MAY kilala ka ba nga karuyag magin una pirme?— Bangin iduso niya an iba basi hiya an magin una ha linya. Nakakita ka na ba nga nahitabo ito?— An Bantogan nga Magturutdo nakakita hin mga adulto pa ngani nga nangangalimbasog nga makuha an una, o pinakaimportante nga mga lugar. Ngan waray hiya malipay hito. Aton kitaon kon ano an nahitabo.

An Biblia nagsusumat ha aton nga gindapit hi Jesus ha usa nga panagtawo ha balay han usa nga Pariseo, nga usa ka importante nga lider ha relihiyon. Pag-abot ni Jesus, nagtikang hiya magkita ha iba nga mga bisita nga nagkakasulod ngan nagpipili han gimaopayi nga mga lugar. Salit iya iginsumat an usa nga istorya ha mga bisita. Karuyag mo ba mabatian ito?—

 Hi Jesus nagsiring: ‘Kon may-ada magdapit ha imo ngadto ha panagtawo han kasal, ayaw pilia an gimaopayi, o pinakaimportante nga lugar.’ Maaram ka ba kon kay ano nga ginsiring ito ni Jesus?— Iya iginsaysay nga bangin may-ada gindapit nga mas importante. Salit, sugad han makikita mo ha retrato, an nag-andam han panagtawo dinaraon ngan nagsiring: ‘Ihatag hini nga tawo an lugar, ngan kadto didto.’ Ano an aabaton han bisita?— Maaawod hiya tungod kay an ngatanan nga iba nga mga bisita magkikita ha iya nga nabalhin ha minos nga lugar.

Ipinapakita ni Jesus nga diri husto an paghingyap han gimaopayi nga lugar. Salit hiya nagsiring: ‘Kon dapiton ka ha panagtawo han kasal, kadto, ngan lingkod ha kataposan nga lugar, basi kon umabot an nagdapit ha imo, hiya masiring ha imo: Sangkay, saka ngadto ha iruigbaw. Niyan pagdadayawon ka ha atubangan han mga nanlilingkod ha may lamesa kaupod nimo.’​—Lukas 14:​1, 7-11.

Nasabtan mo ba an punto han istorya ni Jesus?— Aton tagdon an usa nga ehemplo basi makita kon nasabtan mo. Handurawa nga tisakay ka ha bus nga puno hin mga tawo. Sadang ka ba magdagmit basi ka makalingkod ngan pasagdan an lagas nga tawo nga tumindog?— Malilipay ba hi Jesus kon buhaton mo ito?—

Bangin may-ada sumiring nga diri interesado hi Jesus kon ano an aton ginbubuhat. Kondi natoo ka ba hito?— Han nakadto hi Jesus hiton nga panagtawo ha balay han Pariseo, iya ginkita an mga tawo samtang nagpipili hira han ira mga lingkoran. Diri ba interesado liwat hiya ha aton ginbubuhat yana?— Yana nga hi Jesus aadto na ha langit, sigurado nga mas nakikita niya kita.

Kon an usa nangangalimbasog nga mahiuna, makakahimo ito hin mga problema. Agsob nga may-ada paglantugi, ngan nasisina an mga tawo.  Usahay nahitatabo ini kon magkaupod an kabataan nga nasakay ha bus. Ha pag-abre gud han mga purtahan han bus, an kabataan nagdadagmit nga mahiuna. Karuyag nira an gimaopayi nga mga lingkoran, an hirani ha mga bintana. Ano an mahimo mahitabo katapos?— Oo, bangin masina hira ha usa kag usa.

An paghingyap nga mahiuna makakahimo hin damu nga problema. Nakahimo pa ngani ito hin problema ha mga apostol ni Jesus. Sugad han aton hinbaroan ha Kapitulo 6 hini nga libro, naglantugi hira kon hin-o an pinakaimportante. Ano an ginbuhat ni Jesus katapos?— Oo, iya ginsaway hira. Kondi ha urhi naglantugi na liwat hira. Kitaon naton kon paonan-o ito nagtikang.

An mga apostol, upod an iba, nagbibiyahe upod ni Jesus ha ultimo nga panahon ngadto ha siyudad han Jerusalem. Hi Jesus nag-iistorya ha ira mahitungod han iya Ginhadian, salit hi Jakobo ngan Juan naghunahuna mahitungod han pagmando upod niya sugad nga mga  hadi. Iginsumat pa ngani nira ha ira iroy, hi Salome, an mahitungod hito. (Mateo 27:56; Markos 15:40) Salit han tikadto hira ha Jerusalem, dinaop hi Salome kan Jesus, yinukbo ha iya atubangan, ngan naghangyo hin pabor.

“Ano an karuyag mo?” nagpakiana hi Jesus. Binaton hiya nga karuyag niya nga tugotan ni Jesus an iya mga anak nga lumingkod sapit niya ha iya Ginhadian, an usa ha iya too ngan an usa pa ha iya wala. Aw, han hinbaroan han napulo nga iba nga mga apostol an ginpahangyo ni Jakobo ngan Juan ha ira iroy, ano ha hunahuna mo an ira inabat?—

Oo, nasina gud hira kan Jakobo ngan Juan. Salit hi Jesus naghatag ha ngatanan niya nga apostol hin maopay nga sagdon. Hi Jesus nagsiring ha ira nga an mga magmarando han mga nasud karuyag gud nga magin gamhanan ngan importante. Karuyag nira magkaada hitaas nga katungdanan diin an  ngatanan nasugot ha ira. Kondi hi Jesus nagsumat ha iya mga sumurunod nga diri hira sadang magin sugad hito. Lugod, hi Jesus nagsiring: ‘Bisan hin-o nga karuyag mahiuna ha iyo amo lugod an magin iyo uripon.’ Hunahunaa ito!​—Mateo 20:20-28.

Maaram ka ba kon ano an ginbubuhat han usa nga uripon?— Nagsiserbi hiya ha iba nga tawo, diri naglalaom nga pagserbihan hiya han iba. Napakadto hiya ha pinakaminos nga lugar, diri ha una nga lugar. Nagios hiya sugad nga usa nga diri importante, diri an pinakaimportante. Ngan hinumdumi, hi Jesus nagsiring nga an usa nga karuyag magin una sadang gumios pariho hin uripon ha iba.

Yana, ano ha hunahuna mo an kahulogan hito para ha aton?— Makikiglantugi ba an uripon ha iya agaron kon hin-o an angay makakuha han gimaopayi nga lingkoran? O makikiglantugi ba hiya kon hin-o an una nga makaon? Ano ha hunahuna mo?— Iginsaysay ni Jesus nga inuuna pirme han uripon an iya agaron.​—Lukas 17:7-10.

Salit imbes nga mangalimbasog nga magin una, ano an sadang naton buhaton?— Oo, sadang kita magin pariho hin uripon ha iba. Ngan nangangahulogan ito nga inuuna naton an iba kay ha aton kalugaringon. Nangangahulogan ito nga gintatagad naton an iba nga mas importante kay ha aton. May-ada ka ba nahuhunahuna nga mga paagi nga mahimo mo unahon an iba?— Kay ano nga diri balikon an pahina 40 ngan 41 ngan kitaon utro an pipira nga mga paagi nga mahimo mo unahon an iba pinaagi han pagserbi ha ira.

Mahinunumdoman mo nga gin-una han Bantogan nga Magturutdo an iba kay ha iya kalugaringon pinaagi han pagserbi ha ira. Ha kataposan nga gab-i nga kaupod niya an iya mga apostol, linuhod pa ngani hiya ngan ginhugasan an ira mga tiil. Kon aton unahon liwat an iba pinaagi han pagserbi ha ira, lilipayon naton an Bantogan nga Magturutdo ngan an iya Amay, hi Jehova nga Dios.