KARUYAG naton ngatanan nga magin malipayon, diri ba?— Kondi damu nga mga tawo an diri gud malipayon. Maaram ka ba kon kay ano?— Tungod kay waray hira mahibaro han sekreto ha kalipay. Naghuhunahuna hira nga an pagkaada hin damu nga materyal nga mga butang amo an paagi basi magin malipayon. Kondi kon may-ada na hira hini, an ira kalipay diri nagpapadayon.

Iini an importante nga sekreto. An Bantogan nga Magturutdo nagsiring: ‘May labaw nga kalipay ha paghatag kay ha pagkarawat.’ (Buhat 20:35) Salit, ano an paagi basi magin malipayon?— Oo, an paghatag ha iba ngan pagbuhat para ha ira. Maaram ka ba hito?—

Aton hunahunaon ini hin dugang pa. Nagsiring ba hi Jesus nga an tawo nga nakakarawat hin regalo diri malilipay?— Waray, waray hiya magsiring hito. Karuyag mo makakarawat hin mga regalo, diri ba?— Karuyag ito han ngatanan. Malipayon kita kon nakakarawat naton an mag-opay nga mga butang.

 Kondi hi Jesus nagsiring nga labaw pa gud an kalipay kon kita naghahatag. Salit hin-o an masisiring mo nga naghahatag hin mas damu nga mga butang ha mga tawo kay ha bisan hin-o?— Oo, hi Jehova nga Dios.

An Biblia nasiring nga an Dios ‘naghahatag ha ngatanan nga mga tawo hin kinabuhi ngan gininhawa ngan ngatanan nga mga butang.’ Naghahatag hiya ha aton hin uran tikang ha langit ngan sirak han adlaw liwat, salit natubo an mga tanom ngan may-ada kita pagkaon. (Buhat 14:17; 17:25) Diri urusahon nga tinatawag han Biblia hi Jehova nga ‘an malipayon nga Dios’! (1 Timoteo 1:11) An paghatag ha iba amo an usa han mga butang nga nakakalipay ha Dios. Ngan kon naghahatag kita, nakakalipay liwat ito ha aton.

Ano an maihahatag naton ha iba nga mga tawo? Ano an masisiring mo?— Usahay binabayaran hin kwarta an mga regalo. Kon regalo ito nga makukuha mo ha tindahan, kinahanglan bayaran mo ito. Salit kon karuyag mo ihatag iton nga klase hin regalo, bangin kinahanglan magtirok ka hin kwarta tubtob nga magkaada ka igo nga ipapalit han regalo.

Kondi diri ngatanan nga regalo kinahanglan paliton. Pananglitan, ha adlaw nga mapaso, nakakarepresko gud an usa ka baso han matugnaw nga tubig. Salit kon ihatag mo ito nga regalo ha tawo nga nauuhaw, malilipay ka tungod ha paghatag.

Bangin maghimo kamo ni imo nanay hin karan-on. Makalilipay ito. Kondi ano an imo bubuhaton ha iba hiton nga karan-on nga mas makakalipay ha imo kay ha pagkaon hito ngatanan?— Oo, maihahatag mo an iba hito ha usa han imo mga sangkay. Karuyag mo ba buhaton ito usahay?—

 An Bantogan nga Magturutdo ngan an iya mga apostol maaram han kalipay han paghatag. Maaram ka ba kon ano an ira iginhatag ha iba nga mga tawo?— An gimaopayi nga butang ha kalibotan! Maaram hira han kamatuoran mahitungod ha Dios, ngan malipayon nga iginsumat nira inin maopay nga sumat ha iba. Ira ginbuhat ini nga diri nagpapabayad ha iba tungod han ira iginhatag.

Usa ka adlaw hi apostol Pablo ngan an iya maopay nga sangkay, an disipulo nga hi Lukas iginkita hin usa ka babaye nga karuyag malipay pinaagi han paghatag. Ira iginkita hiya ha ligid han salog. Kinadto didto hi Pablo ngan Lukas tungod kay hinbatian nira nga lugar ito han pag-ampo. Ngan totoo gud, han inabot hira, nakita nira an pipira nga kababayin-an nga nag-aampo.

Ginsumatan ni Pablo ini nga kababayin-an han maopay nga sumat mahitungod kan Jehova nga Dios ngan han iya Ginhadian. An usa ha ira, hi Lydia, ngan namati hiya hin maopay. Katapos, karuyag ipakita ni Lydia nga naruyagan gud niya an maopay nga sumat nga iya hinbatian. Salit iya gin-aghat hi Pablo ngan Lukas: “Kon iyo ako ginhuhukman nga may pagtoo ha Ginoo, sulod kamo ngan umukoy ha akon balay.” Ngan iya ginpirit gud hira nga kumadto ha iya balay.​—Buhat 16:13-15.

Nalipay hi Lydia nga ini nga mga surugoon han Dios kinadto ha iya balay. Hinigugma niya hira tungod kay ira ginbuligan hiya nga mahibaro mahitungod kan Jehova ngan kan Jesus ngan kon paonan-o an mga tawo mahimo mabuhi ha waray kataposan. Nakalipay ha iya an paghatag kan Pablo ngan Lukas hin pagkaon ngan kuwarto nga mapapahuwayan. Salit an paghatag ni Lydia nakalipay ha iya tungod kay karuyag gud niya maghatag. Ito an usa nga butang nga angay naton hinumdoman. Bangin may-ada magsiring ha aton nga kinahanglan magregalo kita. Kondi kon diri gud naton karuyag nga buhaton ito, an paghatag diri makakalipay ha aton.

Pananglitan, ano man kon may-ada ka pipira nga dulse nga karuyag mo kaunon? Kon ginsidngan ko ikaw nga kinahanglan ihatag mo an iba hito ha usa nga bata, malilipay ka ba ha paghatag hito?— Kondi ano man kon may-ada ka pipira nga dulse han iginkita mo an usa nga sangkay nga naruruyagan  mo gud? Kon ikaw mismo an nakahunahuna nga ihatag an iba hito ha imo sangkay, diri ba ito magpapalipay ha imo?—

Usahay hinigugma gud naton an usa ka tawo salit karuyag naton ihatag ha iya an ngatanan ngan diri magsasalin hin bisan ano para ha aton kalugaringon. Samtang nagtutubo kita ha aton gugma ha Dios, ito an sadang abaton naton mahitungod ha Iya.

May kilala an Bantogan nga Magturutdo nga kablas nga babaye nga sugad gud hito an inabat. Iya hinkit-an hiya ha templo ha Jerusalem. May-ada hiya duha la ka gutiay nga sinselyo; iton gud la an iya gintatag-iya. Kondi iya iginhulog ha kahon iton nga duha nga sinselyo sugad nga donasyon, o regalo para ha templo. Waray nagpirit ha iya nga buhaton ito. Diri ngani maaram an kadam-an han mga tawo didto kon ano an iya ginbuhat. Ginbuhat niya ito tungod kay karuyag niya ngan tungod kay nahigugma gud hiya kan Jehova. Nalipay hiya nga hiya nakaghatag.​—Lukas 21:1-4.

Damu an mga paagi nga mahimo kita maghatag. May-ada ka ba nahuhunahuna?— Kon naghahatag kita tungod kay karuyag gud naton, magigin malipayon kita. Salit an Bantogan nga Magturutdo nagsusumat ha aton: ‘Batasana an paghatag.’ (Lukas 6:38) Kon aton buhaton ito, mapapalipay naton an iba nga mga tawo. Ngan kita an magigin pinakamalipayon ha ngatanan!