KON kita mamatay, maruruyag ba an Dios nga banhawon kita, ibalik kita ha kinabuhi?— An maopay nga tawo nga hi Job tinoo nga karuyag han Dios. Salit han naghunahuna hi Job nga mamamatay na hiya, hiya nagsiring ha Dios: “Ikaw magtatawag, ngan ako mabaton ha imo.” Hi Job nagsiring nga hi Jehova nga Dios maghihingyap, o maruruyag gud, ha pagbanhaw ha iya.​—Job 14:​14, 15.

Hi Jesus pariho gud kan Jehova nga Dios, nga iya Amay. Karuyag ni Jesus nga buligan kita. Han an usa nga lalaki nga sanlahon nagsiring ha iya, ‘kon karuyag mo, malilimpyohan mo ako,’ hi Jesus binaton: “Karuyag ko.” Ngan iya gintambal an lalaki nga sanlahon.​—Markos 1:40-42.

Nahibaro hi Jesus tikang ha iya Amay ha paghigugma ha kabataan. Ha duha nga okasyon maiha na an naglabay, ginamit ni Jehova an iya mga surugoon ha pagbanhaw ha kabataan. Hi Elias nakimalooy kan Jehova nga banhawon an anak nga lalaki han balo nga babaye nga maabiabihon kan Elias. Ngan ginbuhat ito ni Jehova. Ginamit liwat ni Jehova an iya surugoon  nga hi Eliseo ha pagbanhaw ha bata nga lalaki.​—1 Hadi 17:17-24; 2 Hadi 4:32-37.

Diri ba makalilipay hibaroan nga hi Jehova nahigugma gud ha aton?— Diri la hiya naghuhunahuna ha aton kon kita buhi. Nahinunumdom liwat hiya ha aton kon kita mamatay. Siring ni Jesus nga an Amay nagtatagad pa ngani ha mga patay nga iya hinigugma sugad nga buhi! (Lukas 20:38) An Biblia nasiring nga ‘bisan an kamatayon, bisan an kinabuhi, bisan an mga butang nga hahani, bisan an mga butang nga tiarabot, diri sadang makagbulag ha aton tikang ha gugma han Dios.’​—Roma 8:​38, 39.

Han hi Jesus nakanhi pa ha tuna, ipinakita niya nga hi Jehova nagmamangno ha gudtiay nga kabataan. Mahinunumdoman mo nga hi Jesus nagkaada panahon ha pakiistorya ha kabataan mahitungod han Dios. Kondi maaram ka ba nga an Dios naghatag kan Jesus hin gahum ha pagbanhaw han kabataan tikang ha mga minatay?— Aton pag-istoryahan an mahitungod han panahon han ginbanhaw ni Jesus an 12-anyos nga anak nga daragita han lalaki nga hi Jairo.

Hi Jairo nag-uukoy upod an iya asawa ngan an ira usa la nga anak hirani ha Dagat han Galilea. Usa ka adlaw an daragita nagkasakit hin grabe, ngan nakasabot hi Jairo nga mamamatay an bata. Nahinumdom hiya kan Jesus, iton bantogan nga lalaki nga hinbatian ni Jairo nga nakakatambal ha mga tawo. Salit linakat hi Jairo basi bilngon hiya. Iya hin-agian hi Jesus ha baybayon han Dagat han Galilea, nga nagtututdo ha damu nga mga tawo.

Inagi hi Jairo ha butnga han mga tawo ngan linuhod ha atubangan ni Jesus. Hiya siniring kan Jesus: ‘An akon anak nga daragita grabe an sakit. Mahimo ka ba kumadto ngan buligan hiya? Nakikimalooy ako ha imo nga kumadto.’ Ha kadagmitan, hi Jesus inupod kan Jairo. An damu nga mga tawo nga nagkaabot basi makita an Bantogan nga Magturutdo sinunod liwat. Kondi han hiruhirayo na hira, inabot an pipira nga kalalakin-an tikang ha balay ni Jairo ngan nagsumat ha iya: ‘An imo anak patay na! Kay ano nga isturbuhon mo pa an magturutdo?’

 Hinbatian ni Jesus an ginsiring han kalalakin-an. Maaram hiya nga nasusubo gud hi Jairo ha kamatay han iya usa la nga anak. Salit Hiya nagsiring ha iya: ‘Ayaw kahadlok. Tumoo ka la ha Dios, ngan an imo anak mag-oopay.’ Nagpadayon hira tubtob nga inabot hira ha balay ni Jairo. Didto nagtatangis an kasangkayan han pamilya. Nasusubo hira tungod kay namatay an ira gutiay nga sangkay. Kondi hi Jesus nagsiring ha ira: ‘Ayaw na kamo pagtangis. An bata waray mamatay, kondi nakaturog la hiya.’

Han ginsiring ini ni Jesus, an mga tawo nagtikang magkatatawa, kay maaram hira nga an daragita patay na. Ha hunahuna mo, kay ano nga hi Jesus nagsiring nga nakaturog la hiya?— Ano nga leksyon ha hunahuna mo an karuyag niya igtutdo ha mga tawo?— Karuyag niya nga mahibaro hira nga an kamatayon mahimo magin pariho la han hilarom nga pagkaturog. Karuyag niya tutdoan hira nga pinaagi han gahum han Dios, maibabalik niya ha kinabuhi an patay nga tawo sugad la kasayon han pagpukaw ha usa nga tawo nga nakaturog.

Ginpagowa ni Jesus an ngatanan ha balay gawas han iya mga apostol nga hi Pedro, Jakobo, ngan Juan ngan han amay ngan iroy han daragita. Katapos, kinadto hiya ha daragita. Iya ginkaptan hiya ha kamot ngan nagsiring: ‘Daragita, buhat!’ Ngan ha kadagmitan hiya binuhat ngan nagtikang maglakat!  Malipayon gud an iya amay ngan iroy.​—Markos 5:21-24, 35-43; Lukas 8:40-42, 49-56.

Yana, hunahunaa ini. Tungod kay iginbalik ni Jesus ha kinabuhi iton nga daragita, mahihimo ba niya ito ha iba?— Naghuhunahuna ka ba nga bubuhaton gud niya ito?— Oo, bubuhaton niya. Hi Jesus mismo nagsiring: ‘Maabot an oras nga an ngatanan nga aadto ha mga lubnganan makakabati han akon tingog ngan manggogowa.’​—Juan 5:​28, 29.

Ha hunahuna mo, karuyag ba ni Jesus nga banhawon an mga tawo?— Usa pa nga ehemplo ha Biblia an mabulig ha aton basi mabaton iton nga pakiana. Ipinapakita han nahitabo usa ka adlaw ha hirani han siyudad han Nain kon ano an inaabat ni Jesus mahitungod han mga tawo nga nabibido han mga lubong.

Usa nga babaye an aada ha prosesyon han lubong han iya anak nga lalaki samtang nagikan ha Nain an damu nga mga tawo. Antes pa hito, namatay an iya bana, ngan yana patay na an iya amo la nga anak. Nasusubo gud hiya! Damu nga mga tawo ha Nain an nangupod samtang an lawas han iya anak gindadara ha gawas han siyudad. Nagtatangis an babaye, ngan an mga tawo waray mahihimo ha pagliaw ha iya.

Hini nga adlaw, tikadto hi Jesus ngan an iya mga disipulo ha siyudad han Nain. Hirani ha ganghaan han siyudad, iginkatapo nira an damu nga mga tawo nga maglulubong ha anak han babaye. Han nakita ni Jesus an nagtatangis nga babaye, nalooy hiya ha iya. Nabantad an iya kasingkasing han duro nga kasubo han babaye. Karuyag niya nga buligan hiya.

Salit ha maloloy-on kondi marig-on nga mga pulong basi mamati hiya, hi Jesus nagsiring: ‘Ayaw pagtangis.’ Tungod han iya paggios ngan ginbuhat, an ngatanan interesado nga nagkita ha iya. Samtang nahirani hi Jesus ha lawas, an ngatanan sigurado nga naghuhunahuna kon ano an iya bubuhaton. Hi Jesus nagyakan, nagsusugo: ‘Olitawohay, nasiring ako ha imo, Buhat!’ Ha kadagmitan, hiya liningkod! Ngan nagtikang hiya magyakan.​—Lukas 7:11-17.

 Hunahunaa la an inabat han babaye! Ano an aabaton mo kon mabuhi utro an imo namatay nga hinigugma?— Diri ba ipinapakita hini nga hi Jesus tinuod nga nahigugma ha mga tawo ngan karuyag niya nga buligan hira?— Hunahunaa la an kalipay ha pagkarawat ha mga tawo nga mabubuhi utro ha bag-o nga kalibotan han Dios!​—2 Pedro 3:13; Pahayag 21:​3, 4.

Hito nga panahon an iba han babanhawon amo an mga tawo nga kilala naton hadto, upod na an kabataan. Makikilala naton kon hin-o hira sugad la nga kilala ni Jairo an iya anak nga daragita han ginbanhaw hiya ni Jesus. An iba amo an mga tawo nga nagkamatay mga ginatos o yinukot ka tuig na an naglabay. Kondi an Dios diri mahingangalimot ha ira, bisan kon maiha na hira hadto nga nabuhi.

Diri ba makalilipay hibaroan nga hi Jehova nga Dios ngan an iya Anak, hi Jesus, nahigugma gud ha aton?— Karuyag nira nga mabuhi kita, diri la ha pipira ka tuig, kondi ha kadayonan!