IGINBUTANG han Dios hi Adan ngan Eva ha hardin han Eden. Bisan kon hira nagin matinalapasnon ngan namatay, ginhikay han Dios nga an ira mga anak, upod na kita yana nga panahon, mabuhi ha waray kataposan ha Paraiso. An Biblia nagsasaad: “An mga magtadong makakapanunod han tuna, ngan maukoy hira dida hin waray kataposan.”​—Salmo 37:29.

An Biblia nagsusumat ha aton mahitungod han “bag-o nga mga langit” ngan “bag-o nga tuna.” (Isaias 65:17; 2 Pedro 3:13) An presente nga “mga langit” ginkukompuwesto han mga gobyerno han tawo yana, kondi hi Jesu-Kristo ngan adton nagmamando upod niya ha langit an magkukompuwesto han “bag-o nga mga langit.” Magigin makalilipay gud kon inin bag-o nga mga langit, nga amo an matadong nga gobyerno han Dios nga magdadara hin kamurayawan, magmando na ha bug-os nga tuna!

Ano, kon sugad, an “bag-o nga tuna”?— An bag-o nga tuna amo an mag-opay nga mga tawo nga nahigugma kan Jehova. Kon gin-uunabi han Biblia “an tuna,” usahay iginpapasabot hito an mga tawo nga nag-uukoy dinhi ha tuna, diri an tuna mismo. (Genesis 11:1; Salmo 66:4; 96:1) Salit an mga tawo nga nagkukompuwesto han bag-o nga tuna mag-uukoy dinhi mismo hini nga tuna.

Hiton nga panahon mawawaray na an presente nga kalibotan han magraot nga mga tawo. Hinumdumi, an Baha ha panahon ni Noe nagbungkag han maraot nga kalibotan han mga tawo. Ngan, sugad han aton hinbaroan, bubungkagon ha Armagedon inin presente nga maraot nga kalibotan. Aton kitaon yana kon ano an magigin kahimtang han kinabuhi ha bag-o nga kalibotan han Dios katapos han Armagedon.

 Karuyag mo ba mabuhi hin waray kataposan ha Paraiso ha mamurayawon nga bag-o nga kalibotan han Dios?— Waray doktor nga makakabulig ha aton nga mabuhi ha waray kataposan. Waray medisina nga makakapugong ha aton ha kamatay. An paagi la nga mahimo kita mabuhi hin waray kataposan amo an pagin duok ha Dios. Ngan an Bantogan nga Magturutdo nagsusumat ha aton kon paonan-o kita mahimo magin duok ha Dios.

Aton kuhaon an aton Biblia ngan abrihan ito ha Juan kapitulo 17, bersikulo 3 (NW). Dinhi mababasa naton ini nga mga pulong han Bantogan nga Magturutdo: “Ini nangangahulogan hin kinabuhi nga waray kataposan, an ira pagkuha hin kahibaro mahitungod ha imo, an amo la nga matuod nga Dios, ngan ha usa nga imo sinugo, hi Jesu-Kristo.”

Salit, ano an ginsiring ni Jesus nga kinahanglan buhaton naton basi mabuhi ha waray kataposan?— Siyahan, kinahanglan kumuha kita hin kahibaro mahitungod han aton langitnon nga Amay, hi Jehova, ngan ha iya Anak liwat, nga naghalad han iya kinabuhi para ha aton. Nangangahulogan ini nga kinahanglan pag-adman naton an Biblia. Ini nga libro, Mahibaro Tikang ha Bantogan nga Magturutdo, nabulig ha aton nga pag-adman an Biblia.

Kondi paonan-o an paghibaro mahitungod kan Jehova mabulig ha aton nga mabuhi ha waray kataposan?— Aw, sugad la nga nagkikinahanglan kita hin pagkaon kada adlaw, kinahanglan hibaroan naton an mahitungod kan Jehova kada adlaw. An Biblia nasiring: ‘An tawo kinahanglan mabuhi, diri la ha tinapay, kondi ha ngatanan nga mga pulong nga nagowa ha baba ni Jehova.’​—Mateo 4:4.

Kinahanglan kumuha liwat kita hin kahibaro mahitungod kan Jesu-Kristo tungod kay sinugo han Dios an iya Anak ha pagkuha han aton sala. An Biblia nasiring: ‘Waray kaluwasan ha bisan hin-o.’ Ngan an Biblia nasiring liwat: “An natoo ha Anak may kinabuhi nga waray kataposan.” (Buhat 4:12; Juan 3:36) Ano an kahulogan han ‘pagtoo’ kan Jesus?— Nangangahulogan ito nga natoo gud kita kan Jesus ngan maaram nga diri kita mahimo mabuhi hin waray kataposan kon waray hiya. Natoo ba kita hito?— Kon natoo kita, magpapadayon kita ha paghibaro tikang ha Bantogan nga Magturutdo kada adlaw, ngan bubuhaton naton an iya ginsisiring.

 An usa nga maopay nga paagi han paghibaro tikang ha Bantogan nga Magturutdo amo an pagbasa hini nga libro hin pauroutro ngan pagkita ngan paghunahuna mahitungod han ngatanan nga mga retrato. Sarihi kon mababaton mo an mga pakiana may kalabotan hini nga mga retrato. Basaha liwat an libro kaupod an imo nanay o tatay. Kon diri mo kaupod an imo mga ginikanan, basaha ito kaupod an iba nga mga adulto ngan iba nga kabataan. Diri ba makalilipay kon mabubuligan mo an iba nga mahibaro tikang ha Bantogan nga Magturutdo mahitungod han kinahanglan buhaton nira basi mabuhi hin waray kataposan ha bag-o nga kalibotan han Dios?—

An Biblia nagsusumat ha aton: “An kalibotan nawawara.” Kondi an Biblia nagsasaysay kon paonan-o kita mahimo mabuhi hin waray kataposan ha bag-o nga kalibotan han Dios. Ito nasiring: ‘Hiya nga nagbubuhat han kaburut-on han Dios nagpapadayon ha waray kataposan.’ (1 Juan 2:17) Salit, paonan-o kita mahimo mabuhi hin waray kataposan ha bag-o nga kalibotan han Dios?— Oo, pinaagi han pagkuha hin kahibaro mahitungod kan Jehova ngan ha iya hinigugma nga Anak, hi Jesus. Kondi kinahanglan buhaton liwat naton an aton hinbabaroan. Hinaot an imo pag-aram hini nga libro makabulig ha imo ha pagbuhat hini nga mga butang.