SEKSYON 17
Nagtutdo hi Jesus Mahitungod ha Ginhadian han Dios
Damu an igintutdo ni Jesus ha iya mga disipulo, kondi an Ginhadian han Dios an iya nangunguna nga tema
ANO an toka ni Jesus ha tuna? Hiya mismo nagsiring: “Kinahanglan gud, nga akon igwali an maopay nga sumat han ginhadian han Dios . . . kay tungod hini ako ginsugo.” (Lukas 4:43) Tagda an upat nga butang nga igintutdo ni Jesus mahitungod hito nga Ginhadian, an nangunguna nga tema han iya ministeryo.
1. Igintoka hi Jesus nga magin Hadi. Direkta nga nagsiring hi Jesus nga hiya an iginsaad nga Mesias. (Juan 4:25, 26) Ginpamatud-an liwat niya nga hiya an Hadi nga nakita ni propeta Daniel ha bisyon. Iya ginsidngan an iya mga apostol nga usa ka adlaw malingkod hiya ha “lingkuranan nga hadianon” ngan hira liwat malingkod ha trono. (Mateo 19:28) Ini nga grupo han magmarando iya gintawag sugad nga iya ‘gutiay nga panon,’ ngan nagsiring liwat nga may-ada hiya ‘iba nga mga karnero’ nga diri bahin hito nga grupo.—Lukas 12:32; Juan 10:16.
2. Iaaghat han Ginhadian han Dios an tinuod nga hustisya. Iginpakita ni Jesus nga pagwawad-on han Ginhadian an duro nga kawaray-hustisya pinaagi ha pagbaraan han ngaran ni Jehova nga Dios ngan pagpamatuod nga sayop an tanan nga pakaraot ni Satanas tikang pa han pagrebelde ha Eden. (Mateo 6:9, 10) Iginpakita liwat niya pirme nga waray hiya ginpapasulabi pinaagi ha pagtutdo ha ngatanan—lalaki o babaye, riko o pobre. Bisan kon an iya nangunguna nga toka amo an pagtutdo ha mga Israelita, nangalimbasog liwat hiya pagbulig ha mga Samaritano ngan Hentil, o diri-Judio. Diri pariho ha mga lider han relihiyon ha iya panahon, waray hiya ginpapasulabi o ginpapaboran.
3. An Ginhadian han Dios diri magigin bahin hini nga kalibotan. Ha panahon ni Jesus masamok an kahimtang ha politika. Kontrolado han iba nga nasud an iya natawhan nga lugar. Bisan pa hito, han nangalimbasog an mga tawo nga magkaada hiya katungdanan ha politika, nagdumiri hiya. (Juan 6:14, 15) Iya ginsidngan an usa nga politiko: “An akon ginhadian diri kanan hini nga kalibotan.” (Juan 18:36) Ha iya mga sumurunod, hiya nagsiring: “Diri kamo kanan kalibotan.” (Juan 15:19) Diri niya tutugotan hira nga gumamit hin kampilan, bisan ha pagdepensa ha iya.—Mateo 26:51, 52.
“Hiya nangadto ha tagsa-tagsa nga . . . baryo, ngan nanwawali, ngan nanunumat han mag-opay nga mga sumat han ginhadian han Dios.”—Lukas 8:1
4. An pagmando ni Kristo igbabasar ha gugma. Nagsaad hi Jesus ha paghatag hin karepreskohan ha mga tawo ngan hin kapahuwayan tikang ha problema. (Mateo 11:28-30) Ngan iya gintuman ito. Naghatag hiya hin mahigugma-on ngan praktikal nga sagdon ha paglampos ha kabaraka, pagkaada maopay nga relasyon, pag-ato ha materyalismo, ngan pakabiling hin kalipay. (Mateo, kapitulo 5-7) Tungod kay nagpakita hin gugma, an tanan nga klase hin tawo—bisan an tinalumpigos hinduro—dinaop ha iya, nasarig nga tatratuhon hira hin may pagpaid ngan dignidad. Magigin maopay gud hi Jesus nga Magmarando!
May-ada pa hi Jesus ginamit nga epektibo hinduro nga paagi ha pagtutdo mahitungod ha Ginhadian han Dios. Nagbuhat hiya hin damu nga milagro. Kay ano nga ginbuhat niya ito? Aton kitaon.
