NAKIKIISTORYA ka ba kan Jehova nga Dios?— Karuyag niya nga makiistorya ka ha iya. Kon nakikiistorya ka ha Dios, tinatawag ini nga pag-ampo. Hi Jesus agsob nga nakikiistorya ha iya Amay ha langit. Usahay karuyag niya nga nag-uusahan kon nakikiistorya hiya ha Dios. Usa ka higayon, an Biblia nasiring, “Hiya sinaka hin antaw nga bukid ha pag-ampo; ngan han pagkakulop, hiya nag-uusahan la didto.”​—Mateo 14:23.

Diin ka makadto nga nag-uusahan basi mag-ampo kan Jehova?— Mahimo ka mag-usahan ha pakiistorya kan Jehova antes ka kumaturog ha gab-i. Hi Jesus nagsiring: ‘Kon ikaw mag-ampo, sulod ha imo sarosakob nga kuwarto; ngan katapos sadhan an imo purtahan, pag-ampo ha imo Amay.’ (Mateo 6:6) Nag-aampo ka ba kan Jehova kada gab-i antes ka kumaturog?— Sadang ka mag-ampo.

Hi Jesus nag-ampo liwat han kaupod niya an iba nga mga  tawo. Han namatay an iya sangkay nga hi Lasaro, hi Jesus nag-ampo upod an iba ha lugar nga ginbutangan kan Lasaro. (Juan 11:​41, 42) Ngan nag-aampo liwat hi Jesus kon may-ada hiya mga katirok upod an iya mga disipulo. Nakadto ka ba ha mga katirok diin may-ada nag-aampo?— Didto, kasagaran nga an usa nga mas gurang nga tawo an nag-aampo. Pamati hin maopay ha iya ginsisiring tungod kay nakikiistorya hiya ha Dios para ha imo. Katapos, makakasiring ka hin “Amen” ha pag-ampo. Maaram ka ba kon ano an kahulogan han pagsiring hin “Amen” ha kataposan han pag-ampo?— Nangangahulogan ito nga naruyagan mo an pag-ampo. Nangangahulogan ito nga nauyon ka hito ngan karuyag mo nga ito liwat an imo pag-ampo.

Hi Jesus nag-ampo liwat durante han mga pangaon. Nagpasalamat hiya kan Jehova para han iya pagkaon. Nag-aampo ka ba pirme antes kumaon?— Maopay nga magpasalamat kita kan Jehova para han pagkaon antes kita magtikang kumaon. Bangin iba an manguna ha pag-ampo kon durungan kamo mangaon. Kondi ano man kon ikaw la an makaon? O ano man kon makaon ka kaupod han mga tawo nga diri nagpapasalamat kan Jehova?— Niyan, kinahanglan ikaw mismo an mag-ampo.

Kinahanglan ba nga mag-ampo ka pirme ha daku nga tingog? O mababatian ka ba ni Jehova kon hilom la an imo pag-ampo?— Hibabaroan naton an baton tikang ha nahitabo kan Nehemia. Magsiringba hiya ni Jehova  nga nagtrabaho ha palasyo han Persiahanon nga hi Hadi Artaherhes. Usa ka adlaw, masurub-on gud hi Nehemia tungod kay hinbatian niya nga naguba an mga kuta han Jerusalem, an sentro nga siyudad han iya katawohan.

Han nagpakiana an hadi kan Nehemia kon kay ano nga masurub-on hiya, hi Nehemia nag-ampo anay hin hilom. Katapos, ginsumatan ni Nehemia an hadi kon kay ano nga masurub-on hiya ngan naghangyo kon mahimo hiya kumadto ha Jerusalem basi tukuron utro an mga kuta. Ano an nahitabo?—

Oo, ginbaton han Dios an pag-ampo ni Nehemia. An hadi nagsiring nga mahimo hiya kumadto! An hadi naghatag pa ngani kan Nehemia hin damu nga kahoy nga magagamit ha pagtukod han mga kuta. Salit totoo nga mababaton han Dios an aton mga pag-ampo, bisan kon hilom ito.​—Nehemia 1:​2, 3; 2:4-8.

Yana hunahunaa ini. Sadang ka ba dumuko kon ikaw nag-aampo?  Sadang ka ba lumuhod? Ano ha hunahuna mo?— Usahay naluhod hi Jesus kon hiya nag-aampo. Usahay natindog hiya. Ngan usahay nahangad hiya ngadto ha langit kon hiya nag-aampo, sugad han iya ginbuhat han nag-ampo hiya para kan Lasaro.

Salit, ano an ipinapakita hini?— Oo, ipinapakita hini nga diri importante an imo posisyon. Usahay angayan an pagduko han imo ulo ngan pagpiyong han imo mga mata. Usahay bangin maruyag ka pa ngani lumuhod, sugad han ginbuhat ni Jesus. Kondi, hinumdumi, makakag-ampo kita ha Dios ha anoman nga oras ha adlaw o gab-i, ngan pamamatian kita niya. An importante mahitungod han pag-ampo amo nga natoo gud kita nga namamati hi Jehova. Natoo ka ba nga pinamamatian ni Jehova an imo mga pag-ampo?—

Ano an sadang sidngon naton ha aton mga pag-ampo kan Jehova?— Sumati ako: Kon nag-aampo ka, ano an igin-iistorya mo ha Dios?— Hi Jehova naghahatag ha aton hin damu hinduro nga mag-opay nga mga butang, ngan angay pasalamatan hiya tungod hito, diri ba?— Makakagpasalamat kita ha iya tungod han aton pagkaon. Kondi nagpasalamat ka na ba ha iya tungod han asul nga langit, han berde nga kakahoyan, ngan han magtahom nga mga bukad?— Iya ginhimo liwat ito.

An mga disipulo ni Jesus naghangyo hadto ha iya nga tutdoan hira kon paonan-o mag-ampo. Salit gintutdoan hira han Bantogan nga Magturutdo, ngan ipinakita niya ha ira kon ano an pinakaimportante nga mga butang nga sadang ig-ampo. Maaram ka ba kon ano ini nga mga butang?— Kuhaa an imo Biblia, ngan abrihe ha Mateo kapitulo 6. Ha bersikulo 9 tubtob 13, makikita  naton an tinatawag han damu nga mga tawo nga Amay Namon o Pag-ampo han Ginoo. Basahon naton ito.

Dinhi aton hinbaroan nga hi Jesus nagsumat ha aton nga mag-ampo mahitungod han ngaran han Dios. Siring niya nga mag-ampo basi pagbaraanon an ngaran han Dios. Ano an ngaran han Dios?— Oo, Jehova an iya ngaran, ngan sadang higugmaon naton iton nga ngaran.

Ikaduha, hi Jesus nagtutdo ha aton nga mag-ampo nga kumanhi an Ginhadian han Dios. Importante ini nga Ginhadian tungod kay ito an magdadara hin kamurayawan nganhi ha tuna ngan maghihimo hito nga magin paraiso.

Ikatulo, an Bantogan nga Magturutdo nagsiring nga mag-ampo nga matuman an kaburut-on han Dios dinhi ha tuna sugad ha langit. Kon mag-ampo kita para hini, niyan sadang buhaton naton an karuyag han Dios.

Sunod, hi Jesus nagtutdo ha aton nga mag-ampo para han pagkaon nga ginkikinahanglan naton kada adlaw. Nagsiring liwat hiya nga sadang isumat naton ha Dios nga nasusubo kita kon nakakabuhat kita hin sayop. Ngan sadang kita maghangyo nga pasayloon kita han Dios. Kondi antes kita pasayloon niya, kinahanglan pasayloon naton an iba kon may-ada hira nabuhat nga sayop ha aton. Masayon ba para ha imo nga buhaton ito?—

Ha kataposan, hi Jesus nagsiring nga sadang kita mag-ampo nga panalipdan kita ni Jehova tikang ha usa nga maraot, hi Satanas nga Yawa. Salit ini ngatanan an mag-opay nga mga butang nga sadang ig-ampo ha Dios.

Sadang kita tumoo nga hi Jehova namamati ha aton mga pag-ampo. Dugang pa ha paghangyo ha iya nga buligan kita, sadang kita magpasalamat pirme ha iya. Malipayon hiya kon totoo an ginsisiring naton ha pag-ampo ngan kon naghahangyo kita han husto nga mga butang. Ngan ihahatag niya ha aton ini nga mga butang. Natoo ka ba hito?—