha langit. Espiritu hiya nga Anak, o anghel. Naghimo ba an Dios hin iba nga mga anghel, o espiritu nga mga anak?— Oo, damu ka milyon an iya ginhimo. Mas hitaas liwat ngan mas gamhanan ini nga mga anghel kay ha aton.​—Salmo 104:4; Daniel 7:10.

Nahinunumdom ka ba han ngaran han anghel nga nakiistorya kan Maria?— Hi Gabriel. Hiya nagsiring kan Maria nga an iya anak magigin Anak han Dios. Iginbutang han Dios an kinabuhi han iya espiritu nga Anak ha tiyan ni Maria basi matawo hi Jesus sugad nga bata dinhi ha tuna.​—Lukas 1:​26, 27.

Natoo ka ba hito nga milagro? Natoo ka ba nga hi Jesus nabuhi na upod han Dios ha langit?— Hi Jesus nagsiring nga nabuhi na hiya. Paonan-o nahibaro hi Jesus mahitungod hito nga mga butang? Aw, han bata pa hiya, posible nga ginsumatan hiya ni Maria han ginsiring ni Gabriel. Posible nga ginsumatan liwat ni Jose hi Jesus nga an Dios an iya totoo nga Amay.

Han ginbawtismohan hi Jesus, an Dios nagyakan pa ngani tikang ha langit, nasiring: ‘Ini an akon  Anak.’ (Mateo 3:17) Ngan ha gab-i antes hiya mamatay, hi Jesus nag-ampo: “Amay, himayaa ako upod ha imo ngahaw sugad han paghimaya ko han upod pa ako nimo, han waray pa an kalibotan.” (Juan 17:5) Oo, naghangyo hi Jesus nga ibalik hiya basi mag-ukoy utro upod han Dios ha langit. Paonan-o hiya makakaukoy didto?— Pinaagi la kon himoon utro ni Jehova nga Dios hiya nga diri-nakikita nga espiritu nga persona, o anghel.

Yana may-ada ako importante nga pakiana ha imo. Maopay ba an ngatanan nga mga anghel? Ano ha hunahuna mo?— Aw, ha usa ka panahon ha naglabay, maopay hira ngatanan. Tungod ini kay ginhimo hira ni Jehova, ngan maopay an ngatanan nga iya ginhihimo. Kondi an usa han mga anghel nagin maraot. Paonan-o ito nahitabo?

Basi mabaton ito, kinahanglan balikon naton an panahon han ginhimo han Dios an siyahan nga lalaki ngan babaye, hi Adan ngan Eva. An iba nga mga tawo nasiring nga surumatanon la an istorya mahitungod ha ira. Kondi maaram an Bantogan nga Magturutdo nga totoo ito.

Han ginhimo han Dios hi Adan ngan Eva, iya iginbutang hira ha matahom nga hardin ha lugar nga tinawag nga Eden. Usa ito nga parke, usa nga paraiso. Nagkaada unta hira damu nga mga anak, usa ka daku nga pamilya, ngan nabuhi unta ha Paraiso ha kadayonan. Kondi may-ada importante nga leksyon nga kinahanglan nira hibaroan. Ginhisgotan na naton ito. Kitaon naton kon mahinunumdoman naton ito.

 Hi Jehova nagsiring kan Adan ngan Eva nga mahimo nira kaunon an ngatanan nga prutas nga karuyag nira tikang ha kakahoyan ha hardin. Kondi may-ada usa nga kahoy nga kinahanglan diri hira kumaon tikang hito. An Dios nagsumat ha ira han mahitatabo kon hira kumaon. Hiya nagsiring: “Ikaw gud mamamatay.” (Genesis 2:17) Salit, ano an leksyon nga kinahanglan hibaroan ni Adan ngan Eva?—

An leksyon han pagsugot. Oo, an kinabuhi nadepende ha pagsugot kan Jehova nga Dios! Diri igo na nga hi Adan ngan Eva magsiring la nga masugot hira ha iya. Kinahanglan ipakita nira nga masugot hira pinaagi han mga butang nga ira ginbuhat. Kon sumugot hira ha Dios, ipapakita unta nira nga hira nahigugma ha iya ngan karuyag nira hiya nga magin ira Magmarando. Katapos, mahimo unta hira mabuhi ha Paraiso ha kadayonan. Kondi kon kumaon hira tikang hito nga kahoy, ano an ipapakita hito?—

Ipapakita hito nga diri gud hira mapasalamaton ha iginhatag ha ira han Dios. Masugot ka ba kan Jehova kon nakadto ka didto?— Ha siyahan, sinugot hi Adan ngan Eva. Kondi an usa nga mas hitaas ha ira naglimbong kan Eva. Nakombinse niya hi Eva nga magtalapas kan Jehova. Hin-o hiya?—

 An Biblia nasiring nga usa nga halas an nakiistorya kan Eva. Kondi maaram ka nga an halas diri nakakayakan. Salit paonan-o ito nakagyakan?— Ginpahinabo han usa nga anghel nga an halas an baga in nagyayakan. Kondi an anghel an tinuod nga nagyayakan. An anghel nagtikang na maghunahuna hin magraot nga mga butang. Karuyag niya nga hi Adan ngan Eva magsingba ha iya. Karuyag niya nga sumugot hira ha iya. Karuyag niya nga agawon an posisyon han Dios.

Salit iginbutang hiton maraot nga anghel an sayop nga mga ideya ha hunahuna ni Eva. Pinaagi han halas, hiya nagsiring kan Eva: ‘An Dios waray magsumat ha iyo han kamatuoran. Diri kamo mamamatay kon kumaon kamo han bunga hito nga kahoy. Magigin maaramon kamo pariho han Dios.’ Matoo ka ba ha ginsiring hiton nga tingog?—

Hi Eva nagtikang maruyag ha usa ka butang nga waray ihatag han Dios ha iya. Iya ginkaon an bunga hiton igindiri nga kahoy. Katapos, iya gintagan hi Adan. Waray tumoo hi Adan ha ginsiring han halas. Kondi an iya hingyap nga makaupod hi Eva mas makusog kay ha iya gugma ha Dios. Salit kinaon liwat hiya han bunga han kahoy.​—Genesis 3:1-6; 1 Timoteo 2:14.

Ano an resulta?— Hi Adan ngan Eva nagin diri-hingpit, nalagas, ngan namatay. Ngan tungod kay hira diri-hingpit, an ngatanan nga ira mga anak diri-hingpit  liwat ngan ha kataposan nalagas ngan namatay. An Dios waray magbuwa! An kinabuhi nadepende gud ha pagsugot ha iya. (Roma 5:12) An Biblia nagsusumat ha aton nga an anghel nga nagbuwa kan Eva tinatawag nga Satanas nga Yawa, ngan an iba nga mga anghel nga nagin maraot tinatawag nga mga demonyo.​—Jakobo 2:19; Pahayag 12:9.

Nasasabtan mo na ba kon kay ano nga an maopay nga anghel nga ginhimo han Dios nagin maraot?— Tungod ito kay nagtikang hiya maghunahuna hin magraot nga mga butang. Karuyag niya magin Numero Uno. Maaram hiya nga an Dios nagsugo kan Adan ngan Eva nga magkaada mga anak, ngan karuyag niya nga hira ngatanan magsingba ha iya. Karuyag han Yawa nga an ngatanan magtalapas kan Jehova. Salit nangangalimbasog hiya nga ibutang an magraot nga mga ideya ha aton mga hunahuna.​—Jakobo 1:13-15.

An Yawa nasiring nga waray gud totoo nga nahigugma kan Jehova. Nasiring hiya nga ikaw ngan ako diri nahigugma ha Dios ngan nga diri totoo nga karuyag naton buhaton an ginsisiring han Dios. Nasiring hiya nga nasugot la kita kan Jehova kon nahitatabo an ngatanan sumala han aton karuyag. Husto ba an Yawa? Sugad ba kita hito?

An Bantogan nga Magturutdo nagsiring nga an Yawa buwaon! Pinamatud-an ni Jesus nga totoo nga hinigugma niya hi Jehova pinaagi han pagsugot ha Iya. Ngan hi Jesus diri kay nasugot la ha Dios kon masayon ito. Nasugot hiya ha ngatanan nga panahon, bisan kon an iba nga mga tawo nagpapakuri ha iya ha pagbuhat hito. Pinamatud-an niya nga maunungon hiya kan Jehova tubtob ha iya kamatayon. Salit ginbanhaw hiya han Dios basi mabuhi ha kadayonan.

Salit hin-o an masisiring mo nga aton gidadakui nga kaaway?— Oo, hi Satanas nga Yawa. Makikita mo ba hiya?— Siyempre diri! Kondi maaram kita nga hiya naeksister ngan mas hitaas ngan mas gamhanan hiya kay ha aton. Kondi, hin-o an mas hitaas ha Yawa?— Hi Jehova nga Dios. Salit maaram kita nga an Dios makakapanalipod ha aton.