HI Daniel, usa nga batan-on nga marig-on an integridad, gindistyero ha Babilonya antes bungkagon an Jerusalem. Hiya ngan an pipira nga Judio—distyero tikang ha nasakop nga ginhadian han Juda—gintagan hin kagawasan han nagdakop ha ira. Durante han iya maiha nga pag-ukoy ha Babilonya, ginbendisyonan gud hiya han Dios, nakatalwas pa ngani ha kamatayon ha lungib han leon ngan nakakarawat hin mga bisyon, salit nahibaro han tidaraon. An pinakaimportante han tagna ni Daniel nakasentro ha Mesias ngan ha Iya pagmando.

Hinbaroan ni Daniel kon san-o maabot an Mesias. Ginsumatan hi Daniel kon san-o maabot an Mesias nga Magmarando​—69 ka semana han mga tuig katapos isugo an pagpahiuli ngan pagtukod utro han pader han Jerusalem. An usa ka semana may-ada pito ka adlaw; an usa ka semana han mga tuig may-ada pito ka tuig. Iginpasa ito nga sugo han 455 A.K.P, maiha na tikang han mamatay hi Daniel. Tikang hito nga tuig, an 69 ka “semana” nagpadayon hin 483 ka tuig, ngan nagtapos han 29 K.P. Ha masunod nga bahin hini nga publikasyon, hibabaroan naton kon ano an nahitabo hito nga tuig. Igintagna liwat ni Daniel nga “uutdon,” o papatayon, an Mesias sugad nga bayad han sala.​—Daniel 9:24-26.

An Mesias magigin Hadi ha langit. Ha naiiba nga bisyon han langit, hinkit-an ni Daniel an Mesias, nga gintawag nga “pariho han anak han tawo,” nga dinaop ha trono ni Jehova. Katapos, iginhatag ni Jehova ha iya an ‘kagamhanan ngan himaya ngan ginhadian.’ Ito nga Ginhadian magpapabilin ha kadayonan. Dugang pa, hinbaroan ni Daniel an usa pa nga makalilipay nga detalye mahitungod han Ginhadian han Mesias​—may igkakaupod an Hadi ha pagmando, usa nga grupo nga gintatawag nga “[an] baraan han Gihihitaasi.”​—Daniel 7:13, 14, 27.

Bubungkagon han Ginhadian an mga gobyerno hini nga kalibotan. Gintagan han Dios hi Daniel hin abilidad ha pag-interpretar hin inop nga nakagupong kan Nabukodonosor, an hadi han Babilonya. Hinkit-an han hadi an daku hinduro nga imahen nga bulawan an ulo, salapi an dughan ngan mga butkon, tumbaga an tiyan ngan mga paa, puthaw an mga bitiis, ngan puthaw ngan lapok an mga tiil. Katapos, may bato tikang ha bukid nga nakaigo han diri marig-on nga tiil hito ngan nadugmok ito. Iginsaysay ni Daniel nga an mga bahin han imahen nagrirepresentar han pagkasunod-sunod han magmamando ha kalibotan ha sulod hin maiha nga panahon, nga an siyahan hito amo an Babilonya sugad nga an ulo nga bulawan. Igintagna liwat niya nga ha panahon han ultimo nga mga magmarando hinin maraot nga kalibotan, magios an Ginhadian han Dios. Dudugmukon hito an tanan nga gobyerno han kalibotan. Katapos, magmamando ito ha kadayonan.​—Daniel, kapitulo 2.

Lagas na hi Daniel han hikit-an an kabungkagan han Babilonya. Ginpirde ni Hadi Ciro an syudad sugad la han igintagna han mga propeta. Waray pag-iha, nagkaada kagawasan an mga Judio tikang ha pagkadistyero​—eksakto nga panahon uyon ha tagna, katapos ito han igintagna nga 70 ka tuig nga pagkabinayaan han ira natawhan nga tuna. Ha giya han magtinumanon nga gobernador, saserdote, ngan propeta, natapos han mga Judio an pagtukod utro han Jerusalem ngan pag-ayad han templo ni Jehova. Kondi, ano an mahitatabo katapos han 483 ka tuig?

​—Iginbasar ha libro han Daniel.