ANO an mahihimo naton basi mapalipay an Dios? Mahimo ba kita maghatag ha iya hin bisan ano?— Hi Jehova nasiring: “Akon an ngatanan nga mananap ha kakahoyan.” Hiya nasiring liwat: “An salapi akon, ngan an bulawan akon.” (Salmo 24:1; 50:10; Hagay 2:8) Kondi, may-ada kita maihahatag ha Dios. Ano ito?—

Tinutugotan kita ni Jehova nga magdesisyon kon mag-aalagad ba kita ha iya o diri. Diri kita ginpipirit niya nga buhaton an karuyag niya nga ipabuhat ha aton. Aton sabuton kon kay ano nga ginhimo kita han Dios basi makagdesisyon kon mag-aalagad ba kita ha iya o diri.

Bangin maaram ka kon ano an robot. Usa ito nga makina nga ginhimo basi buhaton an bisan ano nga karuyag ipabuhat han parahimo hito. Salit an robot diri makakalugaring pagdesisyon kon ano an bubuhaton. Mahihimo unta ni Jehova kita ngatanan nga magin pariho hin mga robot. Mahihimo unta kita niya nga sugad hito basi buhaton naton an karuyag la niya nga ipabuhat ha aton. Kondi waray ito buhata han Dios. Maaram ka ba kon kay ano?— Aw, an iba nga mga uyagan pariho han mga robot. Kon pinduton an buton, bubuhaton hito an igindisenyo han parahimo han uyagan nga buhaton hito. Nakakita ka na ba hin uyagan nga sugad hito?— Agsob nga nauuyam an mga tawo ha pag-uyag ha uyagan nga nagbubuhat sumala han igindisenyo la, o iginprograma nga  buhaton hito. Diri karuyag han Dios nga sugton naton hiya tungod kay mga robot kita nga iginprograma basi mag-alagad ha iya. Karuyag ni Jehova nga mag-alagad kita ha iya tungod kay nahigugma kita ha iya ngan tungod kay karuyag naton nga sugton hiya.

Ano ha hunahuna mo an inaabat han aton langitnon nga Amay kon nasugot kita ha iya tungod kay karuyag naton?— Sumati ako, ano an inaabat han imo mga ginikanan ha imo paggawi?— An Biblia nasiring nga an makinaadmananon nga anak nakakalipay han [iya] amay” kondi an anak nga lurong ‘nakakapasubo han iya iroy.’ (Proberbios 10:1) Naoobserbahan mo ba nga kon ginsusunod mo an iginpapabuhat han imo iroy ngan amay, nakakapalipay ito ha ira?— Kondi ano an ira inaabat kon imo gintatalapas hira?—

Yana hunahunaon naton an aton langitnon nga Amay, hi Jehova. Nagsusumat hiya kon paonan-o naton mapapalipay hiya. Alayon kuhaa an imo Biblia ngan abrihe ha Proberbios 27:11. Dinhi an Dios nagyayakan ha aton: ‘Anak ko, pagmakinaadmananon, ngan lipaya an akon kasingkasing, basi ako makabaton ha iya nga nagtatamay ha akon.’ Maaram ka ba kon ano an kahulogan han pagtamay ha usa?— Aw, bangin may-ada magtamay ha imo pinaagi han pagtawa ha imo ngan pagsiring nga diri mo mahihimo an imo ginsiring nga mahihimo mo. Paonan-o gintatamay ni Satanas hi Jehova?— Kitaon naton.

Hinumdumi, hinbaroan naton ha Kapitulo 8 hini nga libro nga karuyag ni Satanas nga magin Numero Uno hiya ngan karuyag niya nga sumugot ha iya an ngatanan. Nasiring hi Satanas nga an mga tawo nagsisingba kan Jehova  tungod la kay tatagan hira ni Jehova hin kinabuhi nga waray kataposan kon magsingba hira ha iya. Katapos makombinse ni Satanas hi Adan ngan Eva nga magtalapas kan Jehova, gin-ayat ni Satanas an Dios. Hiya nagsiring ha Dios: ‘An mga tawo nag-aalagad ha imo tungod la han ira nakakarawat tikang ha imo. Hatagi la ako hin higayon, ngan mahihimo ko nga isalikway ka han bisan hin-o.’

Oo, iton mismo nga mga pulong diri makikita ha Biblia. Kondi kon basahon naton an mahitungod han tawo nga hi Job, matin-aw nga pariho hito an ginsiring ni Satanas ha Dios. Importante gud kan Satanas ngan kan Jehova kon hi Job ba matinumanon ha Dios o diri. Aton abrihan an aton mga Biblia ha Job kapitulo 1 ngan 2 basi masabtan kon ano an nahitabo.

Tigamni ha Job kapitulo 1 nga hi Satanas nakada mismo ha langit han nagkaabot an mga anghel ha pakigkita kan Jehova. Salit hi Jehova nagpakiana kan Satanas: “Diin ka tikang?” Hi Satanas binaton nga hiya naglilinakatlakat ha palibot han tuna. Salit hi Jehova nagpakiana: ‘Natigamnan mo ba hi Job, nga nag-aalagad hiya ha akon ngan diri nagbubuhat hin maraot?’​—Job 1:6-8.

 Hi Satanas nangatadongan dayon. ‘Nagsisingba la hi Job ha imo tungod kay waray hiya bisan ano nga problema. Kon diri mo na hiya panalipdan ngan bendisyonan, hiya magtatampalas ha imo ngada ha imo nawong.’ Salit hi Jehova binaton: ‘Sige, Satanas, buhata ha iya an bisan ano nga karuyag mo, kondi ayaw daota hi Job mismo.’​—Job 1:9-12.

Ano an ginbuhat ni Satanas?— Iya ginhikay nga kawaton han mga tawo an kabakahan ngan mga asno ni Job ngan pamatayon adton nag-aataman hito. Katapos, inabot an kidlat, nga nakamatay ha kakarnerohan ngan ha mga nag-aataman hito. Ha urhi, nagkaabot an mga tawo ngan ginkawat an mga kamelyo ngan pinamatay adton nag-aataman hito. Ha kataposan, ginpahinabo ni Satanas an makusog hinduro nga hangin nga nagrumpag han balay nga ginkakatirokan han napulo nga anak ni Job, ngan nagkamatay hira ngatanan. Bisan pa hini ngatanan, hi Job nag-aalagad pa gihapon kan Jehova.​—Job 1:13-22.

Han nakita utro ni Jehova hi Satanas, iginpatin-aw ni Jehova nga matinumanon pa gihapon hi Job. Hi Satanas nangatadongan, nasiring: ‘Kon tutugotan mo la ako nga dauton an iya lawas, hiya magtatampalas ha imo dida ha imo nawong.’ Salit gintugotan ni Jehova hi Satanas nga dauton an lawas ni Job kondi ginpahamangnoan hiya nga diri patayon hi Job.

 Hinampak dayon ni Satanas hi Job salit an iya bug-os nga lawas tinuboan hin mga hubag. Mabaho hinduro ini salit waray bisan hin-o nga karuyag humirani ha iya. Bisan an asawa ni Job nagsiring ha iya: “Isalikway an Dios ngan mamatay!” Adton mga sangkay kuno ni Job binisita ha iya ngan ginpasakitan pa gud hiya pinaagi han pagsiring nga sigurado nga may nabuhat hiya nga maraot salit nahitabo ini ngatanan nga kakurian. Kondi, bisan pa han ngatanan nga kakurian ngan kasakitan nga ginhimo ni Satanas kan Job, hi Job padayon nga nag-alagad nga matinumanon kan Jehova.​—Job 2:1-13; 7:5; 19:13-20.

Ha hunahuna mo, ano an inabat ni Jehova ha pagkamatinumanon ni Job?— Nagpalipay ito ha iya tungod kay hi Jehova makakasiring kan Satanas: ‘Kitaa hi Job! Nag-aalagad hiya ha akon tungod kay karuyag niya.’ Karuyag mo ba magin pariho kan Job, an tawo nga masisiring ni Jehova nga usa nga susbaranan nga nagpamatuod nga hi Satanas buwaon?— Oo, usa ka pribilehiyo an pagbaton ha pag-angkon ni Satanas nga maitatalikod niya an bisan hin-o tikang ha pag-alagad kan Jehova. Gintagad gud ito ni Jesus nga usa ka pribilehiyo.

An Bantogan nga Magturutdo waray gud tumugot kan Satanas nga makombinse Hiya ha pagbuhat hin bisan ano nga sayop. Hunahunaa la an daku nga kalipay han iya Amay tungod han iya ipinakita nga susbaranan! Makakatudlok hi Jehova kan Jesus ngan makakabaton kan Satanas: ‘Kitaa an akon Anak! Nagpapabilin hiya nga hingpit nga matinumanon ha akon tungod kay nahigugma hiya ha akon!’ Hunahunaa liwat an kalipay ni Jesus nga napalipay niya an kasingkasing han iya Amay. Tungod hiton daku nga kalipay, hi Jesus nakailob pa ngani han kamatayon ha pasakitan nga kahoy.​—Hebreo 12:2.

Karuyag mo ba magin pariho han aton Bantogan nga Magturutdo ngan lipayon hi Jehova?— Niyan magpadayon ka ha paghibaro mahitungod han karuyag ni Jehova nga ipabuhat ha imo, ngan lipaya hiya pinaagi han pagbuhat hito!