SEKSYON 2
Paraiso nga Nawara
Gin-impluwensyahan han usa nga rebelde nga anghel an siyahan nga lalaki ngan babaye, hira Adan ngan Eva, nga isalikway an pagmando han Dios. Tungod hito, nagkaada sala ngan kamatayon ha kalibotan
MAIHA na antes pa larangon an tawo, ginlarang han Dios an damu nga diri-nakikita nga espiritu—an mga anghel. Ha Eden, usa nga rebelde nga anghel nga gintawag nga Satanas nga Yawa an tuso nga nangalimbasog pagsulay kan Eva nga kumaon han bunga han usa nga puno nga igindidiri han Dios.
Pinaagi ha paggamit hin serpyente, o halas, ha pakiistorya, iginpasabot ni Satanas nga may maopay nga butang nga diri iginhahatag han Dios ha mag-asawa. Hi Satanas nagsiring kan Eva nga diri hira mamamatay kon kumaon hira han igindidiri nga bunga. Hito nga paagi, gin-akusahan niya an Dios ha pagbuwa ha Iya mga anak nga tawo. Iginpresenta ni Satanas nga an pagin diri-masinugtanon ha Dios makaruruyag ngan magriresulta ha kahibaro ngan kagawasan. Kondi, buwa ini ngatanan—ha pagkamatuod, ito an siyahan nga buwa. An tinuod nga isyu nag-uupod han pagkasoberano o supremo nga pagmando han Dios—kon may katungod ba an Dios ha pagmando, kon iya ba ito ginbubuhat ha makatadunganon nga paagi ngan para ha makakaopay gud ha iya mga sakop.
Tinoo hi Eva han buwa ni Satanas. Nagtikang hiya paghingyap han bunga, katapos kinaon hito. Ha urhi, gintagan niya an iya bana, ngan kinaon liwat. Salit, nagin makasasala hira. Iton baga hin simple nga buhat, ha pagkamatuod, nagpapakita hin pagrebelde. Pinaagi han tinuyo nga pagtalapas ha sugo han Dios, ginsalikway nira Adan ngan Eva an pagmando han Maglalarang nga naghatag ha ira han tanan, upod na an ira hingpit nga kinabuhi.
An binhi “magtutultog han imo ulo, ngan hi ikaw magtutultog han iya tikod.”—Genesis 3:15
Iginpahayag han Dios an paghukom hini nga mga rebelde. Iya igintagna an pag-abot han iginsaad nga Binhi, o Manluluwas, nga magbubungkag kan Satanas, an ginrirepresentaran han serpyente. Waray dayon pataya han Dios hira Adan ngan Eva, hito nga paagi iya iginpakita an kalooy ha ira waray pa katatawo nga mga anak. Ito nga mga anak magkakaada paglaom tungod kay an Usa nga ipapadara han Dios magwawara han makasurubo nga mga resulta han pagrebelde ha Eden. Kon paonan-o matutuman an katuyoan han Dios may kalabotan hinin tidaraon nga Manluluwas—ngan kon hin-o an Usa nga ipapadara—hinay-hinay nga iginpahayag samtang iginsusurat an Biblia.
Ginpaiwas han Dios hira Adan ngan Eva ha Paraiso. Kinahanglan hira mangalimbasog hinduro basi masuportahan an ira kalugaringon pinaagi ha pagkultibar han tuna ha gawas han Eden. Katapos, nagburod ngan nag-anak hi Eva kan Kain, an suhag nira ni Adan. May-ada pa hira iba nga anak nga kalalakin-an ngan kababayin-an, upod na hi Abel ngan hi Set, an kaapoy-apoyan ni Noe.
—Iginbasar ha Genesis kapitulo 3 tubtob 5; Pahayag 12:9.
