1-6. Isumat an usa nga eksperyensya han mga Saksi nga nagsasangyaw ha iba-iba nga kahimtang.

 HI Rebecca usa nga batan-on nga Saksi ni Jehova ha Ghana, ngan para ha iya an iya eskwelahan amo an iya teritoryo ha pagsangyaw. Pirme hiya may dara nga mga literatura nga iginbase ha Biblia ha iya bag. Kon break time nira, namimiling hiya hin mga oportunidad nga makasangyaw ha iya mga igkasi-estudyante. Nakagtikang hi Rebecca hin pag-aram ha Biblia ha pipira han iya mga klasmeyt.

² Ha isla han Madagascar, hirani ha este nga baybayon han Africa, duha nga payunir an regular nga nagbabaktas hin mga 25 ka kilometro bisan kon mapaso hinduro basi makaabot ha usa nga hirayo nga baryo. Didto nagdumara hira hin pag-aram ha Biblia ha mga interesado.

³ Basi makadtoan an mga tawo nga naukoy ha ligid han Paraguay ngan Paraná nga mga salog, an mga Saksi ha Paraguay upod an mga boluntaryo tikang ha 15 nga iba pa nga nasud nagburublig paghimo hin lantsa. Ini nga 45 ka tonilada nga lantsa puydi maukyan hin tubtob 12 ka tawo. Naipasarang han madasigon nga mga magsarangyaw han Ginhadian an maopay nga sumat ha mga lugar nga makuri makadtoan gamit inin ira urukyan nga lantsa.

⁴ Ha norte nga bahin han kontinente han North America, ginsalingabot han mga Saksi ha Alaska an naiiba nga higayon nga makasangyaw ha panahon han katpaso nga damu an mga turista. Hito nga panahon, nagkakaabot an mga barko nga may mga pasahero nga tikang ha iba-iba nga nasud, salit an mga Saksi hito nga lugar napwesto ha pantalan ngan nagdidispley hin mga literatura nga iginbase ha Biblia ha iba-iba nga linggwahe. Hito liwat nga nasud, an mga magwarali naggamit hin eruplano ha pagkadto ha nahibubulag nga mga baryo basi maipasarang an maopay nga sumat ha Aleut, Athabascan, Tsimshian, ngan Tlingit nga mga komunidad.

⁵ Hi Larry, ha Texas, U.S.A., may espesyal nga teritoryo—an nursing home nga iya gin-uukyan. Bisan kon naka-wheelchair na la hiya tungod hin aksidente, pirme hiya busy. Iginsumat niya ha iba an mensahe han Ginhadian, upod na an iya paglaom nga nakabase ha Biblia nga kon magmando na an  Ginhadian, maabot an adlaw nga makakalakat na hiya utro.—Isa. 35:5, 6.

⁶ Basi tumambong hin asembleya ha norte han Myanmar, usa nga grupo han mga Saksi an nagbiyahe hin tulo ka adlaw sakay hin ferryboat tikang ha Mandalay. Karuyag gud nira isangyaw an maopay nga sumat, salit nagdara hira hin mga literatura nga iginbase ha Biblia, nga ira gintanyag ha iba nga mga pasahero. Kada pagduduong han ferryboat ha usa nga bungto o baryo, inin madasigon nga mga magsarangyaw nahaw-as ngan napakadto dayon ha mga tawo hito nga lugar, ngan nagtatanyag hin literatura. Samtang nagsasangyaw an kabugtoan, may bag-o nga mga pasahero nga nasakay ha ferryboat, salit may bag-o na liwat hira nga masasangyawan pagbalik nira.

7. Ha ano nga mga paagi an mga magsiringba ni Jehova nagpapamatuod mahitungod han Ginhadian han Dios, ngan ano an ira tumong?

⁷ Pariho han kabugtoan nga gin-unabi hinin pipira nga ehemplo, an madasigon nga mga magsiringba ni Jehova ha bug-os nga kalibotan ‘nagpapamatuod hin bug-os mahitungod han Ginhadian han Dios.’ (Buh. 28:23) Nabisita hira ha tagsa nga balay, nadaop ha mga tawo ha kalsada, nagpapadara ha ira hin mga surat, ngan natawag ha ira ha telepono. Nagbibiyahe man sakay hin bus, namamasyada ha parke, o kon break time ha trabaho, namimiling gud hira hin oportunidad nga makasangyaw mahitungod han Ginhadian han Dios. Bangin iba-iba an ira pamaagi, pero uusa la an tumong—isangyaw an maopay nga sumat ha bisan diin nga may mga tawo.—Mat. 10:11.

8, 9. (a) Kay ano nga masisiring naton nga milagro an buruhaton nga pagsangyaw han maopay nga sumat han Ginhadian ha mas damu nga tawo? (b) Ano nga makapainteres nga pakiana an iginbangon, ngan ano an kinahanglan ta buhaton basi mahibaroan an baton?

⁸ Hinigugma nga magbarasa, usa ka ba han damu nga parasamwak han Ginhadian nga aktibo yana ha sobra 235 nga katunaan? Kon oo, nakikigbahin ka ha makalilipay nga buruhaton nga pagsangyaw han maopay nga sumat han Ginhadian ha mas damu nga tawo! Masisiring naton nga milagro ini nga ginhihimo han katawohan ni Jehova ha bug-os nga kalibotan. Bisan pa han makuri nga mga ulang ngan mga problema—upod na an pagdiri han mga gobyerno ha aton buruhaton ngan pagtimaraot pa ngani—an mga Saksi ni Jehova nagpapamatuod hin bug-os mahitungod han Ginhadian han Dios ha mga tawo ha ngatanan nga nasud.

⁹ Ini an makapainteres nga pakiana nga angay hunahunaon, Kay ano nga an bisan ano nga ulang, bisan pa ngani an pagkontra ni Satanas, waray makapaundang han padayon nga pag-uswag han buruhaton nga pagsangyaw han Ginhadian? Basi mabaton ito, kinahanglan ta hisgotan an  mga nahitabo han siyahan nga siglo C.E. Kay kon huhunahunaon, iginpapadayon naton nga mga Saksi ni Jehova yana an buruhaton nga ira gintikangan hadto.

10. Ano nga buruhaton an pinakaimportante kan Jesus, ngan ano an iya nahibabaroan mahitungod hini nga buruhaton?

¹⁰ An pagsangyaw han maopay nga sumat han Ginhadian han Dios amo an pinakaimportante nga buruhaton para kan Jesu-Kristo, an nag-establisar han Kristiano nga kongregasyon. Makausa, nagsiring hiya: “Kinahanglan ipasamwak ko liwat an maopay nga sumat han Ginhadian han Dios ha iba nga mga syudad, kay tungod hini ginsugo ako.” (Luc. 4:43) Maaram hi Jesus nga nagpapatikang hiya hin buruhaton nga diri niya matatapos nga hiya la. Han hirani na hiya mamatay, igintagna niya nga an mensahe han Ginhadian isasangyaw “ha ngatanan nga nasud.” (Mar. 13:10) Pero paonan-o ini bubuhaton, ngan hin-o an magbubuhat hini?

11. Ano nga importante nga buruhaton an iginsugo ni Jesus ha iya mga disipulo, ngan ano nga bulig an ira makakarawat samtang ginbubuhat nira ito?

¹¹ Katapos mamatay ngan mabanhaw hi Jesus, nagpakita hiya ha iya mga disipulo ngan gintagan hira hinin importante nga buruhaton: “Salit lakat ngan panhimo kamo hin mga disipulo ha mga tawo han ngatanan nga nasud, bawtismuhi hira ha ngaran han Amay ngan han Anak ngan han baraan nga espiritu, tutdui hira ha pagtuman han ngatanan nga akon iginsugo ha iyo. Ngan kitaa! kaupod niyo ako ha ngatanan nga adlaw tubtob ha ikatarapos han sistema han mga butang.” (Mat. 28:19, 20) Iginpakita han mga pulong nga “kaupod niyo ako” nga bubuligan niya an mga disipulo ha buruhaton nga pagsangyaw ngan panhimo hin mga disipulo. Pagkikinahanglanon nira ito nga bulig kay nagtagna hi Jesus nga ‘kangangalasan hira han ngatanan nga nasud.’ (Mat. 24:9) Maaram an mga disipulo nga nagsaad hi Jesus hin iba pa nga bulig. Antes gud hi Jesus sumaka ha langit, ginsidngan niya hira nga tatagan hira hin gahum pinaagi han baraan nga espiritu basi magin iya mga saksi “ngadto ha pinakahirayo nga bahin han tuna.”—Buh. 1:8.

12. Ano nga importante nga mga pakiana an nabangon, ngan kay ano nga kinahanglan ta mahibaroan an mga baton?

¹² May importante nga mga pakiana nga nabangon: Ginseryoso ba han mga apostol ni Jesus ngan han iba pa nga mga disipulo ha siyahan nga siglo an iginsugo ha ira? Ini ba nga gutiay nga grupo han Kristiano nga kalalakin-an ngan kababayin-an nagpamatuod hin bug-os mahitungod han Ginhadian han Dios bisan kon inatubang hira hin mabangis nga pagtimaraot? Nakarawat gud ba nira an bulig ni Jehova ngan an suporta han iya baraan nga espiritu ha ira buruhaton nga panhimo hin mga disipulo?  Ini ngan an iba pa nga mga pakiana ginbabaton ha libro han Biblia nga Mga Buhat. Kinahanglan ta mahibaroan an mga baton hini. Kay ano? Kay nagsaad hi Jesus nga an buruhaton nga iya iginsugo magpapadayon “tubtob ha ikatarapos han sistema han mga butang.” Kon sugad, ini nga sugo aplikado ha ngatanan nga tinuod nga Kristiano, upod na kita nga nabubuhi hini nga panahon han kataposan. Salit interesado gud kita ha kasaysayan nga iginsurat ha libro han Mga Buhat.

13, 14. (a) Hin-o an nagsurat han libro han Mga Buhat, ngan diin nakuha han parasurat an iya impormasyon? (b) Ano an sulod han libro han Mga Buhat?

¹³ Hin-o an nagsurat han libro han Mga Buhat? Diri gin-uunabi han libro mismo kon hin-o an nagsurat hito, pero ginkaklaro ha mga pulong ha tinikangan hito nga an nagsurat han Mga Buhat amo liwat an nagsurat han Ebanghelyo ni Lucas. (Luc. 1:1-4; Buh. 1:1, 2) Salit tikang pa hadto, gintotoohan nga an nagsurat han Mga Buhat amo hi Lucas, nga “hinigugma nga doktor” ngan maopay nga historyador. (Col. 4:14) An libro nagkukobre hin peryodo nga mga 28 ka tuig, tikang han pagsaka ni Jesus ha langit han 33 C.E. tubtob ha kapriso ni apostol Pablo ha Roma han mga 61 C.E. Nakadto hi Lucas ha damu han mga panhitabo nga iya iginsurat. Maaram kita hito kay gin-gamit niya an pulong nga “kami” ha paghulagway han pipira nga panhitabo ha libro han Mga Buhat. (Buh. 16:8-10; 20:5; 27:1) Metikuloso nga parasaliksik hi Lucas, salit sigurado nga an iya iginsurat nga impormasyon nakuha niya mismo tikang kanda Pablo, Bernabe, Felipe, ngan ha iba pa nga gin-unabi ha iya rekord.

¹⁴ Ano an sulod han libro han Mga Buhat? Antes hito, ha Ebanghelyo ni Lucas, nagsurat hiya mahitungod han mga ginyakan ngan ginbuhat ni Jesus. Pero ha libro han Mga Buhat, iginsurat ni Lucas an mga ginyakan ngan ginbuhat han mga sumurunod ni Jesus. Kon sugad, mababasa ha libro han Mga Buhat an mahitungod ha mga tawo nga nakahimo hin diri ordinaryo nga buruhaton bisan kon an iba naghunahuna nga damu ha ira an ‘diri edukado ngan ordinaryo la’ nga mga tawo. (Buh. 4:13) Ha laktod, inin giniyahan han Dios nga rekord nagsusumat ha aton kon paonan-o naestablisar an Kristiano nga kongregasyon ngan kon paonan-o ito nag-uswag. Iginpapakita han Mga Buhat kon paonan-o nagsangyaw an mga Kristiano ha siyahan nga siglo—an ira mga pamaagi ngan an ira disposisyon. (Buh. 4:31; 5:42) Ginpapabug-atan hito an papel han baraan nga espiritu ha pagpasarang han maopay nga sumat. (Buh. 8:29, 39, 40; 13:1-3; 16:6; 18:24, 25) Ginpapabug-atan liwat han Mga Buhat an tema han Biblia, nga amo an pagbaraan han ngaran han Dios pinaagi han iya Ginhadian nga ginmamandoan han Kristo, ngan iginpapakita an malampuson nga pagsarang han mensahe han Ginhadian bisan pa han mabangis nga pagkontra.—Buh. 8:12; 19:8; 28:30, 31.

15. Ha ano nga mga paagi kita magpapahimulos ha pag-usisa han libro han Mga Buhat?

 ¹⁵ Oo, eksayting ngan nagpaparig-on han pagtoo an pag-usisa han libro han Biblia nga Mga Buhat! Kon papamalandungon ta an maisugon ngan madasigon nga ehemplo han siyahan nga mga sumurunod han Kristo, mababantad an aton kasingkasing. Mapapagios kita nga subaron an pagtoo han aton kabugtoan ha siyahan nga siglo. Mabulig ito ha aton nga matuman an sugo ni Jesus nga ‘lumakat ngan manhimo hin mga disipulo.’ Ini nga libro nga imo ginbabasa yana gindisenyo basi buligan ka nga adman hin maopay an libro han Mga Buhat.

16. Ano an tulo nga katuyoan hini nga libro?

¹⁶ Ano an katuyoan hini nga libro? An tulo nga katuyoan hini nga libro amo an (1) parig-unon an aton pagsarig nga ginsusuportaran ni Jehova an buruhaton nga pagsangyaw han Ginhadian ngan panhimo hin mga disipulo pinaagi han iya baraan nga espiritu, (2) aghaton kita nga magin madasigon ha ministeryo pinaagi ha pag-usisa han ehemplo han mga sumurunod han Kristo ha siyahan nga siglo, ngan (3) pahilarumon an aton respeto ha organisasyon ni Jehova ngan ha mga nangunguna ha pagsangyaw nga buruhaton ngan ha mga kongregasyon.

17, 18. Paonan-o iginpipresenta an mga impormasyon hini nga libro, ngan ano nga mga feature hini an makakabulig ha aton personal nga pag-aram ha Biblia?

¹⁷ Paonan-o iginpipresenta an mga impormasyon hini nga libro? Mapapansin mo nga may-ada ini walo nga seksyon, nga an tagsa hito naghihisgot han usa nga bahin han libro han Mga Buhat. An katuyoan han mga kapitulo ilarom hito nga seksyon, diri para hisgotan an tagsa nga bersikulo han Mga Buhat, kondi basi mahibaro hin mga leksyon tikang ha mga panhitabo nga iginhuhulagway hito nga libro han Biblia ngan buligan kita nga masabtan kon paonan-o ta maiaaplikar an mga punto nga aton  mahibabaroan. Ha tinikangan han tagsa nga kapitulo, may introduksyon nga nagsasaysay kon ano an pokus hito nga kapitulo ngan teksto nga nagpapakita kon ano nga bahin han Mga Buhat an hihisgotan.

¹⁸ May iba pa nga mga feature hini nga libro nga makakabulig ha aton personal nga pag-aram ha Biblia. An maghusay nga piktyur nga naghuhulagway han eksayting nga mga panhitabo ha libro han Mga Buhat mabulig ha imo nga maimadyin kon ano an nahitatabo samtang imo ginpapamalandong an nakarekord hito nga libro. Damu nga kapitulo an may mga kahon nga naghahatag hin dugang nga impormasyon nga makakabulig ha aton. May mga kahon nga naghahatag hin impormasyon mahitungod ha kinabuhi han usa nga karakter ha Biblia nga an iya pagtoo angay naton subaron. An iba naman naghahatag hin dugang nga detalye parte ha mga lugar, panhitabo, kustomre, o iba pa nga karakter nga gin-unabi ha Mga Buhat.

19. Ano nga pag-usisa ha kalugaringon an dapat ta buhaton ha panapanahon?

¹⁹ Ini nga libro makakabulig ha imo nga tangkod nga usisahon an imo kalugaringon. Anoman kaiha ka na ha pag-alagad sugad nga magwarali han Ginhadian, maopay nga ha panapanahon mamurubuot ka ngan usisahon an imo mga prayoridad ngan an imo panhunahuna ha Kristiano nga ministeryo. (2 Cor. 13:5) Pakianhi an imo kalugaringon: ‘Inaabat ko pa ba gihapon an pagkaapurado ha akon ministeryo? (1 Cor. 7:29-31) Iginsasangyaw ko ba an maopay nga sumat nga may kompyansa ngan kadasig? (1 Tes. 1:5, 6) Bug-os ba ako nga nakikigbahin ha buruhaton nga pagsangyaw ngan panhimo hin mga disipulo tubtob nga posible?’—Col. 3:23.

20, 21. Kay ano nga apurado gud an aton buruhaton, ngan ano an dapat naton magin determinasyon?

²⁰ Pirme ta hinumdoman nga importante an buruhaton nga iginsugo ha aton—an magsangyaw ngan manhimo hin mga disipulo. Ha tagsa nga adlaw nga nalabay, nagigin mas apurado ito nga buruhaton. Nagtitikahirani na gud an kataposan hini nga sistema han mga butang. Yana labaw ha kakan-o pa man, kinahanglan mahibaroan han mga tawo kon ano an dapat nira buhaton basi makatalwas. Diri kita maaram kon ano pa kadamu nga mga tawo nga may husto nga disposisyon an makarawat han aton mensahe. (Buh. 13:48) Pero responsabilidad naton nga buligan hira samtang may panahon pa.—1 Tim. 4:16.

²¹ Salit importante gud nga subaron ta an ehemplo han madasigon nga mga magsarangyaw han Ginhadian ha siyahan nga siglo. Hinaot an imo pag-aram hin maopay hini nga libro magpagios ha imo nga magin mas madasigon ngan maisugon pa gud ha pagsangyaw. Ngan hinaot maparig-on an imo determinasyon nga padayon nga ‘magpamatuod hin bug-os mahitungod han Ginhadian han Dios.’—Buh. 28:23.