KATAPOS han tulo ngan tunga ka tuig nga pagsangyaw ngan pagtutdo ni Jesus, maaram hiya nga hirani na an kataposan han iya kinabuhi ha tuna. An Judio nga mga lider han relihiyon nagsarabot pagpatay ha iya, kondi nahadlok hira nga masina an mga natoo nga propeta hiya. Samtang hito nga panahon, gin-impluwensyahan ni Satanas an usa han 12 nga apostol ni Jesus​—hi Judas Iskariote—​nga magin traydor. Ginsuholan hi Judas han mga lider han relihiyon hin 30 nga sinselyo nga salapi ha pagtraydor kan Jesus.

Ha ultimo nga gab-i ni Jesus ha tuna, nagtirok hira Jesus ngan an iya mga apostol basi isaurog an Paskua. Katapos palakton hi Judas, iya gintikangan an usa nga bag-o nga selebrasyon, an Panihapon han Ginoo. Kinuha hiya hin tinapay, nag-ampo, ngan iginhatag ito ha 11 nga nahibilin nga apostol. “Iini an akon lawas, nga ipinanhatag tungod ha iyo,” hiya nagsiring. “Ini buhata niyo nga hinumdoman ha akon.” Ito liwat an iya ginbuhat antes ipasa an alaksiw: “Ini nga irinman amo an bag-o nga testamento han akon dugo.”​—Lukas 22:19, 20.

Damu an kinahanglan isiring ni Jesus ha mga apostol hito nga gab-i. Iya gintagan hira hin bag-o nga sugo​—nga ipakita nira an may pagsakripisyo nga gugma ha kada tagsa. Hiya nagsiring: “Tungod hini an ngatanan makilala, nga kamo akon mga tinon-an, kon kamo maghigugmaanay an usa kag usa.” (Juan 13:34, 35) Iya ginsagdonan hira nga diri mabaraka ha magraot nga hitabo nga ira makikita. Kinasingkasing nga nag-ampo hiya para ha ira, ngan urosa nga nagkanta hira hin mga pagdayaw. Ngan han gab-i na, kinadto hira ha hardin han Getsemani.

Didto, linuhod hi Jesus ngan kinasingkasing nga nag-ampo. Waray pag-iha inabot an grupo hin armado nga sundalo, saserdote, ngan iba pa basi dakpon hiya. Dinaop hi Judas ngan iginpakilala hi Jesus pinaagi ha pagharok ha iya. Samtang gin-gagapos han mga sundalo hi Jesus, pinalagiw an mga apostol.

Didto, ha hitaas nga korte han mga Judio, nagpakilala hi Jesus sugad nga an Anak han Dios. Ginhukman hiya han korte nga salaan hin pagpasipara, salit sadang mamatay. Katapos, gindara hiya kan Gobernador Ponsio Pilato han Roma. Bisan kon hi Pilato waray nakita nga sala kan Jesus, iya iginhatag Hiya ha mga naghihingyap han Iya kamatayon.

Gindara hi Jesus ha Golgota, diin iginraysang hiya ha poste han mga sundalo han Roma. Dida hito, milagroso nga nagsirom an kaadlawon. Waray pag-iha, hito nga kulop, namatay hi Jesus, ngan tigda nga naglinog hin makusog. An iya lawas iginbutang ha bato nga lubnganan. Kinabuwasan, ginsadhan ito han mga saserdote ngan ginbutangan hin bantay an entrada. Nagpabilin ba hi Jesus dida hito nga lubnganan? Waray, tungod kay hirani na mahitabo an pinakaurusahon nga milagro.

​—Iginbasar ha Mateo kapitulo 26 ngan 27; Markos kapitulo 14 ngan 15; Lukas kapitulo 22 ngan 23; Juan kapitulo 12 tubtob 19.