MAY-ADA na ba nangawat ha imo?— Ano an inabat mo hito?— Hin-o man an nagbuhat hito, usa nga kawatan, ngan waray naruruyag ha usa nga kawatan. Ha hunahuna mo, paonan-o nagigin kawatan an usa nga tawo? Natawo ba hiya nga kawatan?—

Aton hinbaroan pa la nga an mga tawo natawo nga may sala. Salit kita ngatanan diri-hingpit. Kondi waray bisan hin-o nga natawo nga kawatan. An usa nga kawatan mahimo magtikang ha maopay nga pamilya. An iya mga ginikanan, ngan an iya kabugtoan bangin mga tangkod. Kondi an kalugaringon nga hingyap han tawo ha mga butang sugad han kwarta ngan han mapapalit han kwarta bangin amo an hinungdan nga hiya magin usa nga kawatan.

Hin-o an masisiring mo nga siyahan nga kawatan?— Aton hunahunaon ito. Kilala han Bantogan nga Magturutdo iton nga persona han nakadto pa hiya ha langit. Iton nga kawatan usa nga anghel. Kondi tungod kay ginhimo han Dios an ngatanan nga mga anghel nga hingpit, paonan-o nagin kawatan iton nga anghel?— Aw, sugad han aton hinbaroan ha Kapitulo 8 hini nga libro, may naruyagan ito nga anghel nga diri iya. Nahinunumdom ka ba kon ano ito?—

Katapos himoon han Dios an siyahan nga lalaki ngan babaye, karuyag hiton nga anghel nga hiya an singbahon nira. Waray hiya katungod ha ira pagsingba. An Dios la an may katungod ha ira pagsingba. Kondi iya ginkawat ito! Pinaagi han pagkombinse kan Adan ngan Eva nga singbahon hiya, an anghel nagin usa nga kawatan. Hiya nagin hi Satanas nga Yawa.

Ano an hinungdan nga an usa nga tawo nagigin kawatan?— An paghingyap han butang nga diri iya. Ini nga hingyap mahimo magin makusog gud salit bisan an mag-opay nga mga tawo mahimo magbuhat hin maraot. Usahay, iton nga mga tawo nga nagigin mga kawatan diri gud nagbabasol ngan  diri nagbubuhat utro han maopay. Usa ha ira amo an usa nga apostol ni Jesus. An iya ngaran amo hi Judas Iskariote.

Maaram hi Judas nga sayop an pangawat tungod kay gintutdoan hiya han Balaud han Dios tikang ha iya pagkabata. Maaram hiya nga an Dios nagyakan pa ngani hadto tikang ha langit ngan nagsiring ha iya katawohan: ‘Diri kamo mangawat.’ (Eksodo 20:15) Han daku na hi Judas, nakilala niya an Bantogan nga Magturutdo ngan nagin usa hiya han iya mga disipulo. Ha urhi, ginpili pa ngani ni Jesus hi Judas nga magin usa han iya 12 nga apostol.

Magkaupod nga nagbiyahe hi Jesus ngan an iya mga apostol. Magkaupod hira nga nakaon. Ngan an ngatanan nga kwarta han grupo gintipigan ha usa nga kahon. Iginhatag ni Jesus iton nga kahon kan Judas basi tipigan. Siyempre an kwarta diri kan Judas. Kondi maaram ka ba kon ano an ginbuhat ni Judas katapos hin pipira ka panahon?—

Hi Judas nagtikang pagkuha han kwarta ha kahon, nga diri angay kuhaon niya. Ginkukuha niya ito kon an iba diri nagkikita, ngan nangalimbasog pa ngani hiya ha pagbiling hin mga paagi nga makakuha hin damu pa nga kwarta. Nagtikang hiya maghunahuna mahitungod han kwarta ha ngatanan nga panahon. Kitaon naton kon ha ano nagtugway inin sayop nga hingyap pipira la ka adlaw antes patayon an Bantogan nga Magturutdo.

Hi Maria, nga bugto han sangkay ni Jesus nga hi Lasaro, nagdara hin maopay nga klase hin lana ngan iginbubo ito ha mga tiil ni Jesus. Kondi nagreklamo hi Judas. Maaram ka ba kon kay ano?— Siring niya nga an lana sadang igbaligya unta ngan ihatag an kwarta ha kablas nga mga tawo. Kondi an totoo, karuyag niya magkaada hin damu pa nga kwarta ha kahon basi hiya makakawat hito.​—Juan 12:1-6.

Ginsidngan ni Jesus hi Judas nga diri maghilabot kan Maria, nga buotan hinduro. Nasina hi Judas han ginsidngan hiya hito ni Jesus, salit kinadto hiya ha punoan nga mga saserdote, nga mga kaaway ni Jesus. Karuyag nira dakpon hi Jesus, kondi karuyag nira nga buhaton ito ha gab-i basi diri hira makita han mga tawo.

 Hi Judas nagsiring ha mga saserdote: ‘Isusumat ko ha iyo kon paonan-o madadakop hi Jesus kon tagan niyo ako hin kwarta. Pira an ihahatag niyo ha akon?’

‘Tatagan ka namon hin trenta ka bug-os nga salapi,’ binaton an mga saserdote.​—Mateo 26:14-16.

Kinarawat ni Judas an kwarta. Sugad la hin iginbaligya niya an Bantogan nga Magturutdo ngada hiton nga kalalakin-an! Mahahanduraw mo ba an usa nga nagbubuhat hito nga butang nga maraot?— Aw, ito an nahitatabo kon an usa nga tawo nagigin kawatan ngan nangangawat hin kwarta. Nahigugma hiya han kwarta labaw han paghigugma niya ha iba nga mga tawo o bisan ha Dios.

Bangin sumiring ka, ‘Diri ko gud hihigugmaon an bisan ano nga butang labaw kay ha akon paghigugma kan Jehova nga Dios.’ Darayawon ito nga imo inaabat. Han ginpili ni Jesus hi Judas sugad nga apostol, bangin iton an inabat ni Judas. Bangin ito liwat an inabat han iba nga nagin mga kawatan. Aton pag-istoryahan an mahitungod han pipira ha ira.

An usa amo an surugoon han Dios nga hi Akan, nga nabuhi maiha na antes pa matawo an Bantogan nga Magturutdo. Nakita ni Akan an usa nga maopay hinduro nga bado, usa ka bareta nga bulawan, ngan pipira ka bug-os nga salapi. Diri ito iya. An Biblia  nasiring nga kan Jehova ito tungod kay ginkuha ito tikang ha mga kaaway han katawohan han Dios. Kondi naruyagan gud ito ni Akan salit iya ginkawat ito.​—Josue 6:19; 7:​11, 20-22.

Iini an usa pa nga ehemplo. Maiha na nga panahon an naglabay, ginpili ni Jehova hi David nga magin hadi ha katawohan han Israel. Usa ka adlaw, hi David nagtikang magkita ha mahusay nga babaye nga hi Batseba. Nagkinita hiya kan Batseba ngan naghunahuna nga kuhaon hiya basi magin asawa niya. Kondi, asawa hiya ni Uriya. Ano unta an ginbuhat ni David?—

Inundang unta hi David ha paghunahuna ha pagkuha kan Batseba. Kondi waray niya ito buhata. Salit gindara hiya ni David ngadto ha iya balay. Ngan katapos, iya ginhikay nga patayon hi Uriya. Kay ano nga ginbuhat ni David ini nga maraot?— Tungod kay  padayon nga naruyagan niya an babaye nga asawa han iba.​—2 Samuel 11:2-27.

Tungod kay nagbasol hi David, gintugotan hiya ni Jehova nga mabuhi. Kondi tikang hito nga panahon nagdamu an mga problema ni David. Karuyag han iya anak nga hi Absalon nga kuhaon an katungdanan ni David sugad nga hadi. Salit kon nakadto an mga tawo ha pakigkita kan David, hi Absalon nahangkop ngan naharok ha ira. An Biblia nasiring: ‘Padayon nga kinakawat ni Absalon an mga kasingkasing han mga tawo han Israel.’ Nakombinse niya iton nga mga tawo nga maruyag ha iya nga magin hadi imbes kan David.​—2 Samuel 15:1-12.

May-ada ka ba naruyagan gud, sugad han naruyagan gud ni Akan, David, ngan Absalon?— Kon iton nga butang gintatag-iya han iba nga tawo, pangawat an pagkuha hito nga waray pagsarit. Nahinunumdom ka ba kon ano an karuyag han siyahan nga kawatan, hi Satanas?— Karuyag niya nga an mga tawo magsingba ha iya imbes nga magsingba ha Dios. Salit nangangawat hi Satanas han nakombinse niya hi Adan ngan Eva nga sumugot ha iya.

Kon an usa ka tawo nagtatag-iya hin usa nga butang, may-ada hiya katungod ha pagsiring kon hin-o an mahimo gumamit hito. Pananglitan, bangin makig-uyag ka ha iba nga kabataan ha ira balay. Husto ba an pagkuha hin bisan ano nga butang didto ngan dad-on ito ha iyo balay?— Diri, kon diri sidngon han amay o iroy hiton nga kabataan nga mahimo mo dad-on ito. Kon magdara ka hin bisan ano nga butang ngadto ha iyo balay nga diri nasarit ha ira, pangawat ito.

Kay ano nga bangin masulay ka ha pangawat?— Tungod kay karuyag mo an usa nga butang nga diri imo. Bisan kon diri nakikita han iba nga tawo nga ginkukuha mo ito, hin-o an nakakakita ha imo?— Hi Jehova nga Dios. Ngan hinumdoman naton nga an Dios nangangalas ha pangawat. Salit an gugma ha Dios ngan ha imo amyaw mabulig ha imo nga diri gud mangawat.