MAY-ADA na ba naghangyo ha imo nga buhaton an usa ka butang nga sayop?— Gin-ayat ka ba niya nga buhaton ito? O nagsiring ba hiya nga makalilipay ito ngan diri gud sayop an pagbuhat hito?— Kon may-ada usa nga magbuhat hini ha aton, nangangalimbasog hiya nga sulayon kita.

Ano an sadang buhaton naton kon ginsusulay kita? Sadang ba kita sumunod ngan buhaton an sayop?— Diri ito makakalipay kan Jehova nga Dios. Kondi maaram ka ba kon hin-o an malilipay?— Oo, hi Satanas nga Yawa.

Hi Satanas an kaaway han Dios, ngan kaaway liwat naton hi Satanas. Diri naton hiya makikita tungod kay espiritu hiya. Kondi nakikita niya kita. Usa ka adlaw an Yawa nakiistorya kan Jesus, an Bantogan nga Magturutdo, ngan nagsari ha pagsulay ha iya. Kitaon naton kon ano an ginbuhat ni Jesus. Katapos, hibabaroan naton an husto nga pagbubuhaton kon ginsusulay kita.

Karuyag pirme ni Jesus nga buhaton an kaburut-on han Dios. Dayag nga ipinakita niya ini pinaagi han pagpabawtismo ha Salog Jordan. Katapos gud han bawtismo ni Jesus, hi Satanas nagsari dayon ha pagsulay ha Iya. An Biblia nasiring nga “an mga langit nabuksan” kan Jesus. (Mateo 3:16) Nangahulogan ini nga nahinumdoman na yana ni Jesus an ngatanan mahitungod han iya kinabuhi hadto ha langit kaupod han Dios.

 Katapos han iya bawtismo, nagpakadto hi Jesus ha kamingawan basi maghunahuna han mga butang nga iya na nahinumdoman. Kuwarenta ka adlaw ngan gab-i an naglabay. Hinin bug-os nga panahon hi Jesus waray kumaon hin bisan ano, salit nagugutom na gud hiya yana. Hini nga takna, nagsari hi Satanas ha pagsulay kan Jesus.

An Yawa nagsiring: “Kon ikaw anak han Dios, sugoa ini nga mga bato nga mahimo nga tinapay.” Marasa gud unta an pipira nga tinapay! Kondi mahihimo ba ni Jesus nga an mga bato magin tinapay?— Oo, mahihimo niya. Kay ano? Tungod kay hi Jesus, an Anak han Dios, may-ada espesyal nga mga gahum.

Hihimoon mo ba an usa nga bato nga magin tinapay kon sugoon ka han Yawa nga buhaton ito?— Nagugutom hi Jesus. Salit diri ba husto an pagbuhat hito hin makausa la?— Maaram hi Jesus nga sayop an paggamit han iya mga gahum hito nga paagi. Hi Jehova naghatag ha iya hiton nga mga gahum basi madani an mga tawo ngadto ha Dios, diri gamiton para han iya kalugaringon nga kaopayan.

Salit, ginsumatan lugod ni Jesus hi Satanas han nahisurat ha Biblia: ‘An tawo nabubuhi, diri la ha tinapay, kondi ha ngatanan nga pulong nga nagowa ha baba ni Jehova.’ Maaram hi Jesus nga an pagbuhat han nakakalipay kan Jehova mas importante gud kay ha pagkaada hin pagkaon.

Kondi an Yawa nagsari utro. Iya gindara hi Jesus ngadto ha Jerusalem ngan ginpatindog  hiya ha hitaas nga bahin han templo. Katapos, hi Satanas nagsiring: ‘Kon ikaw anak han Dios, pakahulog ngadto ha ubos. Kay nahisurat na nga an mga anghel han Dios magpapanalipod ha imo tikang ha kadaot.’

Kay ano nga ginsiring ini ni Satanas?— Iya ginsiring ito basi masulay hi Jesus ha pagbuhat hin kalurongan. Kondi waray na liwat mamati hi Jesus kan Satanas. Hiya nagsiring kan Satanas: ‘Nahisurat na, “Diri mo pagsulayon hi Jehova nga imo Dios.”’ Maaram hi Jesus nga sayop an pagsari kan Jehova pinaagi han pagbutang han iya kinabuhi ha peligro.

Kondi, hi Satanas waray umundang. Sunod, iya gindara hi Jesus ngadto ha hitaas hinduro nga bukid. Didto ipinakita ni Satanas ha iya an ngatanan nga mga ginhadian, o mga gobyerno, han kalibotan ngan an himaya hito. Katapos, hi Satanas nagsiring kan Jesus: ‘Ini ngatanan nga mga butang akon ihahatag ha imo kon ikaw lumuhod ngan yumukbo ngan magsingba ha akon.’

Hunahunaa an tanyag han Yawa. Kan Satanas gud ba ini ngatanan nga mga ginhadian, o mga gobyerno han mga tawo?— Aw, waray magnigar hi Jesus nga kan Satanas ito. Magninigar unta hiya kon diri hi Satanas an tag-iya hito. Oo, hi Satanas gud an magmarando han ngatanan nga mga nasud han kalibotan. Tinatawag pa ngani hiya ha Biblia nga ‘an magmarando hini nga kalibotan.’​—Juan 12:31.

Ano an bubuhaton mo kon an Yawa nagsaad ha imo hin usa nga butang kon singbahon mo hiya?— Maaram hi Jesus nga sayop an pagsingba ha Yawa anoman an Iya makarawat sugad nga balos. Salit hi Jesus nagsiring: ‘Iwas, Satanas! Kay an Biblia nasiring nga hi Jehova la nga imo Dios an kinahanglan nga imo pagsingbahon ngan kinahanglan ha iya la ikaw mag-alagad.’​—Mateo 4:1-10; Lukas 4:1-13.

Kita liwat naatubang hin mga pagsulay. Maaram ka ba han pipira hito?— Iini an usa nga ehemplo. Bangin maghimo an imo nanay hin marasa nga karan-on o keyk para ha ikatarapos han pangaon. Bangin sidngan ka niya nga diri kaunon ito kon diri pa mangangaon. Kondi nagugutom ka na hinduro, salit bangin masulay ka nga kumaon hito. Susundon mo ba an imo  nanay?— Karuyag ni Satanas nga diri mo hiya sundon.

Hinumdumi hi Jesus. Nagugutom liwat hiya hinduro. Kondi maaram hiya nga mas importante an pagpalipay ha Dios kay ha pagkaon. Ipinapakita mo nga pariho ka kan Jesus kon ginbubuhat mo an ginsisiring han imo nanay.

An iba nga kabataan bangin magsugo ha imo nga magtumar hin mga tableta. Bangin magsiring hira ha  imo nga maopay gud an imo aabaton hini. Kondi bangin mga droga ini nga mga tableta. Makakadaot gud ito ha imo ngan bangin makamatay pa ngani ha imo. O bangin may maghatag ha imo hin sigarilyo, nga may-ada liwat droga, ngan piriton ka nga magsigarilyo. Ano an imo bubuhaton?—

Hinumdumi hi Jesus. Nagsari hi Satanas nga sulayon hi Jesus nga ibutang ha peligro an iya kinabuhi pinaagi han pagsiring ha iya nga lumukso tikang ha templo. Kondi waray buhata ito ni Jesus. Ano an imo bubuhaton kon may-ada mag-aghat ha imo nga buhaton an butang nga peligroso?— Hi Jesus waray mamati kan Satanas. Diri ka liwat sadang mamati ha bisan hin-o nga nagsasari ha pag-impluwensya ha imo nga buhaton an sayop.

Bangin umabot an panahon nga pabuhaton ka hin pagsingba ha usa nga imahen, usa ka butang nga ginsisiring han Biblia nga kinahanglan diri naton buhaton. (Eksodo 20:​4, 5) Bangin bahin ito han usa nga seremonya ha eskwelahan. Bangin sidngan ka nga diri ka na gud makakaeskwela kon diri mo buhaton ini. Ano an imo bubuhaton?—

Masayon an pagbuhat han husto kon ginbubuhat ito han ngatanan. Kondi bangin makuri hinduro an pagbuhat hito kon an iba nag-aaghat ha aton nga magbuhat hin sayop. Bangin sumiring hira nga an ira ginbubuhat diri gud maraot. Kondi an importante nga pakiana amo ini, Ano an ginsisiring han Dios mahitungod hito? Maaram hiya han gimaopayi.

Salit anoman an sidngon han iba, diri gud naton sadang buhaton an mga butang nga ginsisiring han Dios nga sayop. Hito nga paagi mapapalipay naton pirme an Dios, ngan diri gud mapapalipay an Yawa.