Magkaada tumong. Hunahunaa kon an intensyon ba han imo pahayag amo an pagpahibaro, pagkombinse, o pag-aghat ha imo mamarati. Katapos, himoa an imo pahayag uyon han imo tumong. Siguroha nga mabubuligan ka han tanan nga nangunguna nga mga punto basi makab-ot an imo tumong.

Pabug-ati an tema han imo pahayag. Unabiha an tema ha imo bug-os nga pahayag pinaagi ha pag-utro han importante nga mga pulong hito o pinaagi ha paggamit han mga pulong nga pariho an kahulogan.

Himoa nga matin-aw ngan simple an nangunguna nga mga punto. Pilia an nangunguna nga mga punto la nga may kalabotan ha imo tema ngan mahimo igtutdo hin epektibo ha sulod han igintoka nga oras. Limitahi an kadamu han nangunguna nga mga punto, matin-aw nga igyakan an tagsa hito, undang hin madaliay ha tagsa nga nangunguna nga punto, ngan matin-aw nga igpahayag an koneksyon han usa nga nangunguna nga punto ha sunod nga punto.