MAOPAY gud kon an ngatanan nagbubuhat hin maopay, diri ba?— Kondi waray bisan hin-o nga nagbubuhat pirme hin maopay. Maaram ka ba kon kay ano nga kita ngatanan usahay nagbubuhat hin maraot, bisan kon karuyag naton buhaton an maopay?— Tungod kay kita ngatanan natawo nga nakapanunod han sala. Kondi an iba nga mga tawo nagbubuhat hin damu nga magraot hinduro nga mga butang. Nangangalas hira ha iba nga mga tawo ngan tinuyo nga gindadaot hira ha pisikal. Ha hunahuna mo, mahimo pa ba hira magbag-o ngan mahibaro nga magin maopay?—

Kitaa ha retrato an batan-on nga lalaki nga nagbabantay han panggawas nga mga bado hadton nagbabato kan Esteban. Saulo an iya Hebreohanon nga ngaran, kondi Pablo an iya Romano nga ngaran. Nalilipay hiya nga ginpapatay hi Esteban, nga disipulo han Bantogan nga Magturutdo. Kitaon naton kon kay ano nga hi Saulo nagbubuhat han sugad nga maraot.

Hi Saulo membro han relihiyoso nga grupo han mga Judio nga tinatawag nga mga Pariseo. An mga Pariseo may-ada han Pulong han Dios, kondi mas tinagan nira hin atensyon an mga katutdoan han iba han ira relihiyoso nga mga lider. Ini an hinungdan nga hi Saulo nagbuhat hin maraot.

Han gindakop hi Esteban ha Jerusalem, nakadto didto hi Saulo. Gindara hi Esteban ha hukmanan, diin mga Pariseo an iba nga mga hukom. Bisan kon magraot an ginyakan mahitungod kan Esteban, waray hiya mahadlok. Nagmaisugon hiya ha pagyakan ngan nagpamatuod hin maopay ha mga hukom mahitungod kan Jehova nga Dios ngan kan Jesus.

Kondi iton nga mga hukom waray maruyag ha ira hinbatian. Damu na an ira hinbabaroan mahitungod kan Jesus. Ha pagkamatuod, diri pa la maiha  antes hini, nagsugo hira nga patayon hi Jesus! Kondi katapos hito, ginbanhaw ni Jehova hi Jesus ngadto ha langit. Yana, imbes nga bag-ohon an ira mga buhat, an mga hukom nakig-away ha mga disipulo ni Jesus.

Ginkaptan han mga hukom hi Esteban ngan gindara hiya ha gawas han siyudad. Ira ginsuntok gud hiya salit natumba hiya ngan ginbato hiya. Ngan, sugad han makikita mo ha retrato, hi Saulo nagkikita mismo. Naghuhunahuna hiya nga husto nga patayon hi Esteban.

Maaram ka ba kon kay ano nga iton an ginhunahuna ni Saulo?— Aw, ha bug-os niya nga kinabuhi usa nga Pariseo hi Saulo, ngan natoo hiya nga husto an mga katutdoan han mga Pariseo. Iya gintagad an mga Pariseo sugad nga susbaranan, salit iya ginsubad hira.​—Buhat 7:54-60.

Katapos patayon hi Esteban, ano an ginbuhat ni Saulo?— Nangalimbasog hiya nga mawara an iba pa nga mga disipulo ni Jesus! Kinadto hiya mismo ha ira mga balay ngan gindanas tipagawas an kalalakin-an ngan kababayin-an. Katapos, iya iginpapriso hira. Damu han mga disipulo an kinahanglan bumaya ha Jerusalem, kondi waray hira umundang ha pagsangyaw mahitungod kan Jesus.​—Buhat 8:1-4.

 Tungod hini, labaw nga nangalas hi Saulo ha mga disipulo ni Jesus. Salit kinadto hiya ha Hitaas nga Saserdote nga hi Kaipas ngan naghangyo nga tugotan hiya ha pagdakop ha mga Kristiano ha siyudad han Damasko. Karuyag ni Saulo nga dad-on hira sugad nga mga priso ngadto ha Jerusalem basi sirotan hira. Kondi han tikadto hiya ha Damasko, may-ada urusahon nga nahitabo.

Tigda nga nagsanag an kalamrag tikang ha langit, ngan usa nga tingog an nagsiring: “Saulo, Saulo, kay ano nga gintitimaraot mo ako?” Hi Jesus an nagyayakan tikang ha langit! Masilaw hinduro an kalamrag salit nabuta hi Saulo, ngan kinahanglan tugwayan hi Saulo han iya mga kaupod pakadto ha Damasko.

Paglabay hin tulo ka adlaw, nagpakita hi Jesus ha usa nga bisyon ha usa han iya mga disipulo ha Damasko nga hi Ananias. Ginsumatan ni Jesus hi Ananias nga bisitahon hi Saulo, basi makakita utro hiya, ngan makiistorya ha iya. Han nakiistorya hi Ananias ha iya, kinarawat ni Saulo an kamatuoran mahitungod kan Jesus. Nakakita na utro hiya. Nabag-o an iya bug-os nga paagi han pagkinabuhi, ngan nagin matinumanon nga surugoon hiya han Dios.​—Buhat 9:1-22.

Nasasabtan mo na ba yana kon kay ano nga hi Saulo nagbuhat hin maraot hadto?— Tungod kay gintutdoan hiya hin sayop nga mga butang. Iya ginsunod an mga tawo nga diri matinumanon ha Dios. Ngan kaupod hiya han grupo han mga tawo nga mas nagpapabili ha mga ideya han mga tawo kay ha Pulong han Dios. Kondi kay ano nga ginbag-o ni Saulo an iya kinabuhi ngan nagtikang magbuhat hin maopay, bisan kon an iba nga mga Pariseo nagpapadayon ha pakig-away ha Dios?— Tungod kay hi Saulo diri gud nangangalas ha kamatuoran. Salit han hinbaroan niya an kamatuoran, andam hiya nga buhaton ito.

Maaram ka ba kon nagin ano hi Saulo ha urhi?— Oo, nakilala hiya sugad nga hi apostol Pablo, usa nga apostol ni Jesus. Ngan hinumdumi nga mas damu nga mga libro han Biblia an iginsurat ni Pablo kay ha iba nga tawo.

Damu an mga tawo pariho kan Saulo nga mahimo magbag-o. Kondi diri masayon ito tungod kay may-ada usa nga nangangalimbasog gud ha pag-aghat  ha mga tawo nga magbuhat hin maraot. Kilala mo ba kon hin-o hiya?— Hi Jesus nagsumat mahitungod ha iya han nagpakita hi Jesus kan Saulo ha dalan pakadto ha Damasko. Didto nakiistorya hi Jesus kan Saulo tikang ha langit ngan nagsiring: ‘Ginsusugo ko ikaw ha pag-abri han mga mata han mga tawo, basi hira sumimang tikang ha kasisidman ngadto ha kalamragan, ngan tikang ha awtoridad ni Satanas, ngadto ha Dios.’​—Buhat 26:​17, 18.

Oo, hi Satanas nga Yawa an nangangalimbasog ha pag-aghat ha ngatanan nga magbuhat hin maraot. Nakukurian ka ba usahay ha pagbuhat han husto?— Makuri ito para ha aton ngatanan. Hi Satanas an nagpapakuri hito. Kondi may-ada usa pa nga hinungdan kon kay ano nga diri masayon pirme an pagbuhat hin husto. Maaram ka ba han hinungdan?— Tungod ito kay natawo kita nga may-ada sala.

Ini nga sala an agsob nga hinungdan nga mas masayon para ha aton an pagbuhat hin sayop kay ha pagbuhat hin husto. Salit, ano an kinahanglan naton buhaton?— Oo, kinahanglan mangalimbasog gud kita nga buhaton an husto. Kon buhaton naton ito, makakasiguro kita nga hi Jesus, nga nahigugma ha aton, mabulig ha aton.

Han nakanhi pa hi Jesus ha tuna, ipinakita niya nga nahigugma hiya ha mga tawo nga nagbuhat hin maraot kondi nagbag-o. Maaram hiya nga makuri gud para ha ira an pagbag-o. Pananglitan, may-ada kababayin-an nga nakighilawas ha damu nga  kalalakin-an. Siyempre, maraot ini. Ha Biblia tinatawag ini nga kababayin-an nga mga puta, o mga bigaon.

May-ada usa nga babaye nga sugad hito, nga nakabati mahitungod kan Jesus, ngan kinadto hiya ha balay han usa nga Pariseo diin nakadto hi Jesus. Iya iginbubo an lana ha mga tiil ni Jesus ngan ginpahid an iya mga luha ha iya mga tiil pinaagi han iya buhok. Nagbabasol gud hiya han iya mga sala, salit ginpasaylo hiya ni Jesus. Kondi an Pariseo waray maghunahuna nga sadang pasayloon hiya.​—Lukas 7:36-50.

Maaram ka ba kon ano an ginsiring ni Jesus ha iba han mga Pariseo?— Hiya nagsiring ha ira: “An mga puta nahiuuna ha iyo pagsulod ha ginhadian han Dios.” (Mateo 21:31) Ginsiring ini ni Jesus tungod kay an mga puta tinoo ha iya, ngan ira ginbag-o an ira maraot nga mga buhat. Kondi an mga Pariseo nagpadayon ha pagbuhat hin maraot ha mga disipulo ni Jesus.

Salit kon ipinapakita han Biblia nga maraot an ginbubuhat naton, sadang kita magin disidido ha pagbag-o. Ngan kon hinbabaroan naton an karuyag ni Jehova nga buhaton naton, sadang magin disidido kita nga buhaton ito. Dida hito malilipay hi Jehova ha aton ngan tatagan kita niya hin kinabuhi nga waray kataposan.