1, 2. Para ha imo, kay ano nga espesyal nga regalo an pag-ampo, ngan kay ano nga kinahanglan naton mahibaroan an igintututdo han Biblia mahitungod hito?

KON itatanding ha uniberso, gutiay gud la an tuna. Kon nagkikita hi Jehova ha tuna, an tanan nga tawo ha tanan nga nasud baga hin usa la nga gutiay nga turo hin tubig tikang ha balde. (Salmo 115:15; Isaias 40:15) Bisan kon gutiay gud la kita kon itatanding ha uniberso, an Salmo 145:18, 19 nasiring: “Hi Jehova hirani ha ngatanan nga natawag ha iya, ha ngatanan nga natawag ha iya uyon ha kamatuoran. Iya gintatagbaw an hingyap han mga may kahadlok ha iya; namamati hiya han ira pangaraba para hin bulig, ngan iya hira gintatalwas.” Daku gud ito nga pribilehiyo para ha aton! Hi Jehova, an makagarahum-ha-ngatanan nga Maglalarang, karuyag magin duok ha aton ngan mamati ha aton mga pag-ampo. Oo, an pag-ampo usa nga pribilehiyo, espesyal nga regalo ni Jehova ha tagsa ha aton.

² Pero papamatian la kita ni Jehova kon makikiistorya kita ha iya ha paagi nga iya gin-uuyonan. Paonan-o naton ito mahihimo? Kitaon naton an ginsisiring han Biblia mahitungod ha pag-ampo.

3. Kay ano nga sadang ka mag-ampo kan Jehova?

³ Karuyag ni Jehova nga mag-ampo, o makiistorya, ka ha iya. Paonan-o kita nahibaro hito? Alayon basaha  an Filipos 4:6, 7. Hunahunaa iton mahigugmaon nga imbitasyon. An Magmarando han uniberso interesado gud ha imo ngan karuyag niya nga isumat mo ha iya an imo inaabat ngan mga problema.

4. Paonan-o an regular nga pag-ampo kan Jehova nagpaparig-on han imo pakigsangkay ha iya?

⁴ An pag-ampo nabulig ha aton nga magkaada duok nga pakigsangkay kan Jehova. Kon an magsangkay regular nga nag-iistorya han ira ginhuhunahuna, ginkakabarak-an, ngan inaabat, mas nagririg-on an ira pagkamagsangkay. Puropariho hito an pag-ampo kan Jehova. Pinaagi han Biblia, iya iginsusumat ha imo an iya panhunahuna ngan inaabat ngan an iya bubuhaton ha tiarabot. Puydi mo isumat ha iya bisan an imo gihilarumi nga pagbati pinaagi ha regular nga pakiistorya ha iya. Samtang ginbubuhat mo ito, mas magririg-on an imo pakigsangkay kan Jehova.​—Santiago 4:8.

5. Paonan-o kita nahibaro nga diri ngatanan nga pag-ampo ginpapamatian ni Jehova?

⁵ Ginpapamatian ba ni Jehova an ngatanan nga pag-ampo? Diri. Ha panahon ni propeta Isaias, hi Jehova nagsiring ha mga Israelita: “Bisan kon damu an iyo pag-ampo, diri ako namamati; an iyo mga kamot puno hin dugo.” (Isaias 1:15) Salit kon diri kita maghihirot, mahimo kita makabuhat hin mga butang nga magpapahirayo ha aton kan Jehova, nga magigin hinungdan nga diri niya pamatian an aton mga pag-ampo.

6. Kay ano nga importante gud an pagtoo? Paonan-o mo iginpapakita nga may pagtoo ka?

 ⁶ Kon karuyag naton nga pamatian ni Jehova an aton mga pag-ampo, kinahanglan may pagtoo kita ha iya. (Marcos 11:24) Hi apostol Pablo nagsaysay: “Kon waray pagtoo imposible nga mapalipay gud an Dios, kay an bisan hin-o nga nadaop ha Dios kinahanglan tumoo nga buhi hiya ngan hiya an nagbabalos ha mga sinsero nga namimiling ha iya.” (Hebreo 11:6) Pero kulang an pagsiring la nga may pagtoo kita. Kinahanglan klaro nga pamatud-an naton nga may pagtoo kita pinaagi ha pagsugot kan Jehova kada adlaw.​—Basaha an Santiago 2:26.

7. (a) Kay ano nga sadang kita magin mapainubsanon ngan matinalahuron kon nag-aampo kita kan Jehova? (b) Paonan-o naton maipapakita nga sinsero kita kon nag-aampo kita?

⁷ Sadang kita magin mapainubsanon ngan matinalahuron kon nag-aampo kita kan Jehova. Kay ano? Kon makikiistorya kita ha usa nga hadi o presidente, magigin matinalahuron kita. Hi Jehova an Makagarahum-ha-ngatanan nga Dios, salit diri ba sadang kita magin mas matinalahuron ngan mapainubsanon ha pakiistorya ha iya? (Genesis 17:1; Salmo 138:6) Sadang liwat kita magin sinsero ngan kinasingkasing nga mag-ampo kan Jehova, diri basta la nga gin-iinuroutro an pariho nga mga pulong.​—Mateo 6:7, 8.

8. Kon may igin-aampo kita, ano pa an kinahanglan naton buhaton?

⁸ Ha ultimo, kon may igin-aampo kita, kinahanglan buhaton naton an ngatanan uyon ha aton igin-ampo. Pananglitan, kon nag-aampo kita kan Jehova han aton panginahanglan ha kada adlaw, diri kita sadang maghinubya  ngan maglaom la nga ihahatag ha aton ni Jehova an ngatanan bisan kon kaya man naton magtrabaho para hito. Kinahanglan magin maduruto kita ngan karawaton an anoman nga trabaho nga kaya naton. (Mateo 6:11; 2 Tesalonica 3:10) O kon nag-aampo kita kan Jehova para hin bulig nga maiundang an usa nga sayop nga buhat, kinahanglan likyan naton an bisan ano nga sitwasyon diin masusulay kita. (Colosas 3:5) Yana aton usisahon an pipira nga komon nga pakiana mahitungod ha pag-ampo.

9. Kan kanay kita sadang mag-ampo? Ano an igintututdo ha aton han Juan 14:6 mahitungod ha pag-ampo?

⁹ Kan kanay kita sadang mag-ampo? Hi Jesus nagtutdo ha iya mga sumurunod nga mag-ampo ha ‘Amay naton ha langit.’ (Mateo 6:9) Nagsiring liwat  hiya: “Ako an dalan ngan an kamatuoran ngan an kinabuhi. Waray bisan hin-o nga nakakakadto ha Amay kon diri pinaagi ha akon.” (Juan 14:6) Salit sadang kita mag-ampo ngadto la kan Jehova pinaagi kan Jesus. Ano an iginpapasabot han pag-ampo pinaagi kan Jesus? Basi pamatian ni Jehova an aton pag-ampo, kinahanglan kita magpakita hin respeto ha espesyal nga toka nga iginhatag ni Jehova kan Jesus. Sugad han aton nahibaroan, kinanhi hi Jesus ha tuna basi talwason kita ha sala ngan kamatayon. (Juan 3:16; Roma 5:12) Ginpili liwat ni Jehova hi Jesus sugad nga Hitaas nga Saserdote ngan Hukom.​—Juan 5:22; Hebreo 6:20.

10. Kinahanglan ba an espesyal nga posisyon kon nag-aampo kita? Isaysay.

¹⁰ Kinahanglan ba an espesyal nga posisyon kon nag-aampo kita? Diri. Hi Jehova diri naghahangyo nga lumuhod, lumingkod, o tumindog kita kon nag-aampo. Igintututdo ha aton han Biblia nga puydi kita makiistorya kan Jehova ha bisan ano nga posisyon nga nagpapakita hin respeto. (1 Cronicas 17:16; Nehemias 8:6; Daniel 6:10; Marcos 11:25) An pinakaimportante kan Jehova, diri an aton posisyon kon nag-aampo, kondi an aton pakiistorya ha iya nga may husto nga disposisyon. Puydi kita mag-ampo ha daku nga tingog o hin hilom la bisan hain kita ngan bisan ano nga oras han adlaw o gab-i. Kon nag-aampo kita, makakasarig kita nga papamatian kita ni Jehova bisan kon waray iba nga nakakabati.​—Nehemias 2:1-6.

11. Ano an pipira nga butang nga puydi naton ig-istorya kan Jehova?

 ¹¹ Ano an puydi naton ig-ampo? An bisan ano nga kinakarawat ni Jehova. An Biblia nasiring: “Anoman an aton aroon uyon ha iya kaburut-on, namamati hiya ha aton.” (1 Juan 5:14) Puydi ba naton ig-ampo an personal nga mga butang? Oo. An pag-ampo kan Jehova sadang magin pariho ha pakiistorya ha duok nga sangkay. Puydi naton isumat kan Jehova an bisan ano nga aada ha aton hunahuna ngan kasingkasing. (Salmo 62:8) Puydi naton ig-ampo nga tagan kita han iya gamhanan nga baraan nga espiritu basi buligan kita nga mabuhat an husto. (Lucas 11:13) Puydi liwat kita mangaro kan Jehova hin kinaadman basi makahimo kita hin maopay nga mga desisyon, ngan puydi kita mag-ampo para hin kusog basi makaya an mga problema. (Santiago 1:5) Sadang kita maghangyo kan Jehova nga pasayloon an aton mga sala. (Efeso 1:3, 7) Sadang liwat naton ig-ampo an iba, upod na an aton pamilya ngan kabugtoan ha kongregasyon.​—Buhat 12:5; Colosas 4:12.

12. Ano an sadang magin pinakaimportante ha aton mga pag-ampo?

¹² Ano an sadang magin pinakaimportante ha aton mga pag-ampo? Hi Jehova ngan an iya kaburut-on. Sadang naton hiya kinasingkasing nga pasalamatan ha ngatanan nga iya ginbubuhat para ha aton. (1 Cronicas 29:10-13) Maaram kita hini kay han nakanhi hi Jesus ha tuna, iya gintutdoan an iya mga disipulo kon paonan-o mag-aampo. (Basaha an Mateo 6:9-13.) Hiya nagsiring nga sadang nira unahon ha ira  pag-ampo nga baraanon an ngaran han Dios, karuyag sidngon, tagdon nga sagrado o baraan. Katapos, iginpakita ni Jesus nga sadang naton ig-ampo nga kumanhi an Ginhadian han Dios ngan matuman an kaburut-on ni Jehova ha bug-os nga tuna. Kahuman ig-ampo iton importante gud nga mga butang, dida na hi Jesus nagsiring nga sadang naton ig-ampo an aton personal nga mga panginahanglan. Kon gin-uuna naton ha aton mga pag-ampo hi Jehova ngan an iya kaburut-on, iginpapakita naton kon ano an pinakaimportante ha aton.

13. Kinahanglan ba hilaba an aton mga pag-ampo?

¹³ Kinahanglan ba hilaba an aton mga pag-ampo? Waray ginsisiring an Biblia. An aton mga pag-ampo puydi magin halipot o hilaba, depende ha sitwasyon. Pananglitan, bangin mag-ampo kita hin halipot antes kumaon pero bangin mas hilaba kon nagpapahayag kita kan Jehova hin mga pasalamat o nagsusumat ha iya han aton mga ginkakabarak-an. (1 Samuel 1:12, 15) Diri naton karuyag nga mag-ampo hin hilaba basi la magpabilib, sugad han ginbuhat han iba ha panahon ni Jesus. (Lucas 20:46, 47) Diri nalilipay hi Jehova ha sugad nga mga pag-ampo. An importante kan Jehova, kinasingkasing an aton pag-ampo ha iya.

14. Ano kaagsob kita sadang mag-ampo, ngan ano an igintututdo hini ha aton mahitungod kan Jehova?

¹⁴ Ano kaagsob kita sadang mag-ampo? Gin-aaghat kita ni Jehova nga makiistorya ha iya hin regular. An Biblia nasiring nga sadang kita “magpadayon ha pag-ampo” ngan “padayon nga mag-ampo.” (Mateo  26:41; Roma 12:12; 1 Tesalonica 5:17) Hi Jehova pirme andam mamati ha aton. Puydi naton hiya pasalamatan kada adlaw tungod han iya gugma ngan pagin mahinatagon. Puydi liwat kita maghangyo ha iya para hin giya, kusog, ngan pagliaw. Kon ginpapabilhan gud naton an aton pribilehiyo ha pag-ampo kan Jehova, gagamiton naton an tagsa nga higayon basi makiistorya ha iya.

15. Kay ano nga sadang kita magsiring hin “amen” ha kataposan han pag-ampo?

 ¹⁵ Kay ano nga sadang kita magsiring hin “amen” ha kataposan han pag-ampo? An pulong nga “amen” nangangahulogan hin “sigurado” o “matuman unta.” Usa ito nga paagi ha pagpakita nga seryoso kita ha aton igin-ampo, karuyag sidngon, sinsero kita. (Salmo 41:13) An Biblia nagtututdo ha aton nga maopay liwat nga magsiring hin “amen,” ha hilom man o ha daku nga tingog, ha kataposan han pag-ampo ha publiko basi ipakita nga nauyon kita ha ginsiring.​—1 Cronicas 16:36; 1 Corinto 14:16.

16. Ginbabaton gud ba ni Jehova an aton mga pag-ampo? Isaysay.

¹⁶ Ginbabaton gud ba ni Jehova an aton mga pag-ampo? Oo. Ha Biblia, gintatawag hiya nga “Parapamati han pag-ampo.” (Salmo 65:2) Ginpapamatian ngan ginbabaton ni Jehova an sinsero nga mga pag-ampo han minilyon nga tawo, ngan ginbubuhat niya ito ha damu nga iba-iba nga paagi.

17. Paonan-o ginagamit ni Jehova an mga anghel ngan an iya mga surugoon ha tuna basi batunon an aton mga pag-ampo?

¹⁷ Ginagamit ni Jehova an mga anghel ngan an iya mga surugoon ha tuna basi batunon an aton mga pag-ampo. (Hebreo 1:13, 14) Damu an ehemplo hin mga tawo nga nag-ampo para hin bulig nga masabtan an Biblia ngan waray pag-iha, ginbisita hira hin Saksi ni Jehova. Iginpapakita han Biblia nga nakikigbahin an mga anghel ha pagpasamwak han “maopay nga sumat” ha bug-os nga tuna. (Basaha an Pahayag 14:6.) Damu liwat ha aton an nag-ampo kan Jehova mahitungod hin espisipiko nga problema o panginahanglan ngan katapos, nakarawat naton an bulig nga aton kinahanglan tikang ha usa nga igkasi-Kristiano.​—Proberbios 12:25; Santiago 2:16.

18. Paonan-o ginagamit ni Jehova an iya baraan nga espiritu ngan an Biblia basi batunon an mga pag-ampo?

¹⁸ Ginagamit ni Jehova an iya baraan nga espiritu basi batunon an aton mga pag-ampo. Kon nag-aampo kita para hin bulig basi makaya an usa nga problema, mahimo niya gamiton an iya baraan nga espiritu basi giyahan kita ngan tagan hin kusog. (2 Corinto 4:7) Ginagamit liwat ni Jehova an Biblia basi batunon an  aton mga pag-ampo ngan buligan kita nga makahimo hin maaramon nga mga desisyon. Kon ginbabasa naton an Biblia, makakabiling kita hin mga teksto nga mabulig ha aton. Mahimo liwat pagiuson ni Jehova an usa nga nagkukomento ha katirok nga iyakan an kinahanglan naton mabatian o an usa nga tigurang ha kongregasyon basi magsumat ha aton hin punto tikang ha Biblia.​—Galacia 6:1.

19. Kay ano nga usahay baga hin diri ginbabaton ni Jehova an aton mga pag-ampo?

¹⁹ Pero usahay, bangin maghunahuna kita, ‘Kay ano nga diri pa ginbabaton ni Jehova an akon mga pag-ampo?’ Hinumdumi nga maaram hiya kon san-o ngan paonan-o babatunon an aton mga pag-ampo. Maaram hiya han aton ginkikinahanglan. Bangin kinahanglan naton padayon nga mag-ampo basi ipakita nga sinsero kita ha aton igin-aampo ngan para ipakita nga may pagtoo gud kita ha iya. (Lucas 11:5-10) Usahay, ginbabaton ni Jehova an aton mga pag-ampo ha paagi nga bangin diri naton ginlalaoman. Pananglitan, bangin ig-ampo naton an usa nga makuri nga sitwasyon, pero imbes nga wad-on an problema, bangin tagan kita niya hin kusog basi mailob ito.​—Basaha an Filipos 4:13.

20. Kay ano nga sadang kita mag-ampo kan Jehova hin damu ka beses?

²⁰ Daku gud nga pribilehiyo para ha aton an pag-ampo kan Jehova! Makakasigurado kita nga papamatian kita niya. (Salmo 145:18) Ngan kon mas damu ka beses kita nga nag-aampo ha iya hin kinasingkasing, mas magririg-on an aton pakigsangkay ha iya.