1, 2. Kay ano nga an Biblia makalilipay gud nga regalo tikang ha Dios?

ANO an imo aabaton kon an imo sangkay surprisa nga maghatag ha imo hin regalo? Eksayted ka gud nga abrihan ito, ngan malilipay ka nga nahinumdoman ka han imo sangkay. Papasalamatan mo hiya tungod hito.

² An Biblia usa nga regalo tikang ha Dios. May mga impormasyon ito nga diri naton mabibilngan ha bisan diin. Pananglitan, nagsusumat ito ha aton nga ginlarang han Dios an langit, an tuna, ngan an siyahan nga lalaki ngan babaye. May mga prinsipyo ito nga makakabulig ha aton kon may mga problema kita. Ha Biblia, nahibabaroan naton kon paonan-o tutumanon han Dios an iya katuyoan nga himoon an tuna nga mas maopay nga lugar. An Biblia makalilipay gud nga regalo!

3. Ano an imo mahibabaroan ha imo pag-aram ha Biblia?

³ Ha imo pag-aram ha Biblia, mahibabaroan mo nga karuyag han Dios nga magin sangkay ka niya. Samtang mas damu an imo nahibabaroan mahitungod ha iya, mas magigin duok an imo pakigsangkay ha iya.

4. Para ha imo, ano an nakakabilib mahitungod ha Biblia?

⁴ An Biblia iginhubad na ha mga 2,600 nga linggwahe, ngan binilyon nga kopya hito an naimprinta na. Sobra 90 porsyento han mga tawo ha kalibotan an  makakabasa han Biblia ha ira linggwahe. Ngan kada semana, sobra usa ka milyon nga tawo an nagkakaada Biblia! Oo, waray gud libro nga pariho han Biblia.

5. Kay ano nga masisiring nga an Biblia “giniyahan han Dios”?

⁵ An Biblia “giniyahan han Dios.” (Basaha an 2 Timoteo 3:16.) Pero an iba bangin maghunahuna, ‘An Biblia iginsurat hin mga tawo, salit kay ano nga masisiring nga tikang ito ha Dios?’ An Biblia nabaton: “An mga tawo nagyakan hin tikang ha Dios samtang ginpapagios [o, ginigiyahan] hira han baraan nga espiritu.” (2 Pedro 1:21) Pariho ini ha usa nga negosyante nga nagsusugo ha iya sekretaryo nga maghimo hin surat. Hin-o an awtor han surat? An negosyante, diri an  sekretaryo. Ha pariho nga paagi, an Dios an Awtor han Biblia, diri an mga tawo nga gin-gamit niya pagsurat hito. Gin-giyahan hira han Dios ha pagsurat han iya panhunahuna. Salit, an Biblia “pulong han Dios.”​—1 Tesalonica 2:13; kitaa an Endnote 2.

6, 7. Kay ano nga masisiring naton nga an sulod han Biblia nagkakauruyon?

⁶ An Biblia iginsurat ha sulod hin sobra 1,600 ka tuig. An mga parasurat hito nabuhi ha iba-iba nga panahon. An pipira ha ira edukado ngan an iba diri. Pananglitan, an usa ha ira doktor. An iba mga parauma, parapangisda, paraataman hin karnero, propeta, hukom, ngan hadi. Bisan kon iba-iba an nagsurat, an tanan nga bahin han Biblia nagkakauruyon. An ginsisiring ha usa nga kapitulo diri nasumpaki ha iba nga kapitulo. *

⁷ An una nga mga kapitulo han Biblia nagsasaysay kon paonan-o nagtikang an mga problema ha kalibotan, ngan an ultimo nga mga kapitulo nagsusumat ha aton kon paonan-o susulbaron han Dios ito nga mga problema pinaagi ha paghimo han tuna nga paraiso. Iginsusumat han Biblia an kasaysayan han tawo ha sulod hin yinukot ka tuig ngan iginpapakita hito nga pirme natutuman an katuyoan han Dios.

8. Paghatag hin mga ehemplo nga nagpapakita nga husto an Biblia may kalabotan ha syensya.

⁸ An Biblia iginsurat diri para magtutdo hin syensya  o para magin libro nga gin-aadman ha eskwelahan, pero pirme husto an mga ginsisiring hito may kalabotan ha syensya. Ito gud an aton malalaoman ha usa nga libro nga tikang ha Dios. Pananglitan, an libro han Levitico nagsusulod hin mga instruksyon han Dios kon paonan-o malilikyan han mga Israelita nga makatapon an usa nga sakit. Iginsurat ini maiha na antes pa mahibaroan han mga tawo kon paonan-o an mga bakterya ngan virus nagigin hinungdan hin sakit. Husto nga igintututdo liwat han Biblia nga an tuna nakabitay ha waray binibitayan. (Job 26:7) Ngan ha panahon nga an kadam-an han mga tawo natoo nga an tuna patag, an Biblia nagsiring nga malidong ito.​—Isaias 40:22.

9. Ano an iginpapakita ha aton han pagin tangkod han mga parasurat han Biblia?

⁹ Kon an Biblia nag-iistorya mahitungod ha kasaysayan, pirme ito husto. Pero damu nga libro mahitungod ha kasaysayan an diri bug-os an pagin husto tungod kay an mga nagsurat hito diri tangkod. Pananglitan, diri nira pirme ginsusurat an mahitungod ha mga panahon nga napirde an ira nasud ha girra. Pero an mga parasurat han Biblia tangkod, bisan ha mga panahon nga napirde an Israel. Iginsurat liwat nira an ira mismo mga sayop. Pananglitan ha libro han Numeros, ginsusumatan kita ni Moises nga nakahimo hiya hin seryoso nga sayop ngan gindisiplina hiya han Dios tungod hito. (Numeros 20:2-12) An pagin tangkod han mga parasurat han Biblia nagpapakita nga an Biblia tikang ha Dios. Nagpapasabot ito nga masasarigan naton an Biblia.

10. Kay ano nga an sagdon ha Biblia nakakabulig ha aton yana?

¹⁰ An Biblia “giniyahan han Dios ngan mapulsanon ha pagtutdo, ha pagsaway, ha pagtadong han mga butang.” (2 Timoteo 3:16) Oo, an sagdon ha Biblia nakakabulig ha aton yana. Maaram hi Jehova kon paonan-o kita ginhimo, salit nasasabtan niya an aton panhunahuna ngan inaabat. Mas kilala kita niya kay han pagkakilala naton ha aton kalugaringon, ngan karuyag niya nga magin malipayon kita. Maaram hiya kon ano an makakaopay ngan makakaraot ha aton.

11, 12. (a) Ano nga mag-opay nga sagdon an iginhatag ni Jesus ha Mateo kapitulo 5 tubtob 7? (b) Ano pa an aton mahibabaroan ha Biblia?

¹¹ Ha Mateo kapitulo 5 tubtob 7, mababasa naton an mag-opay gud nga sagdon nga iginhatag ni Jesus mahitungod ha kon paonan-o magigin malipayon, magkakaada maopay nga relasyon ha iba, mag-aampo, ngan kon ano an sadang magin panhunahuna naton ha kwarta. Bisan kon 2,000 ka tuig na an naglabay tikang han iginhatag niya ini nga sagdon, epektibo ngan nakakabulig pa gihapon ito yana.

¹² Ha Biblia, gintututdoan liwat kita ni Jehova hin mga prinsipyo nga nakakabulig ha aton nga magkaada malipayon nga pamilya, magin maopay nga trabahador, ngan magkinabuhi nga murayaw kaupod an iba. An mga prinsipyo ha Biblia pirme makakabulig ha aton, hin-o man kita, diin man kita naukoy, o anoman an aton problema.​—Basaha an Isaias 48:17; kitaa an Endnote 3.

13. Ano an ginsiring ni Isaias nga mahitatabo ha syudad han Babilonya?

¹³ Damu nga tagna ha Biblia an natuman na. Pananglitan, igintagna ni Isaias nga mabubungkag an Babilonya. (Isaias 13:19) Detalyado nga iginsaysay  niya kon paonan-o an syudad mapipirde. An syudad napuproteksyonan hin dagku nga ganghaan ngan hin salog. Pero igintagna ni Isaias nga papahubason an salog ngan babayaan nga abrido an mga ganghaan. Masasakop han mga kaaway an syudad nga waray mahitatabo nga girra. Igintagna pa ngani ni Isaias nga usa nga lalaki nga an ngaran hi Ciro an makakapirde han Babilonya.​—Basaha an Isaias 44:27–45:2; kitaa an Endnote 4.

14, 15. Paonan-o natuman an tagna ni Isaias?

¹⁴ Paglabay hin 200 ka tuig tikang han iginsurat an tagna, usa nga grupo hin kasundalohan nga andam umatake ha Babilonya an inabot. Hin-o an ira lider? Sugad han siring han tagna, hi Ciro, an hadi han Persia. Andam na an ngatanan para ha katumanan han iba pa nga bahin han tagna.

¹⁵ Han gab-i nga umatake an mga kaaway, may piyesta an mga taga-Babilonya. Inabat nira nga talwas hira kay napuproteksyonan hira hin marig-on nga  mga pader ngan hin salog. Ha gawas han syudad, hi Ciro ngan an iya kasundalohan naghimo hin kanal basi maghamabaw an tubig han salog. Naghamabaw an salog tubtob nga puydi na maglakat dida hito an kasundalohan han Persia. Pero paonan-o makakasulod an kasundalohan ha mga pader han Babilonya? Sugad han siring han tagna, an mga ganghaan han syudad ginbayaan nga abrido, salit nasakop han kasundalohan an syudad nga waray nahitabo nga girra.

16. (a) Ano an igintagna ni Isaias mahitungod han dadangatan han Babilonya? (b) Paonan-o kita nahibaro nga natuman an tagna ni Isaias?

¹⁶ Igintagna ni Isaias nga ha urhi waray na gud bisan usa nga maukoy utro ha Babilonya. Hiya nagsurat: “Diri na gud hiya uukyan, ngan diri na gud hiya magigin urukyan ha ngatanan nga henerasyon.” (Isaias 13:20) Natuman ba ito? Ha lugar diin nahimumutang hadto an Babilonya, nga mga 80 ka kilometro ha sur han Baghdad, Iraq, mga kagubaan na la an aadto. Bisan yana, waray na naukoy didto. Ginsilhig ni Jehova an Babilonya “pinaagi han silhig nga nagpupoo [o, nagbubungkag].”​—Isaias 14:22, 23. *

17. Kay ano nga makakasarig kita ha ngatanan nga saad han Dios?

¹⁷ An kamatuoran nga damu gud nga tagna ha Biblia an natuman na nagpapasabot nga makakasarig kita ha ginsisiring han Biblia mahitungod ha tiarabot. Makakasigurado kita nga tutumanon ni Jehova an iya saad nga hihimoon niya nga paraiso an tuna. (Basaha an Numeros 23:19.) Oo, may paglaom kita nga “kinabuhi  nga waray kataposan nga maiha na nga iginsaad han Dios nga diri makakagbuwa.”​—Tito 1:2. *

18. Ano an ginsiring ni Pablo mahitungod ha “pulong han Dios”?

¹⁸ Nahibaroan naton nga waray libro nga pariho han Biblia. Nagkakauruyon an sulod hito, ngan kon nag-uunabi ito may kalabotan ha syensya o ha kasaysayan, pirme ito husto. Naghahatag liwat ito ha aton hin mag-opay nga sagdon ngan may damu ito nga tagna nga natuman na. Pero labaw pa hito an nahihimo han Biblia. Hi apostol Pablo nagsurat: “An pulong han Dios buhi ngan gamhanan.” Ano an iginpapasabot hito?​—Basaha an Hebreo 4:12.

19, 20. (a) Paonan-o makakabulig ha imo an Biblia nga hibaroan an imo tinuod nga pagkatawo? (b) Paonan-o mo maipapakita nga mapasalamaton ka han regalo nga Biblia?

¹⁹ An Biblia makakagbag-o han imo kinabuhi. Makakabulig ito ha imo nga hibaroan an imo tinuod nga pagkatawo ngan masabtan an imo gihilarumi nga panhunahuna ngan pagbati. Pananglitan, bangin naghuhunahuna kita nga hinigugma naton an Dios. Pero basi pamatud-an ito, kinahanglan iaplikar naton an ginsisiring han Biblia.

²⁰ An Biblia usa gud nga libro tikang ha Dios. Karuyag niya nga basahon, pag-adman, ngan higugmaon mo ito. Pagpasalamat tungod hito nga regalo, ngan padayon nga pag-admi ito. Ngan masasabtan mo an katuyoan han Dios para ha mga tawo. Ha sunod nga kapitulo, mahibabaro kita hin dugang pa mahitungod hini nga katuyoan.