AN KAIESTABLISAR pa la nga Kristiano nga kongregasyon magkakaada importante nga bahin ha katumanan han katuyoan ni Jehova. Kondi, an mga Kristiano ha siyahan nga siglo inatubang dayon hin mga problema. Titipigan ba nira an ira integridad ha Dios kon makaeksperyensya hira hin pagkontra ha gawas han kongregasyon ngan hin iba pa nga tuso nga peligro ha sulod han kongregasyon? An Kristiano Griego nga Kasuratan may-ada 21 nga surat nga naghahatag han ginkikinahanglan nga sagdon ngan pagdasig.

Katorse hito nga surat​—tikang ha Roma tubtob ha Hebreo—​iginsurat ni apostol Pablo. Ito nga mga surat gintawag ha ngaran han ginpahinungoran hito​—indibiduwal man o partikular nga kongregasyon. Tagda an pipira nga ginhisgotan hito.

Sagdon may kalabotan ha moral ngan panggawi. An nagbubuhat hin pornikasyon, adulteryo, ngan iba pa nga seryoso nga sala “diri makakapanunod ha ginhadian han Dios.” (Galasia 5:19-21; 1 Korinto 6:9-11) An mga magsiringba han Dios sadang magkaurosa anoman an ira nasyonalidad. (Roma 2:11; Efeso 4:1-6) Sadang hira malipay ha pagin mahinatagon basi mabuligan an ira igkasi-tumuroo nga nanginginahanglan. (2 Korinto 9:7) ‘Mag-ampo nga waray udong-udong,’ nagsiring hi Pablo. Oo, an mga magsiringba han Dios ginsasagda ha pagpahayag han ira gihilarumi nga pagbati kan Jehova pinaagi ha pag-ampo. (1 Tesalonika 5:17; 2 Tesalonika 3:1; Filipos 4:6, 7) Kondi, basi pamatian han Dios an pag-ampo, sadang ito ipahayag nga may pagtoo.​—Hebreo 11:6.

Ano an makakabulig ha pamilya nga maglampos? Sadang higugmaon han bana an iya asawa sugad han iya paghigugma ha iya kalugaringon nga lawas. An asawa sadang magpakita hin hilarom nga pagtahod ha iya bana. Sadang sundon han anak an ira kag-anak tungod kay ini an nalilipayan han Dios. Kinahanglan mahigugmaon nga giyahan ngan bansayon han mga kag-anak an ira mga anak pinaagi han mga prinsipyo ha Biblia.​—Efeso 5:22–6:4; Kolosas 3:18-21.

Bulig basi masabtan an katuyoan han Dios. Damu nga bahin han Mosaiko nga Balaud an nagpanalipod ngan naggiya ha mga Israelita tubtob han pag-abot ni Kristo. (Galasia 3:24) Kondi, diri na kinahanglan sundon han mga Kristiano ito nga Balaud basi makagsingba ha Dios. Ha surat ni Pablo ha mga Hebreohanon​—mga Kristiano nga tikang ha relihiyon han mga Judio—​iginhayag niya an kahulogan han Balaud ngan kon paonan-o natutuman an katuyoan han Dios dida kan Kristo. Iginsaysay niya nga  an pipira nga bahin hito nga Balaud may matagnaon nga kahulogan. Pananglitan, an paghalad hin hayop nagpapadagaw han halad nga kamatayon ni Jesus, nga magpapahinabo han tinuod nga kapasayloan han mga sala. (Hebreo 10:1-4) Pinaagi han kamatayon ni Jesus, ginwara han Dios an bili hiton Balaud nga kauyonan tungod kay diri na ito kinahanglanon.​—Kolosas 2:13-17; Hebreo 8:13.

Giya ha husto nga pag-organisa hin kongregasyon. An mga kalalakin-an nga disidido magkaada responsabilidad ha kongregasyon kinahanglan maopay an moralidad ngan makaabot ha mga kwalipikasyon nga ginhisgotan ha Biblia. (1 Timoteo 3:1-10, 12, 13; Tito 1:5-9) An mga magsiringba ni Jehova sadang regular nga magkatirok basi magdinasigay. (Hebreo 10:24, 25) Sadang magin makaparig-on ngan impormatibo an mga katirok para ha pagsingba.​—1 Korinto 14:26, 31.

Han iginsurat ni Pablo an iya ikaduha nga surat kan Timoteo nakadto na liwat hiya ha Roma; priso ngan naghuhulat han sentensya. Hito nga panahon, pipira la an andam mamilegro an kinabuhi basi bisitahon hiya. Maaram hiya nga halipot na la an iya panahon. “Nakig-away ako han maopay nga away,” hiya nagsiring. “Natapos ko an akon pakipagrumba, akon gintipigan an pagtoo.” (2 Timoteo 4:7) Posible nga waray pag-iha katapos hito, ginpatay hi Pablo tungod han iya pagtoo. Kondi an iya mga surat naggigiya han tinuod nga mga magsiringba han Dios tubtob yana.

​—Iginbasar ha Roma; 1 Korinto; 2 Korinto; Galasia; Efeso; Filipos; Kolosas; 1 Tesalonika; 2 Tesalonika; 1 Timoteo; 2 Timoteo; Tito; Filemon; Hebreo.