1, 2. (a) Paonan-o nagigin importante ha imo an usa nga regalo? (b) Kay ano nga an lukat an pinakalabaw nga regalo han Dios?

ANO an pinakamaopay nga regalo nga imo nakarawat? Diri kinahanglan nga marahalon an usa nga regalo basi magin importante ito ha imo. Kon an usa nga regalo nakakapalipay ha imo o amo gud an imo kinahanglan, mapasalamaton ka tungod hito.

² Ha ngatanan nga regalo nga iginhatag ha aton han Dios, may usa nga regalo nga mas kinahanglan naton kay ha bisan ano nga butang. Ito an pinakalabaw nga regalo han Dios ha mga tawo. Hini nga kapitulo, mahibabaroan naton nga ginpakanhi ni Jehova an iya Anak nga hi Jesu-Kristo, basi mabuhi kita ha waray kataposan. (Basaha an Mateo 20:28.) Pinaagi ha pagsugoa kan Jesus nganhi ha tuna sugad nga lukat, ginpamatud-an ni Jehova nga hinigugma gud kita niya.

3. Kay ano nga namamatay an mga tawo?

³ An lukat amo an paagi ni Jehova ha paghatag hin kagawasan ha mga tawo tikang ha sala ngan kamatayon. (Efeso 1:7) Basi masabtan kon kay ano nga ginkikinahanglan an lukat, sadang naton hibaroan an nahitabo ha garden han Eden yinukot ka tuig na an naglabay. An aton siyahan nga mga kag-anak, hira Adan ngan Eva, nakasala. Tungod kay nakasala hira, namatay hira. Namamatay  liwat kita tungod kay napanunod naton an sala tikang ha ira.​—Kitaa an Endnote 9.

4. Hin-o hi Adan, ngan ano an may-ada hiya?

⁴ Han ginlarang ni Jehova an siyahan nga tawo nga hi Adan, may iginhatag Hiya ha iya nga presyoso gud. Gintagan niya hi Adan hin perpekto nga kinabuhi. May perpekto hiya nga hunahuna ngan lawas. Diri gud hiya magkakasakit, malalagas, ngan mamamatay. Tungod kay ginlarang ni Jehova hi Adan, sugad hin tatay Hiya ni Adan. (Lucas 3:38) Hi Jehova regular nga nakiistorya ha iya. Klaro nga iginsaysay han Dios kan Adan kon ano an iya ginlalaoman ha iya ngan gintagan hiya hin makalilipay nga trabaho.​—Genesis 1:28-30; 2:16, 17.

5. Ano an iginpapasabot han ginsisiring han Biblia nga hi Adan ginhimo “ha dagway han Dios”?

⁵ Hi Adan ginlarang “ha dagway han Dios.” (Genesis 1:27) Gintagan hiya ni Jehova hin mga kalidad nga pariho han Iya, upod na an gugma, kinaadman, hustisya, ngan gahum. Iya gintagan hi Adan hin kagawasan ha pagbuot. Diri robot hi Adan. Ginlarang hiya han Dios ha paagi nga makakagpili hiya ha pagbuhat han husto o sayop. Kon ginpili ni Adan nga sumugot ha Dios, puydi unta hiya mabuhi ha waray kataposan ha Paraiso.

6. Han hi Adan waray sumugot ha Dios, ano an nawara ha iya? Ano an epekto hito ha aton?

⁶ Han hi Adan waray sumugot ha Dios ngan ginsentensyahan hin kamatayon, daku gud an nagin kabalyo hito. Nawara ha iya an iya espesyal nga pakigsangkay kan Jehova, an iya perpekto nga kinabuhi, ngan an iya urukyan nga Paraiso. (Genesis 3:17-19) Ginpili nira Adan ngan Eva nga diri sumugot ha Dios, salit waray na hira paglaom. Tungod han ginbuhat ni Adan, “an sala sinulod ha kalibotan ngan an kamatayon pinaagi  han sala, tungod hito an kamatayon dinangat ha ngatanan nga tawo kay hira ngatanan nakasala.” (Roma 5:12) Han nakasala hi Adan, “iginbaligya” niya an iya kalugaringon ngan pati kita, ha pagkauripon ha sala ngan kamatayon. (Roma 7:14) May-ada pa ba kita paglaom? Oo, may-ada.

7, 8. Ano an usa nga lukat?

⁷ Ano an usa nga lukat? An ideya may kalabotan han usa nga lukat kasagaran na nga nag-uupod hin duha nga butang. Siyahan, an lukat amo an kantidad nga iginbabayad basi tagan hin kagawasan an usa nga tawo o basi tubuson an usa nga butang. Ikaduha, an lukat amo an presyo nga igintatapar, o iginbabayad, ha kantidad han usa nga butang.

⁸ Waray tawo nga makakabayad han daku gud nga kadaot nga nahimo ni Adan han nakasala hiya ngan nagin hinungdan nga mamatay kita. Pero igintagana ni Jehova an paagi basi magkaada kita kagawasan tikang ha sala ngan kamatayon. Aton usisahon kon paonan-o igintagana an lukat ngan kon paonan-o kita makakapahimulos hito.

9. Ano nga lukat an kinahanglan ibayad?

⁹ Waray gud bisan hin-o ha aton an makakabayad han lukat para ha perpekto nga kinabuhi nga nawara ni Adan. Kay ano? Kay kita ngatanan diri perpekto. (Salmo 49:7, 8) An lukat nga kinahanglan ibayad amo an usa liwat nga perpekto nga kinabuhi han tawo. Ito an rason nga gintatawag ito nga “katugbang nga lukat.” (1 Timoteo 2:6) An lukat kinahanglan pariho an bili ha kinabuhi nga nawara ni Adan.

10. Paonan-o igintagana ni Jehova an lukat?

 ¹⁰ Paonan-o igintagana ni Jehova an lukat? Ginsugo ni Jehova nganhi ha tuna an iya pinakapresyoso nga Anak. Ini nga Anak nga hi Jesus, amo an iya siyahan gud nga ginlarang. (1 Juan 4:9, 10) Kinaburut-on nga binaya hi Jesus ha iya Amay ngan ha iya urukyan ha langit. (Filipos 2:7) Iginbalhin ni Jehova hi Jesus tikang ha langit nganhi ha tuna, ngan igin-anak hi Jesus sugad nga perpekto nga tawo, nga waray sala.​—Lucas 1:35.

11. Paonan-o an usa nga tawo magigin lukat para ha ngatanan nga tawo?

¹¹ Nawara han siyahan nga tawo nga hi Adan an perpekto nga kinabuhi para ha ngatanan nga tawo han waray hiya sumugot kan Jehova. May-ada ba iba nga tawo nga makakagwara han kamatayon para ha ngatanan nga anak ni Adan? Oo. (Basaha an Roma 5:19.) Hi Jesus, nga waray gud makasala, naghatag han iya perpekto nga kinabuhi sugad nga lukat. (1 Corinto 15:45) An iya perpekto nga kinabuhi magagamit basi wad-on an kamatayon para ha ngatanan nga anak ni Adan.​—1 Corinto 15:21, 22.

12. Kay ano nga kinahanglan makaeksperyensya hi Jesus hin duro nga pag-antos?

¹² Iginsasaysay han Biblia an duro nga pag-antos nga naeksperyensyahan ni Jesus antes hiya mamatay. Waray kalooy nga ginlatigo hiya, iginraysang ha pasakitan nga kahoy, ngan nag-ilob hin hinay-hinay ngan masakit nga kamatayon. (Juan 19:1, 16-18, 30) Kay ano nga kinahanglan makaeksperyensya hi Jesus hin duro nga pag-antos? Tungod kay hi Satanas nagsiring nga waray tawo nga magigin maunungon ha Dios kon naatubang hin magkuri nga pagsari. Ginpamatud-an ni Jesus nga mahimo  magin maunungon ha Dios an usa nga perpekto nga tawo bisan kon nakakaeksperyensya hin duro nga pag-antos. Hunahunaa la an kalipay ni Jehova tungod han pagin maunungon ni Jesus!​—Proberbios 27:11; kitaa an Endnote 15.

13. Paonan-o iginbayad an lukat?

¹³ Paonan-o iginbayad an lukat? Iginhatag ni Jesus ha iya Amay an bili han iya kinabuhi. Ha tuig 33, han Nisan 14 han kalendaryo han mga Judio, gintugotan ni Jehova nga patayon hi Jesus han iya mga kaaway. (Hebreo 10:10) Paglabay hin tulo ka adlaw, ginbanhaw ni Jehova hi Jesus, diri sugad nga tawo, kondi sugad nga espiritu. Ha urhi, han binalik hi Jesus ha iya Amay ha langit, iya iginpresenta kan Jehova an bili han iya perpekto nga tawhanon nga kinabuhi sugad nga lukat. (Hebreo 9:24) Yana nga iginbayad na an lukat, may higayon na kita nga magkaada kagawasan tikang ha sala ngan kamatayon.​—Basaha an Roma 3:23, 24.

14, 15. Ano an kinahanglan naton buhaton basi mapasaylo an aton mga sala?

¹⁴ Nagpapahimulos na kita ha pinakalabaw nga regalo han Dios. Kitaon naton kon paonan-o kita nagpapahimulos hito yana ngan kon paonan-o kita magpapahimulos hito ha tiarabot.

¹⁵ Napapasaylo an aton mga sala. Makuri an pagbuhat han husto ha ngatanan nga panahon. Nakakahimo kita hin mga sayop, ngan usahay an aton ginyayakan ngan ginbubuhat diri husto. (Colosas 1:13, 14) Paonan-o kita mapapasaylo? Kinahanglan tinuod kita nga  nagbabasol ha aton nahimo nga sayop ngan mapainubsanon nga maghangyo kan Jehova nga pasayloon kita. Hito nga paagi, makakasarig kita nga papasayloon an aton mga sala.​—1 Juan 1:8, 9.

16. Ano an kinahanglan naton buhaton basi magkaada kita maopay nga konsensya?

¹⁶ Mahimo kita magkaada maopay nga konsensya. Kon an aton konsensya nagsusumat ha aton nga may nahimo kita nga sayop, naabat kita hin pagin salaan, bangin umabat pa ngani kita hin kawaray-paglaom ngan kawaray-pulos. Pero diri kita sadang umundang. Kon makikimalooy kita kan Jehova para hin kapasayloan, makakasiguro kita nga papamatian ngan papasayloon kita niya. (Hebreo 9:13, 14) Karuyag ni Jehova nga iistorya naton ha iya an bisan ano nga aton problema ngan kaluyahan. (Hebreo 4:14-16) Sugad nga resulta, magkakaada kita murayaw nga relasyon ha Dios.

17. Ano nga mga bendisyon an nagin posible tungod kay namatay hi Jesus para ha aton?

¹⁷ May paglaom kita nga mabuhi ha waray kataposan. “An bayad han sala amo an kamatayon, pero an regalo nga iginhahatag han Dios amo an kinabuhi nga waray kataposan pinaagi kan Kristo Jesus nga aton Ginoo.” (Roma 6:23) Tungod kay namatay hi Jesus para ha aton, puydi kita mabuhi ha waray kataposan ngan magkaada perpekto nga kahimsog. (Pahayag 21:3, 4) Pero ano an kinahanglan naton buhaton basi makarawat ito nga mga bendisyon?

18. Paonan-o kita nahibaro nga hinigugma kita ni Jehova?

¹⁸ Hunahunaa an imo kalipay kon may naghahatag ha imo hin maopay nga regalo. An lukat amo an  pinakapresyoso nga regalo, ngan sadang kita magin mapasalamaton gud kan Jehova tungod hito. An Juan 3:16 nagsusumat ha aton nga “hinigugma gud han Dios an kalibotan salit iginhatag niya an iya bugtong nga Anak.” Oo, hinigugma gud kita ni Jehova salit iya iginhatag ha aton an iya presyoso nga Anak nga hi Jesus. Ngan maaram kita nga hinigugma liwat kita ni Jesus, kay kinaburut-on nga namatay hiya para ha aton. (Juan 15:13) An regalo nga lukat sadang makakombinse ha imo nga hinigugma ka gud ni Jehova ngan ni Jesus.​—Galacia 2:20.

19, 20. (a) Paonan-o ka magigin sangkay ni Jehova? (b) Paonan-o mo maipapakita nga ginkakarawat mo an halad-lukat ni Jesus?

¹⁹ Yana nga nahibaroan mo na an mahitungod han daku nga gugma han Dios, paonan-o ka magigin iya sangkay? Diri masayon higugmaon an usa nga diri mo kilala. An Juan 17:3 nasiring nga puydi naton makilala hi Jehova. Samtang ginbubuhat mo ito, maghihilarom an imo gugma ha iya, hihingyapon mo nga lipayon hiya, ngan magigin iya ka sangkay. Salit padayon nga mahibaro mahitungod kan Jehova pinaagi ha pag-aram han Biblia.​—1 Juan 5:3.

²⁰ Karawata an halad-lukat ni Jesus. An Biblia nasiring nga “an nagpapakita hin pagtoo ha Anak may kinabuhi nga waray kataposan.” (Juan 3:36) Ano an iginpapasabot han pagpakita hin pagtoo? Nagpapasabot ito hin pagbuhat han mga igintutdo ni Jesus nga sadang naton buhaton. (Juan 13:15) Diri kita sadang magsiring la nga natoo kita kan Jesus. Basi ipakita nga ginkakarawat naton an lukat, kinahanglan may buhaton kita may kalabotan han aton pagtoo. Ha Santiago 2:26, aton mababasa: “An pagtoo nga waray mga buhat patay.”

21, 22. (a) Kay ano nga sadang kita tumambong ha Memoryal han kamatayon han Kristo kada tuig? (b) Ano an hihisgotan ha Kapitulo 6 ngan 7?

 ²¹ Tambong ha Memoryal han kamatayon han Kristo. Ha gab-i antes mamatay hi Jesus, iya kita gintutdoan nga sadang kita magkaada hin memoryal han iya kamatayon. Ginbubuhat naton ito kada tuig, ngan gintatawag ito nga Memoryal o “Panihapon han Ginoo.” (1 Corinto 11:20; Mateo 26:26-28) Karuyag ni Jesus nga hinumdoman naton nga iya iginhatag an iya perpekto nga kinabuhi sugad nga lukat para ha aton. Hiya nagsiring: “Padayon nga buhata niyo ini sugad nga hinumdoman ha akon.” (Basaha an Lucas 22:19.) Kon natambong ka ha Memoryal, iginpapakita mo nga ginhihinumdom mo an lukat ngan an daku nga gugma ni Jehova ngan ni Jesus ha aton.—Kitaa an Endnote 16.

²² An lukat amo an pinakalabaw nga regalo nga aton makakarawat. (2 Corinto 9:14, 15) Inin presyoso nga regalo mapapahimulosan bisan han minilyon nga tawo nga nagkamatay na. Hihisgotan ha Kapitulo 6 ngan 7 kon paonan-o ito nagigin posible.