ANO an naruruyagan mo gud, magtrabaho o mag-uyag?— Oo, diri maraot an pag-uyag. An Biblia nag-uunabi nga an Jerusalem “puno hin kabataan nga kalalakin-an ngan kabataan nga kababayin-an nga nag-uuyag ha kakalsadahan hini.”​—Sakarias 8:5.

An Bantogan nga Magturutdo nalipay pagkinita ha kabataan nga nag-uuyag. Antes hiya kumanhi ha tuna, hiya nagsiring: ‘Hadto dida ako ha hirani han Dios sugad hin labaw nga magburuhat, nga malipayon pirme ha iya atubangan.’ Tigamni nga hi Jesus usa nga magburuhat kaupod ni Jehova ha langit. Ngan han nakadto pa hiya didto, hiya nagsiring: “An akon kalipay aada ha mga anak han mga tawo.” Oo, sugad han aton hinbaroan hadto, an Bantogan nga Magturutdo interesado ha ngatanan, upod na an mga batan-on.​—Proberbios 8:​30, 31.

 Ha hunahuna mo, nag-uyag ba hi Jesus han bata pa hiya?— Sigurado nga nag-uyag hiya. Kondi tungod kay hiya ‘usa ka maabtik nga magburuhat’ ha langit, nagtrabaho ba liwat hiya dinhi ha tuna?— Aw, hi Jesus gintawag nga “anak han panday.” Kondi gintawag liwat hiya nga “an panday.” Ano an ipinapakita hini?— Hi Jose, nga nagmangno kan Jesus sugad nga iya anak, sigurado nga nagtutdo ha iya. Salit hi Jesus nagin panday liwat.​—Mateo 13:55; Markos 6:3.

Ano nga klase hin panday hi Jesus?— Tungod kay maabtik nga magburuhat hiya ha langit, ha hunahuna mo, nagin maabtik ba hiya nga panday dinhi ha tuna?— Tagda an makuri nga trabaho han usa nga panday hadto nga panahon. Bangin nagawas hi Jesus ngan nagpupulod hin kahoy, gin-uutod-utod an kahoy, gindadara an tabla ha balay, ngan  katapos ginhihimo an tabla nga mga lamesa, mga lingkoran, ngan iba pa nga mga butang.

Ha hunahuna mo, nakalipay ba kan Jesus ini nga trabaho?— Malilipay ka ba kon makahimo ka hin mag-opay nga mga lamesa ngan mga lingkoran ngan iba pa nga mga butang nga magagamit han mga tawo?— An Biblia nasiring nga maopay para ha usa nga ‘magin malipayon ha iya mga buruhaton.’ An trabaho naghahatag hin klase hin kalipay nga diri mo makakarawat tikang ha pag-uyag.​—Eklesiastes 3:22.

Oo, mapulsanon an trabaho para ha aton mga hunahuna ngan ha aton mga lawas. Damu nga kabataan an nagliliningkod la ngan nagkikita ha TV o nag-uuyag hin mga video game. Nagtatambok hira hinduro ngan nagigin maluya, ngan diri gud hira malipayon. Ngan diri liwat nira napapalipay an iba. Ano an kinahanglan buhaton naton basi magin malipayon?—

Aton hinbaroan ha Kapitulo 17 hini nga libro nga an paghatag ngan pagbuhat hin mga butang basi buligan an iba nagdadara hin kalipay. (Buhat 20:35) Tinatawag han Biblia hi Jehova nga ‘malipayon nga Dios.’ (1 Timoteo 1:11) Ngan, sugad han aton mababasa ha Proberbios, hi Jesus “malipayon pirme ha iya atubangan.” Kay ano nga malipayon hi Jesus?— Aw, iya iginhatag an usa han mga hinungdan han hiya nagsiring: “An akon Amay nagbubuhat ngada yana; ngan ako nagbubuhat.”​—Juan 5:17.

Han nakanhi hi Jesus ha tuna, waray hiya magtrabaho sugad nga panday ha iya bug-os nga kinabuhi. Hi Jehova nga Dios may-ada espesyal nga buruhaton para ha iya dinhi ha tuna. Maaram ka ba kon ano ito?— Hi Jesus nagsiring: “Kinahanglan isangyaw ko an maopay nga sumat han ginhadian han Dios, kay tungod hini ako ginsugo.” (Lukas 4:43) Usahay han nagsangyaw hi Jesus ha mga tawo, tinoo hira ha iya ngan iginsumat ha iba an mga butang nga iya ginsiring, sugad han makikita mo dinhi ha retrato nga ginbuhat hini nga Samaritana.​—Juan 4:7-15, 27-30.

Ano an inabat ni Jesus ha pagbuhat hini nga buruhaton? Ha hunahuna mo, karuyag ba niya nga buhaton ito?— Hi Jesus nagsiring: “An akon karan-on amo an pagbuhat han kaburut-on han nagpakanhi ha akon, ngan  paghuman han iya buhat.” (Juan 4:34) Mationan-o kadaku an imo pagkaruyag nga kaunon an paborito mo nga pagkaon?— Naghahatag ini ha imo hin ideya kon mationan-o kadaku an pagkaruyag ni Jesus ha trabaho nga iginpabuhat han Dios ha iya.

Ginhimo kita han Dios basi mahibaro nga an pagtrabaho nabulig ha aton basi kita magmalipayon. Nasiring hiya nga an Iya regalo ha tawo amo nga sadang hiya ‘magrayhak ha iya makuri nga trabaho.’ Salit kon mahibaro ka ha pagtrabaho samtang bata ka pa, an imo bug-os nga kinabuhi magigin mas makalilipay.​—Eklesiastes 5:19.

Diri ito nangangahulogan nga mahihimo han bata an trabaho han mas edaran nga tawo, kondi mahihimo naton ngatanan an pipira nga trabaho. An imo mga ginikanan bangin nagawas kada adlaw basi magtrabaho ngan magkaada kwarta para han pagkaon ngan balay nga uukyan han iyo pamilya. Ngan sugad han sadang mo hibaroan, damu an trabaho nga kinahanglan buhaton ha balay basi matipigan ito nga mahamis ngan limpyo.

Ano nga trabaho an mahihimo mo nga mapulsanon ha bug-os nga pamilya?— Makakabulig ka ha pag-andam han lamesa, paghugas han mga pinggan, paglabog han basura, paglimpyo han imo kuwarto, ngan paghipos han imo mga uyagan. Bangin ginbubuhat mo na an iba hito nga mga butang. Ito nga trabaho tinuod nga mapulsanon ha pamilya.

Kitaon naton kon kay ano nga mapulsanon ito nga trabaho. An mga uyagan kinahanglan hipuson katapos mo mag-uyag. Kay ano nga masisiring mo nga importante ini?— Nabulig ito ha pagtipig han balay nga mahamis, ngan magpupugong liwat ito han mga aksidente. Kon diri mo puruton an imo mga uyagan, bangin sumulod an imo nanay ha kuwarto nga may-ada dara-dara ngan matamakan an usa hito. Bangin mahipalindas hiya ngan matumba ngan masul-an hiya. Bangin maospital pa ngani hiya. Diri ba makuri ito?— Salit kon hipuson mo an imo mga uyagan katapos mo mag-uyag, mapulsanon ito ha ngatanan.

May-ada iba nga trabaho nga kinahanglan buhaton liwat han kabataan. Pananglitan, an trabaho ha eskwelahan. Ha eskwelahan nahibabaro  ka magbasa. Para ha iba nga kabataan makaruruyag an pagbasa, kondi nakukurian hito an iba. Bisan kon baga in makuri ito ha siyahan, malilipay ka kon mahibaro ka ha pagbasa hin maopay. Kon maaram ka magbasa, damu an makaruruyag nga mga butang nga imo mahibabaroan. Mababasa mo pa ngani an libro han Dios, an Biblia. Salit kon buhaton mo hin maopay an imo trabaho ha eskwelahan, mapulsanon gud ito, diri ba?—

An iba nga mga tawo naglilikay ha pagtrabaho. Bangin may kilala ka nga sugad hito. Kondi tungod kay ginhimo kita han Dios basi magtrabaho, kinahanglan mahibaro kita kon paonan-o magigin malipayon ha pagtrabaho. Mationan-o kadaku an kalipay han Bantogan nga Magturutdo ha iya trabaho?— Pariho ito hin pagkaon han iya paborito nga pagkaon. Ngan ano nga trabaho an iya karuyag sidngon?— An pagsumat ha iba mahitungod kan Jehova nga Dios ngan kon paonan-o makakarawat nira an kinabuhi nga waray kataposan.

Salit may-ada makakabulig ha aton basi malipay kita ha trabaho. Pakianhi an imo kalugaringon, ‘Kay ano nga kinahanglan mahuman ini nga trabaho?’ Kon maaram ka kon kay ano nga importante an usa nga butang, mas mapapagios ka nga buhaton ito. Ngan daku man o gutiay an trabaho, buhata ito hin maduruto. Kon buhaton mo ito, malilipay ka ha buhat han imo mga kamot, sugad la han inabat han aton Bantogan nga Magturutdo.